UEFA ស៊ើបអង្កេតការរើសអើងជាតិសាសន៍ចំពោះកីឡាករអង់គ្លេស

សហព័ន្ធបាល់ទាត់អឺរ៉ុប (UEFA) កំពុងស៊ើបអង្កេតលើការចោទប្រកាន់ពីការរើសអើងជាតិសាសន៍ លើកីឡាករអង់គ្លេសអំឡុងពេលការប្រកួតរវាងក្រុមអង់គ្លេស​ជាមួយ​ក្រុមស៊ែប៊ី។

ស្ថាប័នគ្រប់គ្រងបាល់ទាត់ទ្វីបអឺរ៉ុបបានប្រកាសថា ខ្លួននឹងធ្វើការស៊ើបអង្កេតផ្នែកវិន័យលើអាកប្បកិរិយារើសអើង បន្ទាប់ពីការទទួលជ័យជម្នះ ១-០ របស់អង់គ្លេស។ គេ​មិន​ដឹង​ថា​ នរណា​ដាក់​ពាក្យ​បណ្តឹង​នោះ​ទេ ប៉ុន្តែ​យ៉ាងណាមិញគេ​យល់​ថា​មិន​មែនជាការដាក់ពាក្យបណ្ដឹងពី​ក្រុម​អង់គ្លេស​ទេ។

អង្គការប្រឆាំងការរើសអើង Fare ត្រូវបានគេដឹងថា មានអ្នកសង្កេតការណ៍នៅកីឡដ្ឋាន Arena AufSchalke អំឡុងពេលប្រកួតក្នុងពូល C ក្នុងទីក្រុង Gelsenkirchen។ ទន្ទឹមនឹងនេះដែរ សមាគមបាល់ទាត់ស៊ែប៊ីត្រូវបានចោទប្រកាន់ដោយ UEFA បន្ទាប់ពីរកឃើញវត្ថុតាង ​ពាក់​ព័ន្ធ​នឹង​ការ​គប់​ទៅ​លើ​ការ​ប្រកួត។ ការ​ចោទ​ប្រកាន់​ក៏​រួម​បញ្ចូល​ទាំង​ការ​បញ្ជូន​សារ​បង្ក​ហេតុ​មិន​សម​សម្រាប់​ព្រឹត្តិការណ៍​ EURO។

ប៉ូលិសបាននិយាយថាមនុស្សចំនួន៨នាក់ត្រូវបានឃុំខ្លួនជាបណ្ដោះអាសន្ន បន្ទាប់ពីមានជម្លោះរវាងអ្នកគាំទ្រអង់គ្លេស និងស៊ែប៊ី មុនពេលការប្រកួត ក្នុងនោះ៧នាក់មកពីប្រទេសស៊ែប៊ី។

មុននេះសហព័ន្ធកីឡាបាល់ទាត់កូសូវ៉ូ បាននិយាយថា ខ្លួនបាន​ដាក់​ពាក្យបណ្តឹងទៅកាន់ UEFA អំពីការបង្ហាញទង់ជាតិ ពាក្យស្លោក និងការស្រែកច្រៀងដោយអ្នកគាំទ្រស៊ែប៊ី ដែល​បង្ហាញ​ពី​សារនយោបាយ និងការរើសអើងជាតិសាសន៍ប្រឆាំងនឹងកូសូវ៉ូ។

ស្ថាប័នគ្រប់គ្រងបាល់ទាត់អឺរ៉ុបបាននិយាយថា ៖«ស្ថាប័នគ្រប់គ្រង ក្រមសីលធម៌ និងវិន័យរបស់ UEFA (CEDB) នឹងសម្រេចលើបញ្ហានេះក្នុងពេលសមស្រប។ លើសពីនេះ ក្រមសីលធម៌ និងអធិការកិច្ចរបស់ UEFA នឹងធ្វើការស៊ើបអង្កេតផ្នែកវិន័យទាក់ទងនឹងអាកប្បកិរិយារើសអើងដែលត្រូវបានចោទប្រកាន់»។

ប្រភព៖ BBC
ប្រែសម្រួល៖ ផា រតនា