កីឡា

ភ្នំពេញពាក់កណ្ដាលម៉ារ៉ាតុងអន្តរជាតិ ផ្ដោតសំខាន់លើសុវត្ថិភាពអ្នកចូលរួម

បានផុស

១១ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លើកទី១២ នឹងប្រព្រឹត្តទៅនៅថ្ងៃអាទិត្យ ទី១៦ ខែមិថុនា ឆ្នាំ២០២៤ ដើម្បីអបអរសាទរដល់ព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មានទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លោក វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា ព្រមទាំងជាអគ្គលេខាធិការ គណៈកម្មាធិការជាតិអូឡាំពិកកម្ពុជា បានលើកឡើងអំពីការយកចិត្តទុកជាពិសេស ចំពោះអ្នកចូលរួមក្នុងព្រឹត្តិការណ៍ម៉ារ៉ាតុងដ៏សំខាន់នេះ ដោយផ្តោតលើសុវត្ថិភាព និងសុខភាព ដើម្បីធានាឲ្យអ្នកចូលរួមមានអារម្មណ៍កក់ក្ដៅក្នុងការរត់។ គណៈកម្មាធិការជាតិអូឡាំពិកកម្ពុជា បានធ្វើការយ៉ាងជិតស្និទ្ធជាមួយសាលារាជធានីភ្នំពេញ និងដៃគូសហការ ដើម្បីពង្រឹងបន្ថែមពាក់ព័ន្ធនឹងសុវត្ថិភាពចរាចរណ៍ និងសុខភាព។ ជាពិសេសការសម្រួលចរាចរណ៍ និងការរៀបចំសណ្ដាប់ធ្នាប់ក្នុងព្រឹត្តិការណ៍ឲ្យល្អប្រសើរ។

លោក វ៉ាត់ ចំរើន បាននិយាយថា ៖«ចរាចរណ៍នៅក្នុងរាជធានីភ្នំពេញ យើងដឹងហើយថាមានភាពមមាញឹក ការបិទផ្លូវត្រូវមានការយកចិត្តទុកដាក់មែនទែន។ យើងត្រូវគោរពតាមគោលការណ៍សាលារាជធានីភ្នំពេញ។ ជាពិសេសខាងនគរបាលចរចារណ៍ និងអាជ្ញាធរនៅតាមផ្លូវ។ សម្រាប់ឆ្នាំនេះយើងទទួលបានការគាំទ្រពីសាលារាជធានីភ្នំពេញ បានដាក់ឲ្យខណ្ឌដែលពាក់ព័ន្ធផ្លូវរត់នេះគឺធ្វើការយ៉ាងជិតស្និទ្ធជាមួយក្រុមការងារពាក់ព័ន្ធទាំងអស់»។

លោកបានសង្កត់ធ្ងន់ថា ៖«រឿងសំខាន់៣ ដែលចាំបាច់បំផុតគឺរឿងចរាចរណ៍, រឿងទឹកដាក់ឲ្យគេហូបតាមដំណាក់កាល, រឿងក្រុមគ្រូពេទ្យ និងរថយន្តសង្គ្រោះតាមគោលដៅ។ យើងត្រូវផ្ដោតសំខាន់ ដើម្បីឲ្យអ្នករត់មានអារម្មណ៍ថាសុវត្ថិភាព»។

ព្រឹត្តិការណ៍រត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លើកទី១២ ឆ្នាំនេះបានផ្លាស់ប្តូរម៉ោងរត់ក្នុងគោលបំណងយកចិត្តទុកដាក់ពីសុខភាពរបស់អ្នកចូលរួមរត់ជាចម្បង ដោយស្ថានភាពអាកាសធាតុនាពេលបច្ចុប្បន្នក្តៅ បើប្រៀបធៀបនឹងឆ្នាំមុនៗ ហើយក៏ដូចជាជួយសម្រួលដល់បញ្ហាចរាចរណ៍ខ្លះដើម្បីកាត់បន្ថយការកកស្ទះ។

វិញ្ញាសា រត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លើកទី១២
-ការរត់ចម្ងាយ២១គីឡូម៉ែត្រ ចេញដំណើរម៉ោង ៥:១០ ព្រឹក
-ការរត់ចម្ងាយ១០គីឡូម៉ែត្រ ចេញដំណើេម៉ោង ៥:៤៥ ព្រឹក
-ការរត់ចម្ងាយ៥គីឡូម៉ែត្រ ចេញដំណើរម៉ោង ៦:០០ ព្រឹក
-ការរត់ចម្ងាយ២គីឡូម៉ែត្រ ចេញដំណើរម៉ោង ៦:១០ ព្រឹក