កីឡា

ព្រះខ័នរាជស្វាយរៀងកាន់តែខិតជិតឈ្នះជើងឯកលីគជាលើកទី៣

បានផុស

៩ ខែ មុន

នៅ

ថ្ងៃព្រហស្បតិ៍ ៤ មេសា ២០២៤

ដោយ

ក្លិបបាល់ទាត់ព្រះខ័នរាជស្វាយរៀងកាន់តែខិតជិតទៅរកការគ្រងជើងឯកខេមបូឌានព្រីមៀរលីគជាលើកទី៣ក្នុងប្រវត្តិសាស្ត្ររបស់ខ្លួន បន្ទាប់ពីកំពុងធ្វើបានល្អនៅក្នុងរដូវកាល២០២៣-២៤ ដែលសល់ត្រឹមតែ៥ប្រកួតទៀតប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលការប្រកួតជុំទី៣ នៅសល់២ប្រកួតទៀត និងជុំទី៤ (វគ្គ Top 4) មាន៣ប្រកួត ព្រះខ័នរាជស្វាយរៀងដែលមាន៦៥ពិន្ទុ កំពុងនាំមុខ៧ពិន្ទុ លើគូប្រជែងតែមួយគត់គឺភ្នំពេញក្រោនដែលមាន៥៨ពិន្ទុ។ ដូច្នេះព្រះខ័នរាជស្វាយរៀងត្រូវការឈ្នះតែ៣ប្រកួតទៀតប៉ុណ្ណោះនឹងក្លាយជាជើងឯកដោយស្វ័យប្រវត្តិ។

ក្រៅពីភ្នំពេញក្រោន គ្មានក្រុមណាផ្សេងអាចប្រជែងជាមួយព្រះខ័នរាជស្វាយរៀងឡើយ ពីព្រោះអស់ឱកាសហើយដូចជា វិសាខា បឹងកេត អាយអេសអាយដង្កោសែនជ័យ និងក្រសួងការពារជាតិជាដើម។

គិតត្រឹម២៥សប្តាហ៍ (២៥ប្រកួត) កន្លងទៅ ព្រះខ័នរាជស្វាយរៀង ទទួលបានជ័យជម្នះ២១លើក ស្មើ២លើក និងចាញ់២លើក រកបាន៦៨ពិន្ទុ កំពុងឈរលើកំពូលតារាងដ៏រឹងមាំ។ កំណត់ត្រាដ៏ល្អបំផុតនៅក្នុងរដូវកាលនេះគឺទទួលបានជ័យជម្នះ៩លើកជាប់គ្នាក្នុងជុំទី១ ប៉ុន្តែចូលជុំទី២ ពួកគេហាក់ធ្លាក់ទម្រង់លេងបន្តិច ដោយបានចាញ់២ដង ស្មើ២ដង ខណៈជុំទី៣ ពួកគេកំពុងធ្វើដំណើរយ៉ាងល្អដោយមិនទាន់ស្គាល់បរាជ័យឡើយ។

សម្រាប់ការប្រកួតនៅសល់២លើកចុងក្រោយក្នុងជុំទី៣ ព្រះខ័នរាជស្វាយរៀង ត្រូវបើកទ្វារផ្ទះរបស់ខ្លួនទទួលក្រុមចំណាត់ថ្នាក់លេខ៩ គិរីវង់សុខសែនជ័យ នៅថ្ងៃសៅរ៍ ទី៦ ខែមេសា និងសប្តាហ៍ចុងក្រោយត្រូវធ្វើដំណើរមកជួប បឹងកេត នៅថ្ងៃទី២០ ខែមេសា។