កីឡា

ចាន់ ប៊ុនហឿន ប្រាប់ថា នឹងពិបាកវ៉ៃ ខាំភូ ឲ្យសន្លប់យប់ស្អែក

បានផុស

៨ ខែ មុន

នៅ

ថ្ងៃពុធ ២៧ មីនា ២០២៤

ដោយ

ក្រោយការចាប់ឆ្នោត កីឡាករ ចាន់ ប៊ុនហឿន ត្រូវជួបជាមួយកីឡាករឡាវ ខាំភូ ក្នុងការប្រកួតជុំទី១ ព្រឹត្តិការណ៍ប្រកួតដណ្ដើមរថយន្ត នៅទឹកដីខេត្តស្វាយរៀង នាថ្ងៃទី ២៨ ខែមីនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនការចាប់ឆ្នោត បេក្ខភាពដណ្ដើមរថយន្ត ចាន់ ប៊ុនហឿន ពិតជាមិនចង់ជួបកីឡាករ ខាំភូ ទេ ដោយសារខ្លួនធ្លាប់ឃើញក្បាច់របស់កីឡាកររូបនេះវ៉ៃពេលមកប្រកួតនៅទឹកដីកម្ពុជាកន្លងមក។ ចាន់ ប៊ុនហឿន បាននិយាយថា ខាំភូ ជាកីឡាករមានភាពធន់ ឆ្លាត និងកីឡាករមិនមែនដើរចូលបុក ដូច្នេះពេលជួបគ្នាគឺពិតជារឿងលំបាកសម្រាប់ខ្លួន។ ប្រសិនបើចង់ផ្ដូលគេឲ្យសន្លប់លឿន ត្រូវតែដើរចូល និងសម្រុកវ៉ៃ ដើម្បីបានឱកាសឡើងទៅវគ្គផ្ដាច់ព្រ័ត្រ។

ចាន់ ប៊ុនហឿន បាននិយាយថា៖«ពេលប៉ះខាំភូគឺតានតឹង។ សម្រាប់ការប្រកួតស្អែកត្រូវការអ្នកវ៉ៃដៃគូឲ្យសន្លប់លឿន ទើបអាចឡើងទៅវគ្គបន្ត។ ដល់ពេលជួបជាមួយគាត់គឺពិបាក ដោយសារខាំភូ ជាកីឡាករថយ។ ចឹងពិបាកវ៉ៃគាត់ឲ្យសន្លប់ណាស់។ បើសង្ឃឹមឈ្នះគាត់គឺត្រូវបុកដេញវ៉ៃ ប៉ុន្តែគាត់ជាកីឡាករស្វិត ហើយវ៉ៃមិនងាយសន្លប់ទេ។ ពេលត្រូវគេវ៉ៃខ្លាំងគឺគាត់ថយហើយ។ គាត់មិនឆេវឆាវទេ ពេលត្រូវណាស់គឺគាត់ដកណាស់ ហើយគាត់ជាកីឡាករចិត្តត្រជាក់»។

សម្រាប់លក្ខខណ្ឌក្នុងការប្រកួតដណ្ដើមយករថយន្តស្អែកនេះគឺផ្ដោតសំខាន់លើការផ្ដួលដៃគូឲ្យសន្លប់លឿន ទើបអាចមានឱកាសឡើងទៅវគ្គផ្ដាច់ព្រ័ត្របាន ប៉ុន្តែបើករណីបេក្ខភាព៤គូនេះបានឈ្នះត្រឹមពិន្ទុដូចគ្នានឹងត្រូវសម្រេចលើសំលេងសារបោះឆ្នោតពីអ្នកគាំទ្រ។

ទោះបីជាយ៉ាងណា ចិត្តជាអ្នកកីឡា ចាន់ ប៊ុនហឿន នៅតែមានការតាំងចិត្តខ្ពស់ ហើយព្យាយាមឲ្យអស់ពីសមត្ថភាព ដើម្បីផ្ដួលកីឡាករឡាវ ខាំភូ សម្រាប់ឱកាសឡើងទៅវគ្គផ្ដាច់ព្រ័ត្រ ពីព្រោះនេះជាព្រឹត្តិការណ៍ធំដែលរូបគេកម្រទទួលបាន៕

អត្ថបទ៖ ផា រតនា