កីឡា

ខ្សែក្រវាត់ K-1 World Max ខ្វះបេក្ខភាព១រូប ខណៈកំពុងល្បីតារាគុនខ្មែរទៅជប៉ុន

បានផុស

១០ ខែ មុន

នៅ

ថ្ងៃពុធ ២៩ ឧសភា ២០២៤

ដោយ

ព្រឹត្តិការណ៍ប្រកួតដណ្តើមខ្សែក្រវាត់ឃីកបុកស៊ីងពិភពលោក K-1 World Max 2024 – World Championship នឹងធ្វើនៅថ្ងៃទី៧ ខែកក្កដា ឆ្នាំ២០២៤ នៅទីក្រុងតូក្យូ ប្រទេសជប៉ុន ដែលប្រជុំដោយជើងខ្លាំងមក៨ប្រទេសផ្សេងគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាប័នប្រដាល់ឃីកបុកស៊ីងពិភពលោក K-1 បានបង្ហាញបេក្ខភាព៧រូបរួចហើយសម្រាប់ឱកាសប្រកួតដ៏អស្ចារ្យនេះ។

កីឡាករ Zhora Akopyan សញ្ជាតិបេឡារុស្ស-អាមេនី មានកម្ពស់១.៧៩ម៉ែត្រ ធ្លាប់ប្រកួតឃីកបុកស៊ីងបាន៣២លើក គឺឈ្នះ២៩លើក និងចាញ់៣លើក។ រូបគេធ្លាប់ឈ្នះខ្សែក្រវាត់៤ខ្សែគឺ Tatneft Cup Lightweight ឆ្នាំ២០១៩, FEA WGP Lightweight ឆ្នាំ២០១៩, Fair Fight Welterweight ឆ្នាំ២០២១ និងខ្សែក្រវាត់ MFC Lightweight ឆ្នាំ២០២២។
កីឡាករ Kacper Muszyński សញ្ជាតិប៉ូឡូញ អាយុ២៦ឆ្នាំ កម្ពស់១.៧៨ម៉ែត្រ ធ្លាប់ប្រកួតឃីកបុកស៊ីង២៥លើក គឺឈ្នះ២៣លើក ស្មើ១លើក និងចាញ់១លើក។ រូបគេធ្លាប់ឈ្នះខ្សែក្រវាត់ច្រើនក្នុងការប្រកួតស្ម័គ្រចិត្ត ប៉ុន្តែពេលវ៉ៃអាជីពបានឈ្នះខ្សែក្រវាត់ MFC Lightweight ឆ្នាំ២០១៩ និង Iron Fight Lightweight ឆ្នាំ២០២៤។
កីឡាករ Ouyang Feng សញ្ជាតិចិន អាយុ២៦ឆ្នាំ កម្ពស់១.៨១ម៉ែត្រ ធ្លាប់ប្រកួតឃីកបុកស៊ីងបាន៤២លើកគឺ ឈ្នះ៣៨លើក ចាញ់៣លើក និងមិនប្រកាសលទ្ធផល១លើក។ រូបគេជាម្ចាស់ខ្សែក្រវាត់ឃីកបុកស៊ីងអាជីព៤ខ្សែគឺ K-1 Super Welterweight ឆ្នាំ២០២៣, Wu Lin Feng ឆ្នាំ២០២០, Wu Ling Feng ឆ្នាំ២០២៣ និងខ្សែក្រវាត់ IPCC China ឆ្នាំ២០២៣។
កីឡាករ Romano Bakboord សញ្ជាតិស៊ូរីណាម
កីឡាករ Viktor Akimov សញ្ជាតិរុស្ស៊ី
កីឡាករ Darryl Verdonk សញ្ជាតិហុល្លង់
កីឡាករ Dengue Silva សញ្ជាតិប្រេស៊ីល
បេក្ខភាពទី៨ ជានរណា?

