កីឡា

Nick Taylor បញ្ជាក់រឿងក្លិបថៃចង់បានរូបគេរដូវកាលក្រោយ

បានផុស

៩ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

ប៉ុន្មានថ្ងៃកន្លងទៅនេះ មានព័ត៌មានពីក្លិបបាល់ទាត់របស់លីគបាល់ទាត់កំពូលថៃចង់បានតារាបាល់ទាត់ Nick Taylor សម្រាប់រដូវកាលក្រោយ បន្ទាប់ពីរូបគេជួយឲ្យព្រះខ័នរាជស្វាយរៀងបានឈ្នះពានរង្វាន់២ក្នុង១រដូវកាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» ខ្សែបម្រើស្លាបកម្ពស់១.៧៨ម៉ែត្រ បាននិយាយថា ៖«ខ្ញុំគ្រាន់តែអាចនិយាយបានថា រង់ចាំមើលអ្វីនឹងកើតឡើង ប៉ុន្តែឥឡូវនេះខ្ញុំនៅទីនេះជាមួយព្រះខ័នរាជស្វាយរៀង។ ខ្ញុំកំពុងរីករាយក្នុងអបអរសាទរជាមួយក្រុមសម្រាប់ការឈ្នះពានរង្វាន់២។ យើងបន្តអបអរជាមួយគ្នា ហើយមានអ្វីកើតឡើងនៅរដូវកាលក្រោយ រង់ចាំមើលទាំងអស់គ្នា»។

ពាក់ព័ន្ធនឹងភាពខ្លាំងរបស់ក្រុមព្រះខ័នរាជស្វាយរៀងដែលបានឈ្នះជើងឯក២ក្នុងមួយរដូវកាល Nick Taylor បានរៀបរាប់ថា ភាពខ្លាំងរបស់ព្រះខ័នរាជស្វាយរៀងមិនមានតែសកម្មភាពលេងនៅលើទីលាននោះទេ ប៉ុន្តែស្មារតី និងឆន្ទៈក្រុមគឺជាមូលដ្ឋានគ្រឹះសំខាន់។

កីឡាករខ្មែរ-អាមេរិកបាននិយាយថា ៖«សមិទ្ធផលទាំងអស់នេះគឺកើតចេញពីឆន្ទៈរបស់ក្រុមយើង។ ស្មារតីក្រុមដើម្បីទទួលបានជ័យជម្នះ ដើម្បីប្រយុទ្ធនៅលើទីលាន។ មិនថាយើងឈ្នះការប្រកួត ឬចាញ់ការប្រកួត ឬក៏លេងមិនបានល្អនោះទេ ប៉ុន្តែស្មារតីក្រុមរបស់យើងនៅតែមានភាពវិជ្ជមាន កែលំអ ព្យាយាមធ្វើឲ្យប្រសើរជាលំដាប់។ ទាំងអស់នេះហើយជាមូលដ្ឋានគ្រឹះសម្រាប់ជោគជ័យដ៏ធំធេងក្នុងរដូវកាលនេះ ពីព្រោះគ្រប់ក្លិបទាំងអស់សុទ្ធតែជួបការលំបាក ប៉ុន្តែនៅពេលជួបការលំបាក ឆន្ទៈ ស្មារតីរបស់យើងនៅតែមាន ដូច្នេះអ្វីៗអាចទៅរួច»។

រហូតដល់ពេលនេះ ក្លិបព្រះខ័នរាជស្វាយរៀងមិនទាន់ប្រកាសជាផ្លូវការណាមួយពាក់ព័ន្ធនឹងកីឡាករ Nick Taylor ទេ ប៉ុន្តែរូបគេជាកីឡាករដ៏សំខាន់មិនអាចខ្វះបានសម្រាប់ក្រុមនាពេលបច្ចុប្បន្ន។ ជាពិសេសពួកគេកំពុងត្រៀមខ្លួនសម្រាប់ការប្រកួតជម្រុះពានរង្វាន់អន្តរជាតិ២ផ្សេងគ្នានាពេលដ៏ខ្លីខាងមុខ៕