សុទ្ធតែជើងឯក Masaaki និង Tatsuki បានសម្រេចចិត្តចាកចេញពីសង្វៀនធំ K-1

ជើងខ្លាំងជប៉ុន២រូបកីឡាករ Masaaki Noiri និង Tatsuki Shinotsuka បានប្រកាសពី​ការ​ចាកចេញពីស្ថាប័នប្រដាល់ឃីកបុងស៊ីងកម្រិត​ពិភព​លោក​ K-1 ជាផ្លូវការដើម្បីស្វែងរកបទពិសោធថ្មីក្នុងអាជីព​។

ស្ថាប័ន K-1 បានប្រកាសថា កីឡាករ Masaaki Noiri ម្ចាស់ជើងឯក K-1 WORLD GP Welterweigh ​​និងកីឡាករ Tatsuki Shinotsuka ម្ចាស់ជើងឯក Krush Featherweight បានសម្រេចចិត្តចាកចេញពីស្ថាប័នមួយ​នេះហើយ។ វា​មិនមែនជារឿងអាថ៌កំបាំងទេ ពី​ព្រោះមានកីឡាករជាច្រើនក៏បានប្រកាសចាកចេញពីស្ថាប័ន K-1 ហើយពួក​គេ​កំពុងស្វែងរកឱកាសល្អជាងនេះនៅកន្លែងផ្សេង ដើម្បីទទួល​ជោគជ័យ​ថ្មី​បន្ថែម​ទៀត។

អ្នកគាំទ្រមិនភ្ញាក់​​ផ្អើល​​ទេ​ចំពោះ​ការ​ចាក​ចេញ​របស់កីឡាករ Noiri ប៉ុន្តែ​​មនុស្ស​ជា​ច្រើន​​​សង្ឃឹម​ថា នឹងមានបេក្ខភាពមកជំនួយរូបគេក្នុងកម្មវិធី​ប្រកួត​ K-1 WORLD MAX ប្រព្រឹត្ត​ទៅ​នៅ​ខែ​កក្កដា បន្ទាប់ពីរូបគេចាកចេញ។

ក្រោយប្រឡូកក្នុងស្ថាប័ន K-1 អស់រយៈ​ជា​ច្រើន​ឆ្នាំ កីឡាករ​ Noiri បានឈ្នះខ្សែក្រវាត់​ K-1 JAPAN TRYOUT ក្នុងឆ្នាំ២០០៧ ត្រឹម​អាយុ១៣ឆ្នាំ។ ២ឆ្នាំក្រោយមក រូបគេ​បានឈ្នះពានរង្វាន់ K-1 ក្នុង​ឆ្នាំដំបូងអំឡុង​រៀននៅវិទ្យាល័យ។ បន្ទាប់មក Noiri បានក្លាយជាជើងឯក K-1 ២ដង ហើយគ្រងជើងឯក K-1 World GP Super Lightweight ចន្លោះឆ្នាំ២០១៧ និង២០១៨ ព្រម​ទាំង​ឈ្នះ​ជើងឯក K-1 World GP Welterweight ឆ្នាំ២០២១។

ចំពោះ Tatsuki Shinotsuka វ័យ២៤ឆ្នាំ ជាអតីតម្ចាស់ខ្សែក្រវាត់ Krush Featherweight ពិតជាទទួលបានការចាប់អារម្មណ៍យ៉ាងខ្លាំងពីអ្នកគាំទ្រ​ចំពោះ​ក្បាច់ប្រយុទ្ធល្អៗនៅលើសង្វៀន។ រូបគេបានបញ្ជាក់នៅលើប្រព័ន្ធផ្សព្វផ្សាយសង្គមអំពីចាកចេញពីស្ថាប័ន K-1 មុនកាលកំណត់ ដើម្បីចង់បាន​ឱកាសថ្មី។ កីឡាករ Tatsuki ​បាន​យល់ព្រមបង់ប្រាក់ពិន័យ​ជា​ច្រើន​ ក្នុងការបញ្ចប់កិច្ចសន្យាជាមួយ K-1 មុនការកំណត់៕​

ប្រែសម្រួល៖ ផា រតនា
ប្រភព៖ Beyondkick