បេក្ខភាព៧រូបត្រូវបានបង្ហាញ ប៉ុន្តែនៅសល់១រូបទៀតមិនទាន់ចេញជាផ្លូវការទេ។ អ្នកខ្លះបានលើកឡើងថា បេក្ខភាព១រូបទៀតនោះគឺជាកំពូលអ្នកប្រដាល់ចាស់វស្សាថៃ Buakaw ប៉ុន្តែអ្នកខ្លះក៏បានលើកឡើងថា មិនមែន Buakaw ទេ។ ស្របពេលជាមួយគ្នានេះ ស្ថាប័ន K-1 ក៏មិនទាន់បានប្រកាសពីបេក្ខភាពចុងក្រោយដែរ។

អ្វីដែលគួរឲ្យចាប់អារម្មណ៍មួយទៀតនោះគឺប៉ុន្មានថ្ងៃចុងក្រោយនេះមានព័ត៌មានលេចឮថា កីឡាករគុនខ្មែរមួយរូបនឹងទៅប្រកួតដណ្តើមខ្សែក្រវាត់ឃីកបុកស៊ីងនៅដើមខែកក្កដា ឆ្នាំ២០២៤ នៅប្រទេសជប៉ុន ស្របពេលនឹងខ្សែក្រវាត់ K-1 World Max 2024 រៀបចំនៅដើមខែកក្កដា ដែរ ហើយក៏កំពុងខ្វះបេក្ខភាព១រូប។

សម្រាប់ខ្សែក្រវាត់ K-1 World Max 2024 គឺទម្ងន់៧០គីឡូក្រាម ដូច្នេះមានកីឡាករគុនខ្មែរមិនច្រើនទេសម្រាប់ការប្រកួតក្នុងប្រភេទទម្ងន់នេះ។ កីឡាករគុនខ្មែរ៣រូបមានទម្ងន់អាចចូលរួមប្រកួតក្នុងខ្សែក្រវាត់នេះគឺ ធឿន ធារ៉ា, រឿង សុភ័ណ្ឌ និង ឡៅ ចន្ទ្រា។ ជាទូទៅ ធឿន ធារ៉ា វ៉ៃទម្ងន់៧២គីឡូក្រាម ហើយ ឡៅ ចន្ទ្រា វ៉ៃទម្ងន់៧២គីឡូក្រាមឡើង ខណៈ រឿង សុភ័ណ្ឌ វ៉ៃទម្ងន់ក្រោម៧០គីឡូក្រាម។

កីឡាករគុនខ្មែរទាំង៣រូបនេះក៏មិនទាន់មានដំណឹងចេញក្រៅប្រទេស ឬប្រកួតក្នុងកម្មវិធីធំដែរនាខែកក្កដា។ ស្របពេល ឈឿង ល្វៃ ដែលវ៉ៃទម្ងន់៧២គីឡូក្រាមមិនអាចទេ ដោយសារជាប់ប្រកួតនៅបារាំង និងហុងកុងនាខែមិថុនាខាងមុខនេះ។

កីឡាករគុនខ្មែរដែលស័ក្តិសមចូលរួមប្រកួតបំផុតគឺ ធឿន ធារ៉ា ដែលមានលក្ខណៈសម្បត្តិល្អឥតខ្ចោះទាំងកាយសម្បទា បច្ចេកទេស កម្លាំងស៊ុហ្វ បទពិសោធ និងកេរ្តិ៍ឈ្មោះ។ ជាពិសេសទើបតែជាប់ឈ្មោះក្នុងទស្សនាវដ្តី Forbes ដូច្នេះស្ថាប័ន K-1 អាចនឹងយក ប្រសិនបើមានអ្នករៀបចំត្រឹមត្រូវ។

សូមបញ្ជាក់ថា រូបមន្តនៃការប្រកួតខ្សែក្រវាត់ K-1 World Max 2024 គឺធ្វើឡើងតែមួយរាត្រីប៉ុណ្ណោះ។ ការប្រកួតជុំទី១គឺ៨រូបដំបូង។ បន្ទាប់មក អ្នកឈ្នះឡើងទៅវគ្គ៤រូបចុងក្រោយ (វគ្គពាក់កណ្តាលផ្តាច់ព្រ័ត្រ) ហើយអ្នកឈ្នះឡើងទៅវគ្គផ្តាច់ព្រ័ត្រដើម្បីដណ្តើមជើងឯក។ រូបមន្តនេះ ធឿន ធារ៉ា ធ្វើបានជោគជ័យនៅពេលរូបគេប្រកួតខ្សែក្រវាត់គុនខ្មែរពិភពលោក 8 Men Tournament ដែលមានរង្វាន់រថយន្ត១គ្រឿង៕