កីឡា

យប់មិញ Liverpool ចាញ់ ០-៣ លោក Klopp ចាត់ទុកជាការលេងអន់បំផុត

បានផុស

១២ ខែ មុន

នៅ

ថ្ងៃសុក្រ ១២ មេសា ២០២៤

ដោយ

ស្ទើរមិនគួរឲ្យជឿក្រុមហង្សក្រហម Liverpool បានបរាជ័យក្នុងផ្ទះខ្លួនឯងក្រោមថ្វីជើងក្រុម Atalanta ដោយលទ្ធផល ៣-០ សម្រាប់ការប្រកួតជើងទី១ វគ្គ៨ក្រុមចុងក្រោយពានរង្វាន់ Europa League យប់ថ្ងៃទី១១ ខែមេសា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថិតិរបស់ក្រុមម្ចាស់ផ្ទះ Liverpool មានប្រៀបលើក្រុមភ្ញៀវ ប៉ុន្ដែពួកគេមិនមានសំណាងទម្លាយសំណាញ់ទីរបស់គូប្រជែងឡើយ។ ពួកគេបង្កើតឱកាសស៊ុត១៩លើក ស៊ុតចំគោលដៅ៥លើក និងគ្រប់គ្រងបាល់៧១% ខណៈ Atalanta បង្កើតឱកាសស៊ុត១១លើក ស៊ុតចំគោលដៅ៧លើក ហើយគ្រប់គ្រងបាល់បានតែ២៩%ប៉ុណ្ណោះ ប៉ុន្តែបានទម្លាយសំណាញ់ទីរបស់ម្ចាស់ផ្ទះ៣គ្រាប់។

ចំពោះលោក Jurgen Klopp គ្រូបង្វឹកក្រុម Liverpool មិនបានដាក់កីឡាករសំខាន់ៗក្នុងជម្រើស១១នាក់ដំបូងទេ ប៉ុន្ដែនៅវគ្គទី២ លោកបានប្ដូរយុទ្ធសាស្រ្ដ ដោយប្ដូរកីឡាករ Robertson, Mohamed Salah និង Luis Diaz ចូល ប៉ុន្តែនៅតែមិនអាចរកគ្រាប់បាល់បាន។

លោក Jurgen Klopp បាននិយាយថា ៖«ព្រះជាម្ចាស់អើយ! រាត្រីនេះជាការប្រកួតដ៏អាក្រក់មួយ។ ខ្ញុំនៅទីនេះបានត្រឹមតែនិយាយអបអរសាទរដល់ក្រុម Atalanta។ យើងធ្វើមិនបានដូចការគ្រោងទុក។ គ្មានចំណុចវិជ្ជមានណាដែលត្រូវនិយាយទេ»។

ទោះបីបរាជ័យក្នុងជើងទី១ ប៉ុន្តែក្រុម Liverpool នៅមិនទាន់អស់ឱកាសឡើងទៅវគ្គពាក់កណ្តាលផ្តាច់ព្រ័ត្រឡើយ ក្នុងពានរង្វាន់ Europa League។ ពួកគេនៅសល់ឱកាស៩០នាទីទៀតសម្រាប់ការប្រកួតជើងទី២ នៅថ្ងៃទី១៩ ខែមេសា ឆ្នាំ២០២៤ នៅប្រទេសអុីតាលី។

ដើម្បីទទួលបានឱកាសឡើងទៅវគ្គ៤ក្រុមចុងក្រោយ ហង្សក្រហម Liverpool ត្រូវរកឲ្យបាន៤គ្រាប់ដែលចំនួនគ្រាប់បាល់នេះមិនមែនជាការងាយស្រួលក្នុងការស្វែងរកនៅក្រៅដីនោះទេ។ ចំពោះការប្រកួតនៅ Premier League ហង្សក្រហមកំពុងប្រជែងជើងឯកជាមួយក្រុម Arsenal និង Man City៕