រិន ដេវីត ដាក់គោលដៅចេញក្រៅប្រទេសដើម្បីផ្សព្វផ្សាយគុនខ្មែរ

កីឡាករគុនខ្មែរ​ រិន ដេវីត​ ​ដែល​កំពុង​ទទួលបានការគាំទ្រយ៉ាងខ្លាំងពីសំណាក់មហាជន បាន​ដាក់​គោល​ដៅ​ចេញ​ប្រឡូក​នៅ​ក្រៅ​ប្រទេស​ដើម្បី​ផ្សព្វផ្សាយ​កីឡា​ប្រដាល់​គុន​ខ្មែរ​ឲ្យ​រីក​ចម្រើន។

កីឡាករវ័យ២១ឆ្នាំ រិន ដេវីត សម្រេច​បាន​សមិទ្ធផលជាច្រើនក្នុងអាជីព​របស់​ខ្លួន​​​ដោយ​កំពុងគ្រងខ្សែក្រវាត់ចំនួន៤​ខ្សែ​។ ជាពិសេសរូបគេក៏បានឈ្នះ​ខ្សែក្រវាត់១​ខ្សែ​នៅ​ប្រទេស​ម៉ាឡេស៊ី។ សមិទ្ធផលក្នុងជម្រើសជាតិ​ រូប​គេ​បាន​ឈ្នះ​មេដាយ​មាស​កីឡា​ស៊ីហ្គេម ឆ្នាំ​២០២៣ សម្រាប់​កីឡាឃីកបុកស៊ីង វិញ្ញាសា Light Contact ទម្ងន់​៦៣គីឡូក្រាម បន្ទាប់​ពី​យក​ឈ្នះ​កីឡាករ​ថៃ Karrakot Wijitnavee នៅ​វគ្គ​ផ្តាច់​ព្រ័ត្រ។

ទន្ទឹម​ជា​មួយ​នឹង​ទទួល​បាន​ជោគជ័យ​​គួរ​ឲ្យ​សរសើរ រិន ដេវីត បានដាក់គោលថ្មី​បន្ថែម​ទៀត​ ក្នុងការចេញទៅប្រកួតនៅក្រៅប្រទេសឲ្យបានច្រើន​ដើម្បី​បង្កើន​បទពិសោធថ្មី និង​ផ្សព្វផ្សាយគុនខ្មែរ​លើឆាកអន្តរជាតិ។

កីឡាករ រិន ដេវីត បានប្រាប់សារព័ត៌មាន​«កម្ពុជាថ្មី»ថា ៖«សម្រាប់ខ្ញុំចង់ចេញទៅប្រកួតនៅក្រៅស្រុកឲ្យបានច្រើន ព្រោះក្នុងស្រុកខ្ញុំប្រកួតដូចជាច្រើនហើយ។ ខ្ញុំចង់ទៅប្រកួតនៅក្រៅស្រុកដើម្បីផ្សព្វផ្សាយគុនខ្មែរឲ្យបរទេសបានស្គាល់»។ នៅ​ខែមិថុនាខាងមុខ កីឡាករ រិន ដេវីត នឹង​ធ្វើដំណើរទៅ​ប្រទេសអង់គ្លេស​​ដើម្បី​ប្រកួត​នៅ​ទី​នោះ។

បច្ចុប្បន្ន កីឡាករ រិន ដេវីត ​មាន​ខ្សែក្រវាត់រាជសីហ៍គុនខ្មែរ, ខ្សែក្រវាត់ ISKA, ខ្សែក្រវាត់អធិរាជគុនខ្មែរ ISI PALM-ISI PIPE, ខ្សែក្រវាត់ Ganzberg One Strike និងខ្សែក្រវាត់នៅ​ប្រទេសម៉ាឡេសុី៕​

អត្ថបទ៖ ផា រតនា