កីឡា

ល្ងាចនេះ ក្រុមនារីជប៉ុន ប៉ះ ប្រេស៊ីល ជើងឯកបាល់ទះនារីពិភពលោក

បានផុស

៧ ខែ មុន

នៅ

ថ្ងៃអង្គារ ២៨ ឧសភា ២០២៤

ដោយ

ការប្រកួតបាល់ទះនារីជើងឯកពិភពលោក FIVB Volleyball Women’s Nation League វគ្គវិលជុំសន្សំពិន្ទុ សប្ដាហ៍ទី២ ចាប់ផ្តើមនៅថ្ងៃអង្គារ ទី២៨ ខែឧសភានេះហើយដោយមានការប្រកួតពីរគូ ក្នុងនោះក្រុមនារីខ្លាំងជប៉ុន ប៉ះ ប្រេស៊ីល ជាគូគួរឲ្យចាប់អារម្មណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទះនារីជប៉ុន ប៉ះ ក្រុមបាល់ទះនារីប្រេស៊ីល វេលាម៉ោង៦:៣០នាទីយប់នេះ។ ក្រោយបញ្ចប់ការប្រកួតក្នុងសប្ដាហ៍ទី១ ក្រុមបាល់ទះនារីប្រេស៊ីលពិតជាធ្វើបានល្អ ក្រោយឆ្លងកាត់ការប្រកួត៤លើក គឺទទួលបានជ័យជម្នះទាំង៤លើក មាន១២ពិន្ទុឈរនៅលេខ២ក្នុងតារាងពិន្ទុ។

លទ្ធផលប្រកួត៤លើករបស់ក្រុមបាល់ទះនារីប្រេស៊ីល

ក្រុមប្រេស៊ីល ៣-១ ក្រុមកាណាដា
ក្រុមប្រេស៊ីល ៣-០ ក្រុមកូរ៉េខាងត្បូង
ក្រុមប្រេស៊ីល ៣-១ ក្រុមសហរដ្ឋអាមេរិក
ក្រុមប្រេស៊ីល ៣-០ ក្រុមស៊ែប៊ី

ក្រឡែកមកមើលក្រុមបាល់ទះនារីជប៉ុន កំពុងឈរលេខ៦ក្នុងតារាងពិន្ទុ ក្រោយប្រកួត៤លើក ឈ្នះ៣ ចាញ់១ មាន៩ពិន្ទុ។ ក្រុមជប៉ុនត្រូវការពិន្ទុក្នុងការប្រកួតនេះ ដើម្បីស្វែងរកកៅអីឡើងទៅវគ្គ៨ក្រុមចុងក្រោយ ទោះបីបច្ចុប្បន្នកំពុងឈរនៅលេខ៦បណ្ដោះអាសន្ន ប៉ុន្តែពួកគេមិនទាន់មានសុវត្ថិភាពឡើយ។

លទ្ធផលប្រកួត៤លើករបស់ក្រុមបាល់ទះនារីជប៉ុន

ក្រុមជប៉ុន ៣-២ ក្រុមតួកគី
ក្រុមជប៉ុន ៣-០ ក្រុមប៊ុលហ្គារី
ក្រុមជប៉ុន ៣-០ ក្រុមអាល្លឺម៉ង់
ក្រុមជប៉ុន ០-៣ ក្រុមប៉ូឡូញ

សម្រាប់ការប្រកួតនេះជាការប្រកួតដ៏ជក់ចិត្តដោយក្រុមខ្លាំងក្នុងទ្វីបអាស៊ីត្រូវជួបជាក្រុមខ្លាំងទ្វីបអាមេរិកខាងត្បូង ដូច្នេះសូមរង់ចាំមើលថាតើ ក្រុមមួយណានឹងទទួលបានជ័យជម្នះ ខណៈការប្រកួត១គូទៀតគឺជាជំនួបរវាងក្រុមម្ចាស់ផ្ទះថៃ និងក្រុមសាធារណរដ្ឋដូមីនីកែន នាវេលាម៉ោង៣រសៀល៕

អត្ថបទ៖ ផា រតនា