កីឡា

លោក Muñoz ប្រាប់ថា នឹងមានដំណឹងពីអ្នកចាំទី វីរៈ ដារ៉ា ឆាប់ៗ

បានផុស

៨ ខែ មុន

នៅ

ថ្ងៃចន្ទ ១៣ ឧសភា ២០២៤

ដោយ

អ្នកចាំទីឆ្នើម វីរៈ ដារ៉ា បានរួមចំណែកយ៉ាងសំខាន់ជួយឲ្យក្លិបព្រះខ័នរាជស្វាយរៀងឈ្នះពានរង្វាន់ធំ២ក្នុងមួយរដូវកាល បន្ទាប់ពីរូបគេត្រូវបានក្លិបដែលមានមូលដ្ឋាននៅខេត្តស្វាយរៀងខ្ចីជើងកាលពីដើមរដូវកាលមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលរដូវកាល២០២៣-២៤បញ្ចប់ កុងត្រាខ្ចីជើង វីរៈ ដារ៉ា ពីក្លិបវិសាខាក៏ត្រូវបានបញ្ចប់ដែរ ប៉ុន្តែរូបគេបានក្លាយជាអ្នកចាំទីដែលក្លិប និងអ្នកគាំទ្រចង់បាន។ ពាក់ព័ន្ធនឹងរឿងនេះ លោក Josep Muñoz គ្រូបង្វឹកព្រះខ័នរាជស្វាយរៀងបានប្រាប់ខ្លីថា ៖«យើងចង់បានអ្នកចាំទី វីរៈ ដារ៉ា បន្តនៅជាមួយព្រះខ័នរាជស្វាយរៀងទៀត ប៉ុន្តែដំណឹងយ៉ាងណានោះរង់ចាំមើលគឺនឹងមានដំណឹងឆាប់ៗពីរូបគេ»។

វីរៈ ដារ៉ា ដែលមានដើមកំណើតនៅខេត្តបាត់ដំបងបានហ្វឹកហាត់បាល់ទាត់ជាផ្លូវការនៅស្តាតចាស់ក្នុងរាជធានីភ្នំពេញកាលពីឆ្នាំ២០១៥។ បន្ទាប់មករូបគេបានចូលរួមជាមួយក្លិបបាល់ទាត់ខេត្តព្រៃវែងនៅឆ្នាំ២០២០ជាពេលដែលរូបគេបានជួយឲ្យក្លិបខេត្តនេះបានឈ្នះជើងឯកពានរង្វាន់សម្តេចតេជោ ហ៊ុន សែន លើកទី១៤ ថ្នាក់ខេត្ត។ ពេលនោះរូបគេបានឈ្នះស្រោមដៃមាសថ្នាក់ខេត្ត។

នៅចុងឆ្នាំ២០២០ វីរៈ ដារ៉ា បានចូលរួមជាមួយក្លិបវិសាខា ដែលបានឈ្នះពានរង្វាន់សម្តេចតេជោ ហ៊ុន សែន នៅឆ្នាំ២០២១ និង២០២២ មុនពេលត្រូវបានព្រះខ័នរាជស្វាយរៀងខ្ចី។ ទៅដល់ក្លិបដែលមានមូលដ្ឋាននៅខេត្តស្វាយរៀង រូបគេបានឈ្នះជើងឯកពានរង្វាន់សម្តេចតេជោ ហ៊ុន សែន លើកទី១៧ និងឈ្នះពានរង្វាន់ខេមបូឌានព្រីមៀរលីករដូវកាល២០២៣-២៤ ព្រមទាំងបានឈ្នះពានរង្វាន់អ្នកចាំទីឆ្នើម៕