កីឡា

ជប៉ុន និងប៉ូឡូញ ឡើងវគ្គពាក់កណ្តាលផ្តាច់ព្រ័ត្រជើងឯកពិភពលោក VNL

បានផុស

២១ នាទី មុន

នៅ

ថ្ងៃសុក្រ ២៨ មិថុនា ២០២៤

ដោយ

ក្រុមបាល់ទះជម្រើសជាតិជប៉ុន និង ប៉ូឡូញ បានឡើងទៅកាន់វគ្គពាក់កណ្តាលផ្តាច់ព្រ័ត្រជើងឯកពិភពលោក 2024 FIVB Men’s Volleyball Nations League បន្ទាប់ពីបានយកឈ្នះដៃគូរៀងៗខ្លួននៅវគ្គ៨ក្រុមចុងក្រោយកាលពីយប់មិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជប៉ុន បានយកឈ្នះ កាណាដា ដោយលទ្ធផលមិនអាចតដៃរួច ៣សិតទល់០ គឺសិតទី១ ដោយពិន្ទុ ២៥-២៤, សិតទី២ ដោយពិន្ទុ ២៥-១៨ និងសិតទី៣ ដោយពិន្ទុ ២៦-២៤។ នេះជាការសងសឹកបានសម្រេចរបស់ជប៉ុន បន្ទាប់ពីបានចាញ់កាណាដា ដោយលទ្ធផល ២-៣ ក្នុងវគ្គសន្សំពិន្ទុក្នុងពូលកាលពីថ្ងៃទី១៨ ខែមិថុនា ឆ្នាំ២០២៤។

ជ័យជម្នះនៅវគ្គ៨ក្រុមចុងក្រោយបានបើកផ្លូវឲ្យជប៉ុនបានឡើងទៅកាន់វគ្គពាក់កណ្តាលផ្តាច់ព្រ័ត្រជាលើកទី២ក្នុងប្រវត្តិសាស្ត្រពានរង្វាន់ Volleyball Nations League បន្ទាប់ពីពួកគេធ្លាប់បានឡើងលើកទី១កាលពីឆ្នាំ២០២៣ និងបញ្ចប់ទៅដោយទទួលបានចំណាត់ថ្នាក់លេខ៣ (មេដាយសំរិទ្ធ)។

កាលពីយប់មិញនេះដែរ ក្រុមបាល់ទះជម្រើសជាតិប៉ូឡូញ បានឡើងទៅកាន់វគ្គពាក់កណ្តាលផ្តាច់ព្រ័ត្រដែរ បន្ទាប់ពីបានយកឈ្នះជម្រើសជាតិប្រេស៊ីល ដោយលទ្ធផល ៣-១។ សិតទី១ ប៉ូឡូញ បានឈ្នះ ២៥-១៨ ប៉ុន្តែសិតទី២ ប្រេស៊ីល បានឈ្នះវិញក្នុងពិន្ទុ ២៣-២៥ ខណៈពីរសិតចុងក្រោយ ប៉ូឡូញ បានឈ្នះដោយពិន្ទុ ២៥-២២ និង ២៥-១៦។

នៅវគ្គពាក់កណ្តាលផ្តាច់ព្រ័ត្រ ជប៉ុន ត្រូវប៉ះក្រុមឈ្នះរវាង ស្លូវេនី និងអាហ្សង់ទីន ដែលក្រុមទាំងពីរនេះសុទ្ធតែធ្លាប់ចាញ់ជប៉ុនកាលវគ្គសន្សំពិន្ទុក្នុងពូល។ ចំណែក ម្ចាស់ផ្ទះប៉ូឡូញ ក្រុមឈ្នះរវាង អ៉ីតាលី និង បារាំង ដែលសុទ្ធតែក្រុមខ្លាំង ជាពិសេសអ៉ីតាលីតែម្តង។

លទ្ធផល២គូវគ្គ៨ក្រុមចុងក្រោយ