ប៉ាឡេស្ទីន អំពាវនាវឱ្យ FIFA ចាត់វិធានការយ៉ាងម៉ឺងម៉ាត់ប្រឆាំងអ៊ីស្រាអែល

សមាគមកីឡាបាល់ទាត់ប៉ាឡេស្ទីន (PFA) នឹងបង្ហាញឆន្ទៈ​នៅក្នុងសមាជរបស់សហព័ន្ធ​កីឡា​បាល់ទាត់​អន្តរជាតិ (FIFA) នាទីក្រុងបាងកកក្នុងខែឧសភា​​ដើម្បី​អំពាវនាវឲ្យមានការដាក់ «ទណ្ឌកម្មសមស្រប​ប្រឆាំងនឹងក្រុមអ៉ីស្រាអែល»។

គំនិតផ្តួចផ្តើមនេះគឺជាលទ្ធផលនៃលិខិតពី PFA ទៅកាន់ FIFA ក្នុងខែមីនា។ ឆន្ទៈ​នេះអំពាវនាវឱ្យមាន ៖«ការដាក់ទណ្ឌកម្មសមស្រប​ឲ្យ​មានប្រសិទ្ធិភាពភ្លាមៗ ប្រឆាំងនឹងក្រុមអ៉ីស្រាអែល រួមទាំងក្រុមជម្រើសជាតិ និងក្លិប ​ពាក់​ព័ន្ធ​នឹង​ការបំពានច្បាប់អន្តរជាតិ ដែលបានប្រព្រឹត្តដោយការកាន់កាប់របស់អ៉ីស្រាអែល នៅប៉ាឡេស្ទីន ជាពិសេសនៅតំបន់ហ្គាហ្សា»។

ឆន្ទៈបែបនេះនឹងតម្រូវឱ្យមានការជជែកដេញដោលគ្នាជាលើកដំបូងអំពីជម្លោះតំបន់ហ្គាហ្សា នៅ​ក្នុង​សមាជ​របស់​ស្ថាប័នគ្រប់គ្រងកីឡាដ៏ធំមួយនេះ។ វានឹងក្លាយជាធាតុសំខាន់មួយនៅក្នុងរបៀបវារៈ​ក្នុងកិច្ចប្រជុំប្រចាំឆ្នាំនៅទីក្រុងបាងកក ប៉ុន្តែមិនមែនតែមួយនោះទេ FIFA ក៏នឹងពិចារណាអំពី​ប្រទេសម្ចាស់ផ្ទះ World Cup នារីឆ្នាំ២០២៧ និងផែនការប្រយុទ្ធប្រឆាំងនឹងការរើសអើងជាតិសាសន៍ផងដែរ។

សមាគមកីឡាបាល់ទាត់ប៉ាឡេស្ទីន បានចោទប្រកាន់សមភាគីអ៉ីស្រាអែល ពីបទរំលោភលើលក្ខន្តិកៈរបស់ FIFA ដោយទទួលស្គាល់ក្លិបដែលមានមូលដ្ឋាននៅក្នុងទឹកដីដែលកាន់កាប់ ហើយខកខានក្នុងការចាត់វិធានការយ៉ាងម៉ឺងម៉ាត់ប្រឆាំងនឹងការរើសអើងជាតិសាសន៍នៅក្នុងតំបន់ដែលស្ថិត​ក្រោមយុត្តាធិការរបស់ខ្លួន។

សំណើនេះត្រូវបានគាំទ្រដោយសហព័ន្ធបាល់ទាត់អាល់ហ្សេរី អ៊ីរ៉ាក់ ហ្សកដានី ស៊ីរី និងយេម៉ែន ប៉ុន្តែ​​ប្រទេស​កាតារ និង​អារ៉ាប៊ីសាអ៊ូឌីត​មិន​គាំទ្រ​ទេ៕

ប្រែសម្រួល៖ មន្នីរ័ត្ន
ប្រភព៖ Inside The Games