កីឡា

លោក វ៉ាត់ ចំរើន បញ្ជាក់ថា មិនមាន ធឿន ធារ៉ា ក្នុងការប្រកួតចម្រុះអាស៊ី

បានផុស

៨ ខែ មុន

នៅ

ថ្ងៃពុធ ១២ មិថុនា ២០២៤

ដោយ

កីឡាករប្រដាល់ល្បីឈ្មោះ ធឿន ធារ៉ា មិនមានឈ្មោះតំណាងជាតិដើម្បីចូលរួមប្រកួតជើងឯកគុនចម្រុះអាស៊ី លើកទី២ ដែលប្រទេសកម្ពុជាទទួលធ្វើម្ចាស់ផ្ទះនៅថ្ងៃទី១១-១២-១៣ ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងក្នុងសន្និសីទសារព័ត៌មានថ្ងៃទី១២ ខែមិថុនា ឆ្នាំ២០២៤ថា កីឡាករគុនខ្មែរល្បីៗជាច្រើនគ្មានវត្តមានក្នុងការចូលរួមប្រកួតគុនចម្រុះជើងឯកអាស៊ី លើកទី២ ឆ្នាំ២០២៤ ក្នុងនោះកីឡាករ ធឿន ធារ៉ា មិនបានចូលរួមប្រកួតទេ។

លោកបានពន្យល់ថា កីឡាករគុនខ្មែរមួយចំនួនដែលមានភាពខ្លាំង និងកេរ្តិ៍ឈ្មោះល្បី ប៉ុន្តែពួកគាត់មិនមានឈ្មោះចូលរួមប្រកួតគឺទី១ដោយសារខុសទម្ងន់ដែលមិនត្រូវនឹងវិញ្ញាសា។ ទី២ដោយសារបញ្ហាសុខភាពរបស់កីឡាករ។ លោកមានប្រសាសន៍ថា ៖«ទី៣ យើងចង់បានកីឡាករគុនខ្មែរល្បីៗទាំងនោះចូលរួមប្រកួត តែបើគិតលើបច្ចេកទេសគឺពួកគាត់មិនធ្លាប់ប្រកួតចម្រុះ (MMA) សោះ ពីព្រោះគុនខ្មែរប្រកួតឈរ ខណៈគុនចម្រុះប្រកួតឈរផង អង្គុយ ឬដេកលើក្តារផង។ ដូច្នេះយើងត្រូវការបទពិសោធ និងហ្វឹកហាត់ខ្លាំងណាស់។ យើងមិនចង់ឲ្យពួកគាត់ដែលគ្មានបទពិសោធគុនចម្រុះ មកប្រកួតគុនចម្រុះទេ ក្រែងមានបញ្ហា ប៉ះពាល់ធ្ងន់ធ្ងរ»។

តាមការគ្រោងទុក នឹងមានជាង២០ប្រទេសមកពីទូទាំងទ្វីបអាស៊ីចូលរួមប្រកួតគុនចម្រុះជើងឯកអាស៊ី ឆ្នាំ២០២៤ ដែលប្រទេសកម្ពុជាធ្វើម្ចាស់ផ្ទះ ហើយការប្រកួតនេះក៏នឹងជ្រើសរើសជ័យលាភីដែលជាប់ទៅប្រកួតព្រឹត្តិការណ៍កីឡាគុនចម្រុះ និងក្បាច់គុនប្រពៃណីនៅប្រទេសថៃ។

ព្រឹត្តិការណ៍នេះ សហការរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី(AMMA) សហព័ន្ធកីឡាយុទ្ធគុនចម្រុះកម្ពុជា និងក្រុមហ៊ុន VIP Sports៕