កីឡា

លោក សួង បញ្ញា ប្រកាសឈប់ពីការបង្ហាត់គុនខ្មែរ និងការងារនៅទទក

បានផុស

៨ ខែ មុន

នៅ

ថ្ងៃពុធ ១៩ មិថុនា ២០២៤

ដោយ

លោក សួង បញ្ញា ដែលត្រូវបានគេស្គាល់ជាបុគ្គលម្នាក់ហ៊ាននិយាយរិះគន់មិនសំចៃមាត់ក្នុងវិស័យប្រដាល់គុនខ្មែរបានប្រកាសលាឈប់ពីការងារជាគ្រូបង្វឹក និងការងារផ្សេងៗនៅសង្វៀនប្រដាល់ទូរទស្សន៍ជាតិកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីយប់ថ្ងៃទី១៨ ខែមិថុនា ឆ្នាំ២០២៤ លោក សួង បញ្ញា បាននិយាយថា ៖«ឃើញគេជេរខ្ញុំច្រើនណាស់។ គ្មានអ្នកណាដែលនៅជុំវិញសង្វៀននោះបង្ហាញភាពស្មោះត្រង់របស់ខ្ញុំ ដូច្នេះដើម្បីបញ្ជាក់ភាពត្រឹមត្រូវរបស់ខ្ញុំ ខ្ញុំសូមលាឈប់ពីការងាររុំបោះឆៅ និងការងាទាំងអស់នៅ ទទក ចាប់ពីថ្ងៃនេះតទៅ»។

មិនត្រឹមតែប៉ុណ្ណោះនៅព្រឹកថ្ងៃទី១៩ ខែមិថុនា ឆ្នាំ២០២៤ លោក សួង បញ្ញា បានប្រកាសលាឈប់ពីការងារជាគ្រូបង្ហាត់នៅក្លិបប្រដាល់គុនខ្មែរស៊ុបពើហ្វៃ។ លោកបាននិយាយថា ៖«ខ្ញុំបាទ សួង បញ្ញា ចាប់ពីថ្ងៃ១៩.៦.២០២៤ តទៅ ខ្ញុំបាទបានសូមលាឈប់ពីគ្រូបង្ហាត់នៃក្លិបគុនខ្មែរស៊ុបពើហ្វៃហើយ។ ខ្ញុំមិនមែនជាគ្រូបង្វឹកនៅទីនោះទៀតទេ។ ខ្ញុំបាទសូមអរគុណដល់ប្រមុខថ្នាក់ដឹងនាំក្លិបទាំងអស់ដែលបានផ្ដល់ឱកាសឲ្យខ្ញុំបានចូលរួមជាមួយក្លិបកន្លងមក»។

ការប្រកាសលាឈប់នេះកើតឡើង បន្ទាប់ពីលោកបានលើកឡើងពីចំណុចខ្លះពាក់ព័ន្ធនឹងការប្រកួតរវាងកីឡាករ ពេជ្រ សម្បត្តិ និង ធន់ វណ្ណា ដែលមានបញ្ហាខ្លះក្នុងពេលប្រកាសលទ្ធផល។ លោកបានលើកឡើងថា ច្បាប់គុនខ្មែរនៅឯណា ប្រហែលជាតិក្រោយហើយ បានជាពិភពលោកទទួលស្គាល់។

ជាមួយគ្នានេះ លោកក៏បានរិះគន់ពីលទ្ធផលនៃការប្រកួតរវាងកីឡាករ ធន់ ផានិត និង ខេម ចាន់ ដែលអ្នកគាំទ្រភាគច្រើនមើលឃើញ ខេម ចាន់ ជាអ្នកឈ្នះ ប៉ុន្តែចៅក្រមកាត់សេចក្តីឲ្យ ធន់ ផានិត ឈ្នះ។

កន្លងមក លោក សួង បញ្ញា តែងតែរិះគន់ និងនិយាយត្រង់ៗពីចំណុចខ្វះខាត ក៏ដូចជាភាពអសកម្មក្នុងវិស័យគុនខ្មែរ ហើយត្រូវបានអ្នកគាំទ្រដាក់រហស្សនាមថា «លោកគ្រូដឹងគ្រប់រឿង»។

សូមបញ្ជាក់ថា លោក សួង បញ្ញា ជាអតីតកីឡាករប្រដាល់ម្នាក់ដែលមិនសូវល្បីល្បាញខ្លាំងទេ ប៉ុន្តែនៅពេលលោកក្លាយជាគ្រូបង្ហាត់ និងជាអ្នកវិភាគត្រូវបានអ្នកគាំទ្រចាប់អារម្មណ៍យ៉ាងខ្លាំងពីលោក៕