កីឡា

កៅអីចាស់ដកចេញពីស្តាតអូឡាំពិក ក្លិបនីមួយៗទទួលបានជិត២ពាន់

បានផុស

១១ ខែ មុន

នៅ

ថ្ងៃពុធ ១០ មេសា ២០២៤

ដោយ

ក្រោយការបំពាក់កៅអីថ្មីមានខ្នងបង្អែករួចរាល់ សហព័ន្ធកីឡាបាល់ទាត់កម្ពុជា និងសហព័ន្ធកីឡាបាល់ទាត់អាស៊ាន បានធ្វើពីធីប្រគល់-ទទួលកៅអីថ្មី កាលពីថ្ងៃទី៩ ខែមេសា ឆ្នាំ២០២៤ ជូនទៅក្រសួងអប់រំ យុវជន និងកីឡាជាអ្នកគ្រប់គ្រង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការឲ្យដឹងពីគណៈអធិបតីក្នុងពិធីប្រគល់-ទទួលកៅអីថ្មីកាលពីព្រឹកថ្ងៃទី៩ ខែមេសា ឆ្នាំ២០២៤ថា កៅអីចាស់គ្មានខ្នងបង្អែកចំនួន ២១,៦៦១ ត្រូវបានដកចេញ និងរក្សាទុកយ៉ាងល្អ ដើម្បីធានាបាននូវគុណភាព សម្រាប់ការយកទៅប្រើប្រាស់បន្ត ពីព្រោះកៅអីទាំងនេះទើបត្រូវបានដាក់កាលពីដើមឆ្នាំ២០២៣ មុនពេលកីឡាស៊ីហ្គេមលើកទី៣២។ តាមការឯកភាពពីក្រសួងអប់រំ យុវជន និងកីឡា កៅអីទាំងនេះនឹងត្រូវបែងចែកទៅក្លិប-សមាគមបាល់ទាត់ជាសមាជិកក្នុងខេមបូឌានព្រីមៀរលីគចំនួន១០។ មួយក្លិបនឹងទទួលបានចំនួន១៩៦០កៅអី ដើម្បីយកទៅបំពាក់ក្នុងកីឡដ្ឋានរបស់ពួកគេ។

ទិដ្ឋភាពកៅអីចាស់ដែលត្រូវបានដាក់ពេលស៊ីហ្គេម

ការបែងចែកកៅអីដល់ក្លិបទាំងនេះគឺជាការរួមចំណែកអភិវឌ្ឍបាល់ទាត់នៅកម្ពុជា ហើយក៏ជួយសម្រួលបន្ទុកចំណាយមួយផ្នែកដល់ក្រុមទាំងអស់នៅក្នុងលីគកំពូលកម្ពុជា។ ចំពោះសហព័ន្ធបាល់ទាត់កម្ពុជា និងក្រុមហ៊ុនខេមបូឌានព្រីមៀរលីគ បានដាក់ផែនការធំបំផុតគឺ ខេត្ត១ ត្រូវមានក្លិបបាល់ទាត់អាជីព១ និងកីឡដ្ឋានស្តង់ដា១ ដែលជាចំណែកជួយពង្រឹងក្រុមបាល់ទាត់ជម្រើសជាតិកម្ពុជាឈានទៅដល់ជុំចុងក្រោយជើងឯកពិភពលោកឆ្នាំ២០៣៨។

ប្រសិនបើកម្ពុជាអាចធ្វើបានតាមផែនការនេះគឺនឹងមានក្លិបបាល់ទាត់អាជីព២៥ ឬស្មើ២៥ខេត្ត-ក្រុងដែលអាចលេងក្នុងក្របខណ្ឌលីគកំពូលកម្ពុជា លីគទី២ ពានរង្វាន់សម្តេចតេជោ ហ៊ុន សែន និងពានរង្វាន់ផ្សេងៗទៀត។

សូមបញ្ជាក់ថា បច្ចុប្បន្ននេះ ពហុកីឡដ្ឋានជាតិអូឡាំពិកអាចផ្ទុកអ្នកទស្សនាផ្ទាល់បានប្រមាណ៣ម៉ឺននាក់ប៉ុណ្ណោះ បន្ទាប់ពីត្រូវបានដាក់កៅអីមានខ្នងបង្អែកថ្មីគឺ ផ្នែកខាងជើង ខាងកើត និងខាងត្បូង មានប្រមាណ២៥០០០កៅអី និងកន្លែងមានដំបូល៥០០០កៅអី៕