កីឡា

លោក Conor Nestor បង្ហាញពីផែនការក្រោយបន្តកិច្ចសន្យាជាមួយព្រះខ័នរាជស្វាយរៀង ដល់ឆ្នាំ២០២៣

បានផុស

៤ years មុន

នៅ

ថ្ងៃពុធ ២៤ កុម្ភៈ ២០២១

ដោយ

លោក Conor Nestor បានសម្រេចបន្តកិច្ចសន្យារបស់លោក ជាមួយក្រុមបាល់ទាត់ព្រះខ័នរាជស្វាយរៀង សមាជិកក្នុងលីគកំពូលកម្ពុជា (Metfone Cambodian League 2021) រហូតដល់ឆ្នាំ២០២៣ នៅថ្ងៃពុធ សប្ដាហ៍នេះ។ នេះបើតាមការបង្ហោះជាផ្លូវការនៅលើហ្វេសប៊ុករបស់ក្រុមព្រះខ័នរាជស្វាយរៀង។

បុរសសញ្ជាតិអៀរឡង់ រូបនេះបានលើកឡើងថា៖«ជាកិត្តិយសណាស់សម្រាប់ខ្ញុំដែលប្រធានក្លិបបានផ្ដល់ទំនុកចិត្ត និងសម្រេចបន្តកិច្ចសន្យានេះជាមួយខ្ញុំ ហើយនេះពិតជារីករាយដែលបានបន្តការងារនៅទីនេះ (ក្លិបបាល់ទាត់ព្រះខ័នរាជស្វាយរៀង) រហូតដល់ឆ្នាំ២០២៣ ខាងមុខ។ ខ្ញុំនឹងបន្តខិតខំប្រឹងប្រែងនិងធ្វើអ្វីគ្រប់យ៉ាងដែលយើងអាចធ្វើបានដើម្បីស្នាដៃជូនក្លិបទាំងមូល»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា៖«មូលហេតុចម្បងដែលខ្ញុំសម្រេចបន្តកិច្ចសន្យានៅទីនេះគឺខ្ញុំចូលចិត្តការងាររបស់ក្លិប និងថ្នាក់ដឹកនាំក្លិប។ ខ្ញុំធ្វើការងារជាមួយកីឡាករនិងក្រុមការងាររាល់ថ្ងៃ ហើយវាជាការងារឯករាជ្យមួយ។ ដូច្នេះពេលខ្ញុំដឹង ថាថ្នាក់ដឹកនាំចង់ឱ្យខ្ញុំស្នាក់នៅរយៈពេលយូរ បន្ទាប់មកខ្ញុំមិនចាំបាច់គិតវែងឆ្ងាយនោះទេ ខ្ញុំដឹងថានេះជាកន្លែងដែរខ្ញុំចង់ធ្វើ»។

លោកបានបង្ហាញពីគោលដៅក្រោយបន្តកិច្ចសន្យាថា៖«គោលដៅរបស់យើងគឺរកឱ្យបានជ័យជម្នះក្នុងប្រកួតដំបូងនៃពានរង្វាន់លីគកំពូលកម្ពុជា ឆ្នាំ២០២១ ជាមួយក្រុមអគ្គីសនីកម្ពុជា និងប្រកួតបន្តបន្ទាប់។ គំនិតរបស់ខ្ញុំការស្នាក់នៅទីនេះរហូតដល់ឆ្នាំ២០២៣ គឺមានច្រើនជាងនេះទៅទៀត។ ផែនការបន្ទាប់ទៀតក្រៅពីឈ្នះការប្រកួតបាល់ទាត់គឺយើងត្រូវខិតខំព្យាយាមវិវត្តន៍ខ្លួនទៅជាក្លិបបាល់ទាត់អាជីពមួយដែលផ្តល់ឱកាសពិសេសសម្រាប់យុវជនកម្ពុជា ទៅជាកីឡាករកម្រិតកំពូលក្នុងតំបន់អាស៊ីអាគ្នេយ៍។ ខ្ញុំពិតជារីករាយដែលអ្នករាល់គ្នា នៅក្នុងក្លិបកំពុងតែប្រឹងប្រែងឆ្ពោះទៅរកគោលដៅនេះ។ ខ្ញុំសង្ឃឹមថាខ្ញុំខិតខំធ្វើការងារដើម្បីក្លាយជាក្លិបល្អបំផុតមួយ និងយើងចង់ឈ្នះពានរង្វាន់ជាច្រើនសម្រាប់ក្លិប»។

លោក Conor Nestor សញ្ជាតិអៀរឡង់ វ័យ៣៧ឆ្នាំ កាន់អាជ្ញាប័ណ្ណគ្រូបង្វឹកកម្រិត UEFA A License បានចូលកាន់តំណែងកាលពីខែមករា ឆ្នាំ២០១៨ កន្លងទៅជំនួសលោក សំ វ៉ាន់ដេត។ គ្រូបង្វឹករូបនេះបានមកដល់កម្ពុជាកាលពីខែ តុលា ឆ្នាំ២០១៧ ដោយមានបទពិសោធន៍ជាច្រើនក្នុងនាមជាគ្រូបង្វឹកបូកនិងការដឹកនាំបណ្ដុះបណ្ដាលយុវជនថ្នាលនៅអៀរឡង់ខាងជើង, អង់គ្លេស, អាមេរិក និងអូស្ត្រាលី ជាដើម។

ឆ្នាំដំបូងជាមួយព្រះខ័នរាជស្វាយរៀង លោក Conor Nestor បានដឹកនាំក្រុមឈរលេខ៦ នៃពានរង្វាន់លីគកំពូលកម្ពុជា ឆ្នាំ២០១៨ និងធ្លាក់ចេញពីពានរង្វាន់សម្តេចតេជោ ត្រឹមវគ្គ៨ក្រុមចុងក្រោយ។ ចូលដល់ឆ្នាំ២០១៩ លោកបានដឹកនាំក្រុមឈ្នះជើងឯកពានរង្វាន់លីគកំពូលកម្ពុជា និងជាជើងឯករងក្នុងពានរង្វាន់សម្តេចតេជោ។ នៅឆ្នាំ២០២០ លោកបានដឹកនាំក្រុមឈ្នះជើងឯករងក្នុងលីគកំពូលកម្ពុជា ធ្លាក់ចេញពីពានរង្វាន់សម្តេចតេជោ នៅវគ្គ៨ក្រុមចុងក្រោយ។ ចំណែកបេសកម្មរបស់លោក ក្នុងពានរង្វាន់កម្រិតទ្វីបអាស៊ីAFC Cup 2020 ត្រូវឆាចោលព្រោះស្ថានភាពជំងឺកូវីដ១៩ អុកឡុក៕

អត្ថបទ៖ ម៉េង ហួរ

សូមចុចអាន៖ Hun Sen Cup ៖ ៤គូបន្តប្រកួតនៅថ្ងៃនេះ ខណៈ៥គូម្សិលមិញបំប៉ោងសំណាញ់ទីរហូតដល់២៦គ្រាប់