សមាគមអេកូឡូស៊ីបារាំង បដិសេធមិនទទួលយកភ្លើងគប់អូឡាំពិក ដោយមូលហេតុបរិស្ថាន

សមាគមអេកូឡូស៊ីបារាំង បានបដិសេធទទួលយកភ្លើងគប់កីឡា​អូឡាំពិកដោយសារវត្តមានរបស់អ្នកឧបត្ថម្ភផ្លូវការ Coca-Cola ដែលជាផលិតផលកំប៉ុង គឺស្ថិតក្នុងចំណោមសំរាម “ប្រមូល​បានច្រើនបំផុត” នៅពេលសម្អាតឆ្នេរសមុទ្រ។ នេះបើតាមសមាគមបានប្រកាសកាលពីថ្ងៃចន្ទ។

លោក Éric Akopian ស្ថាបនិកសមាគម ‘Clean my Calanques’ ដែលមានមូលដ្ឋាននៅទីក្រុង Marseille បានប្រាប់ AFP ថា ៖«យើងនឹងមិន​ទទួល​យកភ្លើងគប់ដែលឧបត្ថម្ភដោយអ្នកដែលធ្វើឱ្យយើងរវល់នោះទេ»។

អណ្តាតភ្លើងអូឡាំពិកនឹងមកដល់ទីក្រុងមេឌីទែរ៉ាណេភាគអាគ្នេយ៍នៃប្រទេសបារាំងនៅថ្ងៃទី៨ ខែឧសភា ដោយនាវាបូរាណ ‘Belem’ បន្ទាប់មកនឹងធ្វើដំណើរឆ្លងកាត់ប្រទេសរហូតដល់ពិធីបើក​ព្រឹត្តិការណ៍​កីឡា​អូឡាំពិក​នៅថ្ងៃទី២៦ ខែកក្កដា។

ត្រូវបានបង្កើតឡើងក្នុងឆ្នាំ២០១៧ សមាគម​សម្អាតឆ្នេរសមុទ្រនៅ Marseille និងក្នុងទឹកថ្លា​នៃឧទ្យានជាតិ Calanques ក៏ដូចជាសកម្មភាពការពារបរិស្ថាន និងលើកកម្ពស់ការយល់ដឹងផងដែរ។

នៅក្នុងវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម សមាគមបានពន្យល់ពីការសម្រេចចិត្តរបស់ខ្លួនដោយនិយាយថា ៖«មិនមែនជាការប្រឆាំងនឹងកីឡា ឬអត្តពលិកទេ” ប៉ុន្តែប្រឆាំងនឹងអ្វីគ្រប់យ៉ាងដែលនៅជុំវិញ​ដំណើរការរបស់ព្រឹត្តិការណ៍ដែលមានដូចជា “អ្នកឧបត្ថម្ភ” ជាដើម។ កូកា-កូឡា គឺជាក្រុមហ៊ុនមួយក្នុងចំណោម “ក្រុមហ៊ុនបំពុលបំផុតនៅលើពិភពលោក” ដែលជា “អ្នកផលិតផ្លាស្ទិកធំជាងគេ”។ នេះ​បើ​យោង​តាម លោក Akopian ដែលបានលើកឡើងពីបញ្ហាបរិស្ថាននៃវត្ថុអនុស្សាវរីយ៍អូឡាំពិកផងដែរ៕

ប្រែសម្រួល៖ មន្នីរ័ត្ន
ប្រភព៖ AFP