តុលាការច្រានចោលបណ្តឹងឧទ្ធរណ៍អតីតប្រធានបាល់ទាត់អេស្ប៉ាញរឿងថើប Jenni

តុលាការអេស៉្បាញកាលពីថ្ងៃចន្ទ​បាន​ច្រាន​ចោល​បណ្តឹង​ឧទ្ធរណ៍​របស់​អតីតប្រធានសហព័ន្ធកីឡា​បាល់ទាត់អេស្ប៉ាញលោក Luis Rubiales ពាក់ព័ន្ធ​រឿង​ក្តី​នៃការថើប​មាត់កីឡាការិនីម្ចាស់ជើងឯក World Cup។

លោក Rubiales បានថើបកីឡាការិនីអេស្បាញ Jenni Hermoso នៅលើបបូរមាត់ ខណៈ​នាងចូលទៅទទួលមេដាយរបស់នាង បន្ទាប់ពីក្រុមនារី​អេស្ប៉ាញ​បានយកឈ្នះ​ក្រុមអង់គ្លេស វគ្គផ្តាច់ព្រ័ត្របាល់ទាត់នារីពិភពលោក (FIFA Women’s World Cup) កាលពីខែសីហាឆ្នាំមុន។ បន្ទាប់ពីការចោទប្រកាន់ និងការស៊ើបអង្កេត បុរសវ័យ៤៦ឆ្នាំរូបនេះបានលាលែងពីតំណែង ចំពេលមានការរិះគន់យ៉ាងខ្លាំងពី​មហាជនស្ទើរ​ទូទាំង​ពិភព​លោក។

ព្រះ​រាជ​អាជ្ញាសាធារណៈដែលគ្រប់គ្រងករណីនេះបានប្រកាសកាលពីខែមុនថា ពួកគេកំពុងបន្តពិនិត្យការសម្រេចឱ្យជាប់ពន្ធនាគាររយៈពេល២ឆ្នាំកន្លះចំពោះលោក Rubiales។ ឥឡូវ​នេះ​ លោក​ប្រឈមនឹងការកាត់ទោសចំពោះឧប្បត្តិហេតុក៏ដូចជាសម្រាប់ការបង្ខិតបង្ខំជាបន្តបន្ទាប់រួមជាមួយនឹងអតីតអ្នកចាត់ការសញ្ជាតិអេស្ប៉ាញលោក Jorge Vilda ផងដែរ។

តុលាការព្រហ្មទណ្ឌបានធ្វើសេចក្តីសម្រេចដោយច្រានចោលបណ្តឹងឧទ្ធរណ៍ប្រឆាំងនឹងដីការបស់ចៅក្រម លោក Francisco de Jorge ក្នុងសំណុំរឿង ដែល លោក Rubiales, លោក Vilda, អតីតនាយក Albert Luque និងនាយកប្រតិបត្តិទីផ្សារ Ruben Rivera។ សេចក្តីរាយការណ៍ថា អង្គជំនុំជម្រះបានចាត់ទុកខ្លឹមសារនៃបណ្តឹងឧទ្ធរណ៍ថា មានភស្តុតាង​សមស្របនឹងការពិពណ៌នាអំពីឧក្រិដ្ឋកម្ម​ទាក់ទងនឹងសេរីភាពផ្លូវភេទ និង​ការបង្ខិតបង្ខំ។

តុលាការបានបញ្ជាក់យ៉ាងច្បាស់ថា ផលប៉ះពាល់ផ្លូវច្បាប់ “ការថើប និងការយល់ព្រមមិនអាចត្រូវបានវាយតម្លៃនៅចំណុចប្រសព្វនេះទេ”។

នៅក្នុងការចោទប្រកាន់ដែលបញ្ជូនទៅចៅក្រម ព្រះ​រាជ​អាជ្ញាសាធារណៈបានបង្ហាញពីបំណងចង់ឱ្យលោក​ Rubiales ប្រឈមមុខនឹងការជាប់ពន្ធនាគាររយៈពេល១ឆ្នាំ ប្រសិនបើរកឃើញថាមានពិរុទ្ធពីបទរំលោភបំពានផ្លូវភេទ។ រួមជាមួយនឹងការបង្ខិតបង្ខំបន្ថែម១៨ខែ ទាក់ទងនឹងកិច្ចខិតខំប្រឹងប្រែងដែលបានអះអាងរបស់លោកក្នុងការបញ្ចុះបញ្ចូលកីឡាការិនីបាល់ទាត់រូបនេះឱ្យលើកលែងទោស​​ជាសាធារណៈបន្ទាប់ពីឧប្បត្តិហេតុនេះ៕

ប្រែសម្រួល៖ មន្នីរ័ត្ន
ប្រភព៖ Inside The Games