កីឡា

Dave Leduc ជួលអគារនៅទួលទំពួងបើកក្រុមកីឡា E-Sports

បានផុស

៨ ខែ មុន

នៅ

ថ្ងៃពុធ ៣ មេសា ២០២៤

ដោយ

កីឡាករប្រដាល់កាណាដា-មីយ៉ាន់ម៉ា Dave Leduc បានប្រកាសជាផ្លូវការពីដំណើរការអាជីវកម្មរបស់ខ្លួននៅក្នុងប្រទេសកម្ពុជាដោយបើកក្រុមកីឡាអេឡិចត្រូនិកអាជីពគ្រោងចូលរួមប្រកួតពានរង្វាន់កំពូលនៅកម្ពុជា MPL-KH។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេលនេះ លោកបានចុះកុងត្រារួចរាល់ហើយដើម្បីជួលអគារកម្ពស់៤ជាន់នៅទួលទំពួងសម្រាប់ក្រុមកីឡា E-Sports របស់លោក។ រសៀលថ្ងៃទី៣ ខែមេសា ឆ្នាំ២០២៤ លោកបានប្រកាសថា ៖«ខ្ញុំពិតជាមានសេចក្តីសោមនស្សរីករាយដែលខ្ញុំទើបតែបានចុះកិច្ចសន្យាជួលអគារពាណិជ្ជកម្មនៅទួលទំពួងរយៈពេលពីរឆ្នាំ កម្ពស់៤ជាន់ មានបន្ទប់គេង៦ និងបន្ទប់ទឹក៥ សម្រាប់អាជីវកម្មដំបូងរបស់ខ្ញុំនៅក្នុងប្រទេសកម្ពុជា ដែលជាទីតាំងនៃក្រុម eSport DAV Army «កងទ័ពដាវ» របស់ខ្ញុំ។ ជាន់ទីមួយនឹងប្រើសម្រាប់គម្រោងសម្ងាត់របស់ខ្ញុំ»។

លោក Dave Leduc គ្រោងបោះទុន១០ម៉ឺនដុល្លារអាមេរិកដើម្បីបង្កើតក្រុមកីឡាអេឡិចត្រូនិកនៅប្រទេសកម្ពុជា។

ការបើកអាជីវកម្មនៅកម្ពុជាបានកើតមានឡើង បន្ទាប់ពីលោកបានមកប្រកួតជាមួយកីឡាករ ព្រុំ សំណាង កាលពីចុងឆ្នាំ២០២៣ ហើយលោកក៏បានចាប់អារម្មណ៍នឹងការងាររកស៊ីតែម្តង។ បន្ទាប់ពីវិលត្រឡប់មកកម្ពុជាលើកទី២ និងលើកទី៣ លោកក៏ចាប់ផ្តើមបង្ហាញផែនការអាជីវកម្មតែម្តង៕

អត្ថបទ៖ វីរបុត្រ