ព្រះខ័នរាជស្វាយរៀង ប៉ះ បឹងកេត ថ្ងៃស្អែកត្រូវការឈ្នះចាំបាច់

ក្រុមព្រះខ័នរាជស្វាយរៀងត្រូវជួបជាក្រុមបឹងកេត នៅកីឡដ្ឋានខេត្តស្វាយរៀង ថ្ងៃសៅរ៍ ទី៤ ខែឧសភា វេលាម៉ោង៦​ល្ងាច សម្រាប់​ការ​ប្រកួត​ជុំទី៤ ពានរង្វាន់ខេមបូឌានព្រីមៀរលីគ​​រដូវ​កាល​២០២៣-២៤។

ក្រុមម្ចាស់ផ្ទះព្រះខ័នរាជស្វាយរៀង ត្រូវបានពិន្ទុចាំបាច់ ដើម្បីដំណើរឆ្ពោះទៅការគ្រង​ជើងឯកលីគកំពូលកម្ពុជាក្នុងរដូវកាលនេះ បន្ទាប់ពីពួគេខកខានឈ្នះពានរង្វាន់នេះអស់រយៈពេល៥ឆ្នាំ។ ក្រោយ​ឈ្នះ​ជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៧ ឆ្នាំ២០២៣-២០២៤ (ថ្នាក់ជាតិ) ក្រុមព្រះខ័នរាជស្វាយរៀងកាន់តែទឹកចិត្តក្នុងប្រជែងយកពាន២ក្នុង១រដូវកាល។

ប្រវត្តិជួបគ្នារបស់ក្រុមទាំង២គឺពិតជាតានតឹងខ្លាំងណាស់ មិនថាការប្រកួតក្នុងលីគឬ​ពានរង្វាន់សម្តេចតេជោ​ ហ៊ុន សែន ទេ។ ជួបគ្នា១១លើកចុង​ក្រោយ​ ព្រះខ័នរាជស្វាយរៀងឈ្នះ៥លើក បឹងកេតឈ្នះ៣លើក និង​ស្មើគ្នា៣លើក។ ក្នុងរដូវកាលនេះ ទោះ​បឹងកេតអស់​ឱកាស​ប្រជែងពានលីគកំពូលកម្ពុជា ប៉ុ​ន្តែពួកគេនៅតែប្រឹងប្រែង​ឲ្យអស់ពីសមត្ថភាព ដើម្បី​យក​ឈ្នះព្រះខ័នរាជស្វាយរៀងជា​ថ្មី។

ស្ថិតិជួបគ្នា៥លើកក្នុងរដូវកាលនេះរបស់ក្រុមទាំង២៖

• បឹងកេត ១-៣ ព្រះខ័នរាជស្វាយរៀង (ការប្រកួតលីគ)
• ព្រះខ័នរាជស្វាយរៀង ៣-៣ បឹងកេត (ការប្រកួតលីគ)
• បឹងកេត ៣-៣ ព្រះខ័នរាជស្វាយរៀង (ការប្រកួតលីគ)
• បឹងតេត ១-៣ ព្រះខ័នរាជស្វាយរៀង (ការប្រកួតពានសម្ដេច)
• ព្រះខ័នរាជស្វាយរៀង ១-២ បឹងកេត (ការប្រកួតពានសម្ដេច)

ចាប់តាំងពីលោក ហុង ផេង ចូលកាន់តំណែងជាគ្រូបង្វឹក បឹងកេត​ពិតជាធ្វើបានយ៉ាងល្អ ហើយតែង​​តែ​បង្កភាពលំបាកដល់ព្រះខ័នរាជស្វាយរៀង ជាពិសេសេពួកគេធ្លាប់ឈ្នះក្រុមកំពូលតារាងនៅលីគកំពូល នៅកីឡដ្ឋានខេត្តស្វាយរៀងពេលជួបគ្នាក្នុងវគ្គពាក់កណ្ដាលផ្ដាច់ព្រ័ត្រពានរង្វាន់សម្តេចអគ្គមហាសេនាបតីតេជោ ហ៊ុន សែន ថ្នាក់ជាតិ៕

អត្ថបទ៖​ ផា រតនា