កីឡា

សេង មង្គល ប្រាប់ពីយុទ្ធសាស្ត្ររបស់សម្តេចតេជោឲ្យបុកក្រុមតារាគុនខ្មែរ

បានផុស

៧ ខែ មុន

នៅ

ថ្ងៃព្រហស្បតិ៍ ២ ឧសភា ២០២៤

ដោយ

តារាសម្តែងដ៏សង្ហា សេង មង្គល បានទម្លាយឲ្យដឹងពីយុទ្ធសាស្ត្ររបស់សម្តេចតេជោ ហ៊ុន សែន សម្រាប់ការដឹកនាំក្រុមបាល់ទាត់តារាកម្ពុជាប្រកួតជាមួយក្រុមតារាគុនខ្មែរក្នុងព្រឹត្តិការណ៍«រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿង ញៀន និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា» កាលពីយប់ថ្ងៃទី១ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេង មង្គល បានរៀបរាប់ថា ៖«ក្រុមទាំងមូលពិតជាមានមហាកិត្តិយសខ្លាំងមែនទែនដែលសម្តេចតេជោចំណាយពេលវេលាដ៏មានតម្លៃធ្វើជាគ្រូបង្វឹកកិត្តិយសសម្រាប់ក្រុមបាល់ទាត់តារាកម្ពុជា។ សម្តេចតេជោបានផ្តល់អនុសាសន៍ច្រើនដល់ក្រុមបាល់ទាត់តារាកម្ពុជា។ សម្រាប់ការប្រកួតនេះ សម្តេចបានប្រាប់ក្រុមយើងឲ្យសម្រុកខ្លាំងនៅដើមវគ្គតែម្តងគឺ៥ទៅ៧នាទីដំបូងសម្រុករកគ្រាប់បាល់ឲ្យបាន។ សម្រុកឲ្យអស់ពីលទ្ធភាពដែលលេងតាមក្បួនសម្តេច ហើយទីបំផុតយើងទទួលបានលទ្ធផលល្អ»។

តារាសម្តែងរូបនេះបង្ហាញពីអារម្មណ៍ថា នេះជាកម្មវិធីប្រវត្តិសាស្ត្រដ៏អស្ចារ្យមួយដោយសារតែថ្នាក់ដឹកនាំអញ្ជើញចូលរួម ហើយមានប្រជាពលរដ្ឋចូលរួមច្រើន។ ក្នុងនាមលោកជាសមាជិកក្រុមបាល់ទាត់តារាកម្ពុជាពិតជាមានមហាកិត្តិយស និងរកបាន១គ្រាប់ក្នុងចំណោម២គ្រាប់ដែលក្រុមបាល់ទាត់តារាកម្ពុជាបានយកឈ្នះក្រុមកីឡាករគុនខ្មែរដោយលទ្ធផល ២-០។ លោកពិតជាចង់ឲ្យមានកម្មវិធីបែបនេះបន្តទៀត។

មុនឈានដល់ការប្រកួត ក្រុមបាល់ទាត់តារាកម្ពុជាព្រួយបារម្ភចាញ់កម្លាំងស៊ុហ្វក្រុមកីឡាករគុនខ្មែរ។ សេង មង្គល បានប្រាប់ថា ៖«យើងបានហ្វឹកហាត់ច្រើន ពីព្រោះយើងខ្លាចចាញ់កម្លាំងពួកគាត់។ ពួកគាត់សុទ្ធជាកីឡាករប្រដាល់ មានកម្លាំងខ្លាំងអាចរត់បានច្រើនគីឡូ។ ពួកខ្ញុំអាចនឹងចាញ់កម្លាំងស៊ុហ្វ ប៉ុន្តែក្រុមយើងបានហ្វឹកហាត់ត្រៀមកម្លាំងដើម្បីជួបពួកគាត់ ហើយក៏ទទួលបានលទ្ធផលល្អ»។

សម្រាប់ព្រឹត្តិការណ៍ប្រកួតបាល់ទាត់មិត្តភាពក្រោមមូលបទ«រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿងញៀន និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា»កាលពីយប់ថ្ងៃទី១ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិកដែលមានអ្នកទស្សនាផ្ទាល់ជាង៣ម៉ឺននាក់ទទួលបានថវិកាជាង៥លានដុល្លារសហរដ្ឋអាមេរិក៕