អភិបាល​ក្រុង​ប៉ារីស​ សន្យាចុះហែលទឹកទន្លេសែនដើម្បីបញ្ជាក់ពីទឹកស្អាត

លោកស្រី Anne Hidalgo អភិបាលក្រុងប៉ារីស តាមរយៈអ្នកនាំពាក្យនៃការិយាល័យរបស់លោកស្រីបាននិយាយកាលពីថ្ងៃសុក្រពី​គម្រោង​​ហែលទឹក​ទន្លេសែន (Seine) មុនពេលព្រឹត្តិការណ៍​កីឡាអូឡាំពិក ឆ្នាំ២០២៤ ទំនង​ជា​ធ្វើ​​នៅថ្ងៃទី៣០ ខែមិថុនា​នេះ។

លោកស្រី Hidalgo បានសន្យាថានឹងហែលទឹកនៅលើដងទន្លេរសែន មុនព្រឹត្តិការណ៍​កីឡា​អូឡាំពិក ដោយអាចធ្វើឡើងនៅថ្ងៃទី២៣ ឬថ្ងៃទី៣០ ខែមិថុនា ដើម្បីជាសាក្ខីភាពនៃការបញ្ជាក់ថា ទឹកទន្លេសែន គឺអាចដាក់ឱ្យដំណើរប្រកួតបាន សម្រាប់ប្រភេទកីឡាហែលទឹក នៅអូឡាំពិកឆ្នាំ២០២៤។

អ្នកនាំពាក្យបានប្រាប់សារព័ត៌មាន Reuters ថា ៖«អភិបាលក្រុងបាននិយាយថាការហែលទឹកនឹងធ្វើឡើងនៅថ្ងៃទី២៣ ឬ ៣០ ខែមិថុនា អាស្រ័យលើអាកាសធាតុ និងស្ថានភាពទឹក​ទន្លេ។ វាប្រហែលជានៅថ្ងៃទី៣០ ខែមិថុនា»។

ភ្លៀងធ្លាក់ខ្លាំងក្នុងរយៈពេលប៉ុន្មានសប្តាហ៍កន្លងមកនេះ បានបង្កើនលំហូរទឹកទន្លេ ហើយក៏បង្ខំឱ្យក្រុមហែលទឹកបារាំងរៀបចំព្រឹត្តិការណ៍ហ្វឹកហាត់ឡើងវិញដែលគ្រោងនឹងធ្វើឡើងនៅថ្ងៃចន្ទ។

ទីក្រុងប៉ារីសបាននឹងកំពុង​សម្អាតទន្លេសែន ដើម្បីឱ្យមនុស្សអាចហែលទឹក​បាន​ ដូចករណីនៅក្នុងព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ១៩០០ដែរ ប៉ុន្តែបញ្ហាលូទឹកកាលពីរដូវក្តៅមុននាំឱ្យមានការលុបចោលព្រឹត្តិការណ៍ហែលទឹកមុនអូឡាំពិក។

ជាមួយគ្នានេះផងដែរ ទីក្រុងប៉ារីសនឹងបង្ហាញលទ្ធផលដំបូងនៃការធ្វើតេស្តគុណភាពទឹកនៅសប្តាហ៍ក្រោយ។

កាលពីខែមុន ទីក្រុងនេះបានបង្ហាញជាផ្លូវការនូវអាងស្តុកទឹកដែលមានសមត្ថភាពផ្ទុកទឹកសំណល់បាន ៤៦,០០០ម៉ែត្រគូប ដើម្បីកាត់បន្ថយហានិភ័យនៃការបំពុលយ៉ាងសំខាន់នៅតំបន់ទន្លេសែន​ ដែលជាកន្លែងប្រកួតកីឡាហែលទឹក និងកីឡាទ្រីយ៉ាត្លុង នឹងធ្វើឡើងក្នុងអំឡុងការប្រកួតកីឡាប៉ារីសឆ្នាំ២០២៤៕

ប្រែសម្រួល៖ មន្នីរ័ត្ន
ប្រភព៖ Reuters