លោក Didier ប្រាប់ក្រុមបារាំងឲ្យផ្ដោតអារម្មណ៍ខ្លាំងក្នុងការប្រកួតថ្ងៃដំបូង

ក្រុម​បាល់ទាត់​ជម្រើសជាតិបារាំងត្រូវជួបជាមួយក្រុមជម្រើសជាតិអូទ្រីស វេលាម៉ោង២រំលងអធ្រាត្រ ថ្ងៃទី១៧ ឈាន​ចូល​ថ្ងៃ​ទី​១៨​ ខែមិថុនា ឆ្នាំ២០២៤ សម្រាប់​ការប្រកួតសន្សំពិន្ទុ​ពូល D ក្នុងព្រឹត្ដិកាណ៍អឺរ៉ូ ឆ្នាំ២០២៤។

លោក Didier Deschamps គ្រូបង្វឹកក្រុមជម្រើសជាតិបារាំង បានប្រាប់កូនក្រុមរបស់លោកឲ្យផ្ដោតអារម្មណ៍​ខ្លាំង​មែន​ទែន​សម្រាប់​ការប្រកួតថ្ងៃដំបូង។ ជាពិសេស​ក្រុម​ត្រូវ​តែ​យក​ឲ្យ​ខាង​តែ​បាន​៣ពិន្ទុ ពី​ព្រោះនេះជាកម្លាំងចិត្តដ៏សំខាន់មួយទៀត​សម្រាប់​ការប្រកួតបន្ទាប់។

លោក Didier បាននិយាយថា៖«ការប្រកួតដំបូងគឺមានសារៈសំខាន់ណាស់។ ការឈ្នះធ្វើឲ្យយើងស្ថិតក្នុងទីតាំងដ៏ល្អ ហើយនោះជាគោលដៅរបស់យើង។ សូម្បីតែក្រុមអូទ្រីសក៏គិតដូចគ្នាដែរ។ យើង​ត្រូវ​តែរៀបចំក្រុមឲ្យបានល្អក្នុង​ការ​ប្រកួត​ដំបូង​ ​ដើម្បី​ជួយឲ្យយើង​ស្ថិត​កន្លែងដែលមានសុវត្ថិភាព»។

មុនការប្រកួតចូលមកដល់​គ្រូបង្វឹកក្រុមជម្រើសជាតិបារាំង បានសិក្សាពីអំពីទម្រង់លេងរបស់ក្រុមអូទ្រីសយ៉ាងច្បាស់។ ជាពិសេស​លោក​បានមើលការប្រកួតប៉ុន្មានលើកចុងក្រោយ ដើម្បីស្វែងរកយុទ្ធសាស្រ្ដក្នុងការទប់ស្ដាត់ និងការស្វែងរកជោគជ័យក្នុងការប្រកួតយប់នេះ។

លោក Didier បានបន្ថែមថា៖«យើង​បាន​សង្កេត​មើល​ការ​ប្រកួត​៤​លើក​ចុង​ក្រោយ​របស់​អូទ្រីស។ យើងមានវីដេអូវិភាគអំពីអ្វីដែលយើងនឹងត្រូវប្រឈមមុខ ហើយអ្វីដែលផលវិបាករបស់យើងនឹងជួបនៅក្នុងការប្រកួត។ ជាការពិតណាស់ ពួកគេមានគុណភាព និងភាពប៉ិនប្រសប់ ភាពខ្លាំងរបស់​អូទ្រីស គឺសមត្ថភាពក្នុងការដេញបាល់ និងដាក់សម្ពាធលើគូប្រកួត»៕

ប្រែសម្រួល៖ ផា រតនា