កីឡដ្ឋាន៥ រៀបចំប្រកួតវគ្គផ្ដាច់ព្រ័ត្រ EURO រយៈពេល២០ឆ្នាំចុងក្រោយ

ក្នុង​រយៈ​ពេល​២០ឆ្នាំចុងក្រោយនេះ​មាន​តែ​កីឡដ្ឋាន​ចំនួន​៥​​បាន​រៀបចំ​ការ​ប្រកួត​វគ្គ​ផ្តាច់​ព្រ័ត្រ ជើង​ឯក​ទ្វីប​អឺរ៉ុប UEFA EURO ​បាន​យ៉ាងល្អ ដើម្បីបញ្ជាក់ពីសមត្ថភាពរបស់ប្រទេស​ជាម្ចាស់ផ្ទះ។ ខាងក្រោមនេះជាកីឡដ្ឋានទាំង៥ រៀបចំការប្រកួតវគ្គផ្ដាច់ព្រ័ត្រ EURO ក្នុងរយៈពេល២០ឆ្នាំចុងក្រោយ៖

១. កីឡដ្ឋាន Wembley

ជើង​ឯក​អឺរ៉ូ​ UEFA EURO ឆ្នាំ២០២០ ​លើកមកធ្វើនៅឆ្នាំ២០២១ ដោយសារ​វិបត្តិ​ជំងឺ​កូវីដ នៅ​ពេល​អង់គ្លេស​ជាម្ចាស់ផ្ទះ។ ការប្រកួតវគ្គផ្ដាច់ព្រ័ត្រ ថ្ងៃទី១១ ខែកក្ដដា ក្រុម​ម្ចាស់​ផ្ទះ​អង់គ្លេស​បាន​ឡើង​ដល់​វគ្គ​ផ្តាច់​ព្រ័ត្រ អុីតាលី នៅ​សមរភូមិ​បៃតង​ Wembley ​ដែលជាកីឡដ្ឋានធំជាងគេប្រចាំប្រទេសអង់គ្លេស អាចផ្ទុកអ្នកគាំទ្របានចំនួន៩​ម៉ឺន​នាក់។ សម្រាប់អ្នកចូលទស្សនាការប្រកួតវគ្គផ្ដាច់ព្រ័ត្រ​ពេល​នោះ​ជាង​៦​ម៉ឺន​នាក់។ កីឡដ្ឋាន Wembley ​ចាប់​ផ្តើម​សាងសង់​​នៅ​ឆ្នាំ២០០៣ និងបើក​ដំណើរការ ឆ្នាំ២០០៧។

២. កីឡដ្ឋាន Stade de France

ព្រឹត្ដិការណ៍ UEFA EURO ឆ្នាំ២០១៦ ប្រទេសបារាំង​ជាម្ចាស់ផ្ទះ។​ Stade de France ជាកីឡដ្ឋានធំជាងគេក្នុងប្រទេសបារាំង ត្រូវបានជ្រើស​​​រើស​រៀបចំការប្រកួតវគ្គផ្ដាច់ព្រ័ត្រក្នុងជំនួបរវាងក្រុមបារាំងជួបជាមួយក្រុមព័រទុយហ្គាល់ ​នៅ​ថ្ងៃទី១០ ខែកក្ដដា ឆ្នាំ២០១៦ ដែលមានអ្នកចូលទស្សនាផ្ទាល់​ជាង​៧​ម៉ឺន​នាក់។ ​កីឡដ្ឋាន Stade de Franc ចាប់​ផ្តើម​សាកសង់ពីឆ្នាំ១៩៩៥ និង​ដំណើរការ​នៅ​ឆ្នាំ១៩៩៨ ​ដែល​អាច​ផ្ទុកអ្នកគាំទ្រ​​បាន​ជាង​៨​ម៉ឺន​នាក់។

៣. កីឡដ្ឋាន Olympic Stadium

ព្រឹតិការណ៍ UEFA EURO ឆ្នាំ២០១២ ប្រទេស​ប៉ូឡូញនិងប្រទេសអ៊ុយក្រែន​ជាសហម្ចាស់ផ្ទះ។ ក្នុងជំនួបវគ្គផ្ដាច់ព្រ័ត្ររវាងក្រុមអេស្ប៉ាញជួបជាមួយក្រុមអុីតាលី នៅ​ថ្ងៃទី១ ខែកក្ដដា នៅ​កីឡដ្ឋាន Olympic Stadium នៅក្នុងប្រទេសអ៊ុយក្រែន។ ការ​ប្រកួត​វគ្គ​ផ្តាច់​ព្រ័ត្រ​នោះ មានអ្នកគាំទ្រចូលរួមទស្សនាផ្ទាល់​ជាង​៦​ម៉ឺន​នាក់។ Olympic Stadium ជាកីឡដ្ឋានធំបំផុតនៅក្នុងប្រទេសអ៊ុយក្រែន ​ដែល​បាន​បើកដំណើរការ​ នៅ​ឆ្នាំ១៩២៣ ផ្ទុកអ្នកគាំទ្រ​បាន​ជាង​៧​ម៉ឺន​នាក់។

៤. កីឡដ្ឋាន Ernst Happel Stadion

ក្នុងការប្រកួតពានរង្វាន់ UEFA EURO ឆ្នាំ២០០៨ ប្រទេសអូទ្រីស និងប្រទេស​ស្វីស ​ជាសហម្ចាស់ផ្ទះ។ នេះលើកដំបូងដែល​ EURO បើកឲ្យប្រទេស២ធ្វើជាសហម្ចាស់ផ្ទះ។ ក្នុងជំនួបវគ្គផ្ដាច់ព្រ័ត្ររវាងក្រុមអាឡឺម៉ង់ និង​ អេស្ប៉ាញ នៅ​ថ្ងៃទី២៩ ខែមិថុនា នៅ​កីឡដ្ឋាន Ernst Happel Stadion នៅក្នុងប្រទេសអូទ្រីស។ ពេលនោះមានអ្នកគាំទ្រចូលរួមទស្សនាផ្ទាល់​ជាង​៥​ម៉ឺន​នាក់។ Ernst Happel Stadion ជាកីឡដ្ឋានធំបំផុតនៅប្រទេសអូទ្រីស ដែល​​បាន​សាង​សង់​​ឆ្នាំ១៩២៩ និង​បើកដំណើរនៅឆ្នាំ១៩៣១។

៥. កីឡដ្ឋាន Estádio da Luz

ក្នុងព្រឹត្តិការណ៍ UEFA EURO ឆ្នាំ២០០៤ ប្រទេសព័រទុយហ្គាល់ជាម្ចាស់ផ្ទះ។ Estádio da Luz ជាកីឡដ្ឋានធំជាងគេក្នុងប្រទេសព័រទុយហ្គាល់ ត្រូវបានជ្រើសជាតិជាកន្លែង​ប្រកួតវគ្គផ្ដាច់ព្រ័ត្រ រវាង​ម្ចាស់​ផ្ទះ ព័រទុយហ្គាល់ និង ក្រិក នៅ​ថ្ងៃទី៤ ខែកក្ដដា ដោយ​មានអ្នកចូលទស្សនាផ្ទាល់​ជាង​៦​ម៉ឺន​នាក់។ កីឡដ្ឋាន Estádio da Luz បើកដំណើរការនៅឆ្នាំ២០០៣ និងផ្ទុកអ្នកគាំទ្រ​ជាង​៦​ម៉ឺន​នាក់៕

អត្ថបទ៖ ផា រតនា