ក្រុមហ្សកហ្ស៊ីទទួលបានប្រាក់រង្វាន់ជាង១០លានដុល្លារ ក្រោយឈ្នះព័រទុយហ្គាល់

លោក Bidzina Ivanishvili អតីតនាយករដ្ឋមន្ត្រីនៃ​ប្រទេស​ហ្សកហ្ស៊ីបានសន្យាផ្តល់ប្រាក់ចំនួន៨.៤លានផោន (ជាង១០​លាន​ដុល្លារ​អាមេរិក) ដល់ក្រុមបាល់ទាត់​ជម្រើស​ជាតិ​របស់ប្រទេសខ្លួន​ដែល​កំពុង​​ធ្វើ​បាន​ល្អ​ក្នុង​ពាន​រង្វាន់ Euro ឆ្នាំ២០២៤ ។

ក្រុមហ្សកហ្ស៊ីដឹកនាំដោយអតីតខ្សែការពារសញ្ជាតិបារាំងលោក Willy Sagnol បានយកឈ្នះព័រទុយហ្គាល់ ក្នុងលទ្ធផល ២-០ កាលពីថ្ងៃពុធ ហើយបានឈានទៅវគ្គ១៦ក្រុមចុងក្រោយ ក្នុងពានរង្វាន់ EURO ជាលើកដំបូងក្នុងប្រវត្តិសាស្រ្ដ។

លោក Bidzina Ivanishvili អតីតនាយករដ្ឋមន្ត្រី​ហ្សកហ្ស៊ី ​បាន​និយាយ​ថា ការឈ្នះក្រុមជម្រើស​​ជាតិ​ព័រទុយហ្គាល់​គឺ​​ជាប្រវត្តិសាស្ត្រ និងជាក្តីសុបិន។ បុរសវ័យ៦៨ឆ្នាំ​​បាន​សន្យា​​បរិច្ចាគប្រាក់ចំនួន៨.៤លានផោនបន្ថែមទៀតដល់ក្រុមនិងបុគ្គលិកគ្រូបង្វឹក ប្រសិនបើពួកគេ​អាច​យកឈ្នះអេស្ប៉ាញ​នៅ​វគ្គ​១៦​ក្រុម​ចុង​ក្រោយ។

ទ្រព្យសម្បត្តិរបស់លោក Bidzina Ivanishvili ត្រូវបានប៉ាន់ស្មានដោយទស្សនាវដ្តី Forbes ប្រហែលជា​ ៣.៨៧ ពាន់លានផោន (ជាង៤​ពាន់​លាន​ដុល្លារ​អាមេរិក)។ ទោះបីជាលោកបានលាលែងពីតំណែង​នាយករដ្ឋមន្ត្រី បន្ទាប់ពីបានធ្វើការត្រឹមតែ១២ខែ ប៉ុន្តែ​​លោកនៅតែមានឥទ្ធិពលនៅក្នុងគណបក្សកាន់អំណាច​របស់ប្រទេស​ក្នុងនាមជាប្រធានកិត្តិយស៕

ប្រភព៖ BBC
ប្រែសម្រួល៖ ផា រតនា