កីឡា

សង្វៀនធំ I-1 ដាក់ ឈឿង ល្វៃ ដណ្តើមខ្សែក្រវាត់មាស ជាមួយ១៦ប្រទេស

បានផុស

១១ ខែ មុន

នៅ

ថ្ងៃអង្គារ ២៣ មេសា ២០២៤

ដោយ

សង្វៀនប្រដាល់ដ៏ធំប្រចាំនៅទីក្រុងហុងកុង ប្រទេសចិន I-1 នឹងរៀបចំព្រឹត្តិការណ៍ប្រកួតដ៏ធំមួយទៀតដែលប្រជុំដោយជើងខ្លាំងមកពីប្រទេស១៦ដើម្បីដណ្តើមខ្សែក្រវាត់មាសកម្រិតពិភពលោក ក្នុងនោះមានអ្នកលេងគុនខ្មែរជាតួដ៏សំខាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២១ ខែមេសា ឆ្នាំ២០២៤ សង្វៀន I-1 របស់ទីក្រុងហុងកុងបានប្រកាសថា ព្រឹត្តិការណ៍នឹងធ្វើឲ្យពិភពលោកភ្ញាក់ផ្អើល! ជើងឯកប្រដាល់១៦ ប្រទេសនឹងធ្វើឲ្យកក្រើកទីក្រុងហុងកុង។ ការប្រកួតដណ្តើមខ្សែក្រវាត់ I-1 World Muaythai Championships នឹងមកដល់ក្នុងពេលឆាប់ៗនេះ។ ជើងឯកមកពី១៦ប្រទេស នឹងត្រូវជួបគ្នាដណ្តើមខ្សែក្រវាត់មាសនាថ្ងៃទី២៥ ខែមិថុនា ឆ្នាំ ២០២៤។

តាមការឲ្យដឹងពីកម្មវិធីគឺប្រទេសដែលចូលរួមមានទីក្រុងហុងកុង អ៉ីតាលី អាហ្សង់ទីន ទុយនេស៊ី ម៉ារ៉ុក លីប៊ី ន័រវែ យេមែន អ៉ីរ៉ង់ ប្រេស៊ីល ម៉ុងហ្គោលី ជប៉ុន ម៉ាឡេស៊ី ថៃ កម្ពុជា ហ្វីលីពីន នឹងជួបជុំគ្នាដើម្បីចូលរួមប្រកួតក្នុងព្រឹត្តិការណ៍ធំមិនធ្លាប់មានពីមុន។

ទោះបីជាមិនទាន់ដឹងលំអិតយ៉ាងណា ប៉ុន្តែនៅក្នុងរូបភាពផ្សព្វផ្សាយ កម្មវិធីបានបង្ហាញពីកីឡាករកម្ពុជា ឈឿង ល្វៃ ដែលនឹងមានវត្តមានចូលរួមប្រកួតក្នុងព្រឹត្តិការណ៍ដ៏ធំនេះ។

ឈឿង ល្វៃ បានក្លាយជាកីឡាករកម្ពុជាទី១ក្នុងការគ្រងខ្សែក្រវាត់ម៉ាតុងកម្រិតពិភពលោក World Super-4 Championship បន្ទាប់ពីបានយកឈ្នះដៃគូ២នាក់ជាប់គ្នានៅយប់ថ្ងៃទី១២ ខែមីនា ឆ្នាំ២០២៤ នៅទីក្រុងហុងកុង ប្រទេសចិន។ ពេលនោះ នៅជុំទី១ អ្នកលេងគុនខ្មែរបានផ្តួលកីឡាករថៃ Fahsang តាមរយៈជង្គង់ និងកែងឲ្យសន្លប់ក្នុងទឹកទី១ដើម្បីឡើងទៅវគ្គផ្តាច់ព្រ័ត្រជួបកីឡាករអាល្លឺម៉ង់ Elysee Kochiese ដែលបានយកឈ្នះដោយពិន្ទុ។

តាមរយៈ ឈឿង ល្វៃ សង្វៀនប្រដាល់ I-1 បានទាក់ទាញការចាប់អារម្មណ៍យ៉ាងខ្លាំងពីមហាជន ជាពិសេសពីអ្នកគាំទ្រនៅប្រទេសកម្ពុជាដែលធ្វើឲ្យពួកគេកាន់តែមានកម្លាំងចិត្តក្នុងការបង្កើតកម្មវិធីថ្មីទៀត៕

អត្ថបទ៖ វីរបុត្រ