កីឡា

អ្នកលេងគុនខ្មែរត្រៀមជិះយន្តហោះទៅសាងកេរ្តិ៍ឈ្មោះជិត១០ប្រទេសទៀត

បានផុស

១០ ខែ មុន

នៅ

ថ្ងៃចន្ទ ២៧ ឧសភា ២០២៤

ដោយ

សហព័ន្ធកីឡាប្រដាល់គុនខ្មែរនឹងបញ្ជូនកីឡាករ កីឡាការិនីទៅប្រកួតជាច្រើនប្រទេសក្នុងរយៈពេលប៉ុន្មានខែខាងមុខដើម្បីសាងកេរ្តិ៍ឈ្មោះ និងពង្រីកសក្តានុពលគុនខ្មែរឲ្យកាន់តែទូលំទូលាយទូទាំងពិភពលោក។

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានឲ្យដឹងក្នុងបទសម្ភាសថា គ្រាន់តែព័ត៌មានច្បាស់លាស់គឺមានប្រហែលជា៨ប្រទេសហើយដែលសហព័ន្ធនឹងបញ្ជូនកីឡាករ កីឡាការិនីគុនខ្មែរទៅប្រកួត។ ប្រទេសខ្លះបានដឹងពីចំនួនកីឡាករ កីឡាការិនីដែលត្រូវទៅប្រកួត ហើយប្រទេសខ្លះកំពុងពិភាក្សាគ្នាលំអិតបន្ថែមទៀត។ ជាបឋមមានប្រទេសបារាំង ទីក្រុងហុងកុង អង់គ្លេស កូរ៉េខាងត្បូង សហរដ្ឋងាមេរិក អូស្ត្រាលី ក្រិក និងព័រទុយហ្គាល់ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ បានលើកឡើងថា ៖«ផែនការមួយចំនួនចេញជារូបរាងហើយ ហើយមួយចំនួនទៀតមិនទាន់ចេញជារូបរាងទេ។ យើងកំពុងបន្តធ្វើកិច្ចការទាំងនេះបន្ថែមទៀត ដោយសារកីឡាករ កីឡាការិនីយើងរវល់ច្រើនសម្រាប់កម្មវិធីក្នុងស្រុក។ កម្មវិធីខ្លះយើងកំពុងពិភាក្សាថាតើធ្វើទៅរួចអត់ បើអត់យើងអាចលើកទៅឆ្នាំក្រោយ»។

«ឥឡូវនេះ កម្មវិធីជាក់លាក់គឺយើងទៅប្រកួតពីរកម្មវិធីនៅប្រទេសបារាំងក្នុងខែមិថុនា។ នៅខែកក្កដា យើងចេញទៅទីក្រុងហុងកុង និងប្រទេសអង់គ្លេស។ នៅខែសីហា យើងត្រៀមចេញទៅប្រទេសកូរ៉េខាងត្បូងដែលយើងនឹងរៀបចំព្រឹត្តិការណ៍ធំតែម្តងដើម្បីផ្តល់ជូនដល់ពលករខ្មែរយើងនៅទីនោះ។ យើងកំពុងភាក្សាជាមួយភាគីកូរ៉េហើយពីសមាសភាពកីឡាករជាដើម»។

«នៅខែកញ្ញា យើងនឹងមានកម្មវិធីនៅប្រទេសអូស្ត្រាលី ហើយខែតុលានៅប្រទេសក្រិក។ នៅប្រទេសក្រិកគឺជាព្រឹត្តិការណ៍ធំមួយដែរ។ យើងកំពុងសហការជាមួយសហព័ន្ធក្បាច់គុននៅក្រិក។ យើងនឹងមានកម្មវិធីធំដែលមានខ្សែក្រវាត់គុនខ្មែរអន្តរជាតិនៅក្រិក ក្នុងនោះយើងមានកីឡាករខ្មែរ៦រូប និងកីឡាការិនីខ្មែរ២រូប ជាមួយនឹងកីឡាករ កីឡាការិនីរបស់ក្រិកតែម្តង។ យើងដឹងហើយថា ក្រិកជាប្រទេសដែលមានក្បាច់គុនតាំងពីសម័យបុរាណគឺជាម្ចាស់ក្បាច់គុនអូឡាំពិក»។ លោកបានបញ្ជាក់ និងបន្ថែមថា នៅមានប្រទេសជាច្រើនទៀតដែលកំពុងពិភាក្សា។

នៅថ្ងៃទី២ ខែមិថុនា ឆ្នាំ២០២៤ កីឡាករ កីឡាការិនីជាច្រើនរូបត្រូវប្រកួតនៅប្រទេសបារាំង និងបន្តប្រកួតនៅថ្ងៃទី២៧ ខែមិថុនា នៅទីនោះថែមទៀត។ កីឡាករ២រូបក្នុងនោះមាន រិន ដេវីត ទៅប្រកួតនៅប្រទេសអង់គ្លេសនាខែកក្កដា ហើយកីឡាករ សុខ ធី និង ឈឿង ល្វៃ ត្រូវទៅប្រកួតនៅទីក្រុងហុង ក្នុងខែកក្កដា។

តាមរយៈកម្មវិធីប្រកួតក្នុងស្រុកជាច្រើន ហើយក្រៅប្រទេសក៏មានច្រើនថែមទៀត ដូច្នេះកីឡាករ កីឡាការិនីកម្ពុជាកាន់តែរវល់ខ្លាំងមែនទែន ពីព្រោះអ្នកលេងគុនខ្មែរលំដាប់ជួរមុខរបស់កម្ពុជាមិនសូវមានច្រើនទេ។

បន្ទាប់ពីជោគជ័យក្នុងកីឡាស៊ីហ្គេម លើកទី៣២ ឆ្នាំ២០២៣ ក៏ដូចជាលេចធ្លោខ្លាំងក្នុងការប្រកួតក្នុងស្រុក កីឡាអត្តសញ្ញាណជាតិ«គុនខ្មែរ»កាន់តែបោះជំហានខ្លាំងទៅលើឆាកអន្តរជាតិ ស្របពេលផែនការរបស់គណៈកម្មាធិការជាតិអូឡាំពិកកម្ពុជាបានដាក់គោលដៅចូលកីឡាអូឡាំពិកនៅឆ្នាំ២០៣៨៕