កីឡា

AFF បានចំណាយជិត៥០ម៉ឺនដុល្លារដាក់កៅអីថ្មី ពហុកីឡដ្ឋានជាតិអូឡាំពិក

បានផុស

៦ ខែ មុន

នៅ

ថ្ងៃអង្គារ ៩ មេសា ២០២៤

ដោយ

គម្រោងបំពាក់កៅអីមានខ្នងបង្អែកនៅពហុកីឡដ្ឋានជាតិអូឡាំពិកបានបញ្ចប់រួចរាល់ហើយដែលជាការចំណាយទាំងស្រុងរបស់សហព័ន្ធកីឡាបាល់ទាត់អាស៊ាន (AFF)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីស្របតាមស្ដង់របស់សហព័ន្ធកីឡាបាល់ទាត់អន្ដរជាតិ (FIFA) និងសហព័ន្ធបាល់ទាត់ទ្វីបអាស៊ី (AFC) សហព័ន្ធកីឡាបាល់ទាត់កម្ពុជា និងគណៈកម្មាធិការប្រតិបត្តិ បានសម្រេចផ្លាស់ប្ដូរកៅអីគ្មានខ្នងបង្អែកចេញដែលបានដាក់មុនពេលកីឡាស៊ីហ្គេម ឆ្នាំ២០២៣ និងត្រូវបានដាក់ជំនួសដោយកៅអីមានខ្នងបង្អែក។

ការបំពាក់កៅអីថ្មីគឺនៅផ្នែកខាងជើង ខាងកើត និង ខាងត្បូង នៃពហុកីឡដ្ឋានជាតិអូឡាំពិក សរុប២៥០០០កៅអី។ គម្រោងនេះជាការចំណាយទាំងស្រុងរបស់សហព័ន្ធកីឡាបាល់ទាត់អាស៊ានដែលសរុបអស់ប្រាក់ ៤៩៨,៧៥០ ដុល្លារ។ ការបំពាក់កៅអីថ្មីនេះបានចាប់ផ្តើមកាលពីដើមខែមករា និងបានបញ្ចប់ដើមខែមេសា។ បន្ទាប់ពីដាក់កៅអីរួចរាល់ ពហុកីឡដ្ឋានជាតិអូឡាំពិកអាចផ្ទុកអ្នកទស្សនាផ្ទាល់បានចំនួន៣ម៉ឺននាក់។

សមិទ្ធផលដ៏ជោគជ័យនេះកើតឡើងពីការខិតខំប្រឹងប្រែងរបស់លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា និងជាប្រធាន សហព័ន្ធកីឡាបាល់ទាត់អាស៊ាន។ ក្នុងពិធីប្រគល់-ទទួលជាផ្លូវការនៅព្រឹកថ្ងៃទី៩ ខែមេសា ឆ្នាំ២០២៤ លោកមានប្រសាសន៍ ៖«ក្នុងនាមជាប្រធានសហព័ន្ធកីឡាបាល់ទាត់អាស៊ាន ខ្ញុំសូមចូលរួមអបអរសាទរ ចំពោះសមិទ្ធផលថ្មី ដែលសហព័ន្ធបាល់ទាត់កម្ពុជាទទួលបាន ដើម្បីបំពេញទៅតាមស្ដង់ដានៃបទបញ្ជាប្រកួតរបស់សហព័ន្ធបាល់ទាត់អន្តរជាតិ និងសហព័ន្ធបាល់ទាត់ទ្វីបអាស៊ី។ ពហុកីឡាដ្ឋាននេះនឹងបម្រីដល់ការប្រកួតជាច្រើនទៀត នាពេលខាងមុខ។ យើងមានការប្រកួតមិត្តភាព ជាពិសេសចុងឆ្នាំនេះមានការប្រកួតពានរង្វាន់ជើងឯកអាស៊ាន»៕