កីឡា

ឈ្នះនៅបារាំងយប់មិញ ព្រុំ សំណាង មិនធ្លាប់ចាញ់នៅក្រៅប្រទេស

បានផុស

៧ ខែ មុន

នៅ

ថ្ងៃសុក្រ ២៨ មិថុនា ២០២៤

ដោយ

កីឡាករគុនខ្មែរ ព្រុំ សំណាង បានចេញប្រកួតនៅក្រៅប្រទេស៣ដងហើយ ប៉ុន្តែមិនទាន់បរាជ័យម្តងណាឡើយ បន្ទាប់ពីបានយកឈ្នះជើងខ្លាំងបារាំង Eda Dudgoa ដោយពិន្ទុ នៅយប់ថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លងកាត់បទពិសោធឡើងសង្វៀនរាប់រយដង ព្រុំ សំណាង មិនសូវបានចេញទៅក្រៅប្រទេសសម្រាប់ការប្រកួតលក្ខណៈគុនខ្មែរអាជីព។ បើតាមប្រវត្តិ អ្នកលេងគុនខ្មែរទម្ងន់ធ្ងន់ និងវ័យកាន់តែច្រើនរូបនេះទើបតែចេញទៅប្រកួតនៅក្រៅប្រទេស៣ដងប៉ុណ្ណោះ។

លើកទី១ ព្រុំ សំណាង បានផ្តួលកីឡាករអង់គ្លេស Thomas Carpenter ឲ្យសន្លប់ក្នុងទឹកទី១ នៅថ្ងៃទី៥ ខែកុម្ភៈ ឆ្នាំ២០២៣ ដើម្បីទទួលបានខ្សែក្រវាត់ Thai Fight ក្នុងទីក្រុងបាងកក ប្រទេសថៃ។ លើកទី២ រូបគេបានផ្តួលកីឡាកររុស្ស៊ី Firdavszhon Naimov ឲ្យសន្លប់ក្នុងទឹកទី១ នៅថ្ងៃទី២៦ ខែកុម្ភៈ ឆ្នាំ២០២៣ សង្វៀន Thai Fight ក្នុងទីក្រុងបាងកក ប្រទេសថៃ។ លើកទី៣ រូបគេបានយកឈ្នះកីឡាករបារាំង Eda Dudgoa ដោយពិន្ទុ នៅថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំង។

រហូតដល់ពេលនេះ ព្រុំ សំណាង មានស្ថិតិប្រកួត១៥៩ដង ក្នុងនោះឈ្នះ១៤៤ដង ចាញ់១២ដង ស្មើ៣ដង និងធ្លាប់ផ្តួលដៃគូឲ្យសន្លប់៧០ដង។ រូបគេអាចត្រូវបានចាត់ទុកជាកីឡាករចាស់វស្សាដែលទទួលបានជោគជ័យបំផុតក្នុងចំណោមកីឡាករប្រដាល់គុនខ្មែរនាពេលបច្ចុប្បន្ន ខណៈវ័យ៣៩ឆ្នាំហើយ ប៉ុន្តែរូបគេនៅតែសកម្មភាពក្នុងការឡើងសង្វៀន។

រហូតដល់ពេលនេះ ព្រុំ សំណាង បានឈ្នះមេដាយមាសកីឡាស៊ីហ្គេម ឆ្នាំ២០២៣ និងមេដាយសំរិទ្ធកីឡាស៊ីហ្គេម ឆ្នាំ២០២១ ជូនជាតិ។ ក្រៅពីសមិទ្ធផលជូនជាតិ រូបគេបានឈ្នះខ្សែក្រវាត់គុនខ្មែរអន្តរជាតិ KIF ឆ្នាំ២០១៧, ឈ្នះខ្សែក្រវាត់គ្រុឌគុនខ្មែរពិភពលោក ឆ្នាំ២០២៣, ឈ្នះខ្សែក្រវាត់គុនខ្មែរតេជោ សន្តិភាពអន្តរជាតិ ឆ្នាំ២០២៣, ឈ្នះខ្សែក្របាត់ Thai Fight អន្តរជាតិ ឆ្នាំ២០២៣, ឈ្នះខ្សែក្រវាត់សហព័ន្ធកីឡាប្រដាល់គុនខ្មែរអន្តរជាតិ KKF ឆ្នាំ២០២៤៕