កីឡា

ក្រោយក្លាយជាប្រធានគុនខ្មែរ លោក ខូវ ឆាយ កាន់តួនាទី៣ផ្នែកកីឡា

បានផុស

១០ ខែ មុន

នៅ

ថ្ងៃសៅរ៍ ៣០ មីនា ២០២៤

ដោយ

លោក ខូវ ឆាយ បានក្លាយជាប្រធានសហព័ន្ធកីឡាប្រដាល់គុនខ្មែរក្នុងអាណត្តិទី៧ បន្ទាប់ពីលោកទើបត្រូវបានតែងតាំងជាអនុប្រធានទី១បានប៉ុន្មានខែមុន ហើយនេះជាការងារទី៣ដែលកាន់ព័ន្ធនឹងកីឡា។

ការទទួលតួនាទីជាអនុប្រធានទី១នាប៉ុន្មានខែកន្លងទៅ លោក ខូវ ឆាយ ទទួលបានការសរសើរពីមហាជន ជាពិសេសអ្នកចូលចិត្តកីឡាប្រដាល់គុនខ្មែរ។ លោកតែងតែចេញមុខដោះស្រាយ និងបកស្រាយនូវរាល់បញ្ហាអសកម្មដែលបានកើតមានកន្លងក្នុងពេលលោកកាន់ជាអនុប្រធានទី១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញមុខដោះស្រាយ និងបកស្រាយពន្យល់ដល់មហាជនរបស់លោកខុសប្លែកនឹងលោក តែម ម៉ឺន ដែលជាប្រធានច្រើនអាណត្តិ។ អតីតប្រធានច្រើនអាណត្តិកម្រចេញមុខបកស្រាយជាសាធារណៈ និងដោះស្រាយភ្លាមៗណាស់។

ស្របពេលលោក តែម ម៉ឺន វ័យកាន់ច្រើន ហើយលោក ខូវ ឆាយ ចេញមុខដោះស្រាយបានល្អ និងទទួលបានការសរសើរពីមហាជន ពេលនេះលោកត្រូវបានតែងតាំងជាប្រធានក្នុងអាណត្តិទី៧។ លោកចូលកាន់តំណែងចាប់ពីពេលនេះរហូតដល់អាណត្តិទី៧ពីឆ្នាំ២០២១ ដល់២០២៥ ដូច្នេះមានន័យថា លោកចូលកាន់នៅពេលអាណត្តិទី៧មិនទាន់ចប់។

ក្រៅពីតួនាទីថ្មីនេះ លោក ខូវ ឆាយ ជាអគ្គលេខាធិការក្លិបបាល់ទាត់ក្រសួងការពារជាតិដែលកំពុងលេងក្នុងក្របខណ្ឌលីគកំពូលកម្ពុជា។ លោកក៏ជានាយកមជ្ឈមណ្ឌលកីឡាកងយោធពលខេមរភូមិន្ទ ដែលត្រូវបានសម្តេចតេជោ ហ៊ុន សែន អតីតនាយករដ្ឋមន្ត្រីបានចេញអនុក្រឹត្យតែងតាំងកាលពីថ្ងៃទី៣១ ខែកក្កដា ឆ្នាំ២០២៣ ដើម្បីជំនួសលោក តែម ម៉ឺន។