កីឡា

ភក្តី ជាគុនខ្មែរទី១ប្រកួតនៅ Knock Out ប៉ះម្ចាស់ខ្សែក្រវាត់រសៀលនេះ

បានផុស

១០ ខែ មុន

នៅ

ថ្ងៃសៅរ៍ ២៧ មេសា ២០២៤

ដោយ

កីឡាករ ភក្តី គុនខ្មែរ បានក្លាយជាកីឡាករប្រដាល់កម្ពុជាទី១ត្រូវប្រកួតនៅសង្វៀនជប៉ុន Knock Out ដែលអាចនឹងបើកទ្វារសម្រាប់កីឡាករគុនខ្មែរផ្សេងទៀតទៅប្រកួតនៅទឹកដីជប៉ុន ប្រសិនបើរូបគេធ្វើបានល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សង្វៀនប្រដាល់ជប៉ុនភាគច្រើនគឺនាំយកកីឡាករថៃ ចិន និងអឺរ៉ុបទៅប្រកួតនៅក្នុងប្រទេសរបស់ខ្លួន។ ជាពិសេសសង្វៀនដ៏ធំរបស់ជប៉ុន Knock Out មិនដែលបាននាំយកកីឡាករគុនខ្មែរទៅប្រកួតនៅទីនោះទេ។ នេះជាលើកទី១ដែលកីឡាករគុនខ្មែរទៅប្រកួតនៅទីនោះប៉ះកីឡាករ Shibata Shingo ជាម្ចាស់ខ្សែក្រវាត់ប្រចាំសង្វៀន Knock Out នៅរសៀលថ្ងៃសៅរ៍ ទី២៧ ខែមេសា។

កីឡាករ Shibata Shingo មានប្រវត្តិប្រកួតចំនួន៣៨ដង ក្នុងនោះឈ្នះ២៥ដង ចាញ់១១ដង និងស្មើ២ដង។ ភាគច្រើនរូបគេប្រកួតនៅក្នុងស្រុក ប៉ុន្តែការប្រកួត៣ដងនៅសង្វៀន ONE ក្នុងប្រទេសថៃ រូបគេឈ្នះ១ដង និងចាញ់២ដង។

កីឡាករជប៉ុនរូបនេះអាយុ២៨ឆ្នាំមានកម្ពស់១.៨៣ម៉ែត្រដែលមានប្រៀបលើ ភក្តី គុនខ្មែរ មានកម្ពស់១.៧៣ម៉ែត្រ ធ្លាប់ប្រកួតបាន៩១ដង ក្នុងនោះឈ្នះ៧៧ដង ចាញ់១១ដង និងស្មើ៣ដង។

ភក្តី ជាកីឡាករម្នាក់ដែលស៊ូ ធន់ និងមានទឹកចិត្តក្លាហានក្នុងការតទល់ជាមួយដៃគូ ប៉ុន្តែអាវុធរបស់គេមិនសូវមានទម្ងន់ និងក្បាច់វ៉ៃស្មើគ្នា ដែលអាចនិយាយបានថា មិនមានក្បាច់សម្លាប់ណាមួយគ្រោះថ្នាក់គួរឲ្យកត់សំគាល់ទេ។

Shibata Shingo ដែលជាម្ចាស់ខ្សែក្រវាត់ WMC NKF នៅប្រទេសជប៉ុនក៏មានអាវុធស្រាល និងមិនសូវស៊ូធន់ប៉ុន្មានទេ។ ការប្រកួតចុងក្រោយត្រូវបានកីឡាករវ័យក្មេងថៃអាយុ១៧ឆ្នាំ Kwanmuang វាយឲ្យសន្លប់នៅដើមទឹកទី១។ រូបគេធ្លាញ់ពិន្ទុកីឡាករថៃ Wor Chakrawut ដែលធ្លាប់ស្មើពិន្ទុកីឡាករកម្ពុជា ផល សោភ័ណ្ឌ និង ឈ្នះពិន្ទុ មឿន សុខហ៊ុច។

ឃើញថា មួយរយៈពេលចុងក្រោយនេះ កីឡាករចិន និងជប៉ុនបានមកប្រកួតច្រើននៅកម្ពុជាដោយបានកោតសរសើរពីកីឡាគុនខ្មែរ។ ជាមួយគ្នានេះ កីឡាករកម្ពុជាក៏បានចេញទៅប្រកួតនៅប្រទេសចិនច្រើន ហើយឥឡូវនេះ ភក្តី គុនខ្មែរ បានចេញទៅប្រកួតនៅជប៉ុនថែមទៀត។ ដូច្នេះនៅពេលខាងមុខកីឡាករគុនខ្មែរកាន់តែច្រើនទៅប្រកួតនៅចិន និងជប៉ុន៕