យប់មិញ Ronaldo និង Costa បង្កើត​កំណត់ត្រាថ្មីក្នុងពានរង្វាន់អឺរ៉ូ

ក្រុមជម្រើសជាតិព័រទុយហ្គាល់បានយកឈ្នះក្រុមជម្រើសជាតិស្លូវេនី យ៉ាងតានតឹងបំផុត​កាលពីយប់មិញ ក្រោយការប្រកួត​បាន​អូសបន្លាយរហូតដល់វគ្គទាត់បាល់១១ម៉ែត្រកាត់សេចក្ដី ក្នុងនោះព័រទុយហ្គាល់យកឈ្នះស្លូវេនី ៣-០ បន្ទាប់ពី​ស្មើ​គ្នា ០-០ ក្នុង​រយៈ​ពេល​១២០​នាទី។

ក្រោយជួយក្រុមជម្រើសជាតិព័រទុយហ្គាល់ឡើងទៅវគ្គ៨ក្រុមចុងក្រោយ អ្នកចាំទី Diogo Costa វ័យ២៤ឆ្នាំបានបំបែកកំណត់ត្រាថ្មីចំនួន២ក្នុងព្រឹត្តិការណ៍អឺរ៉ូ។ កំណត់ត្រាទី១កីឡាករ Diogo Costa បានក្លាយជាអ្នកចាំទីដំបូងគេបង្អស់ ដែលសង្គ្រោះបាល់បេណាល់ទី៣គ្រាប់ជាប់គ្នាក្នុងវគ្គទាល់បាល់បេណាល់ទីកាត់សេចក្ដី។ កំណត់ត្រាទី២រូបគេក៏ជាអ្នកចាំទី១ក្នុងប្រវត្តិសាស្រ្ដពានរង្វាន់អឺរ៉ូ ដែលមិនរបូតគ្រាប់បាល់សូម្បីតែ១គ្រាប់វគ្គទាល់បាល់បេណាល់ទីកាត់សេចក្ដី។

ចំពោះកីឡាករ Cristiano Ronaldo ទោះខកខានរកគ្រាប់ពីការស៊ុតបញ្ចូលទីបាល់ពិន័យ១១ម៉ែត្រក្ដី ប៉ុន្តែនៅវគ្គទាត់បាល់ទាល់ប៉េណាល់ទីកាត់សេចក្ដី រូបគេស៊ុត​បាន​សម្រេច។ មួយគ្រាប់នោះហើយជួយឲ្យកីឡាកររូប​គេ​បំបែកកំណត់ត្រាក្លាយជាកីឡាករចាស់ជាង​គេ​បំផុត​ក្នុងប្រវត្តិសាស្រ្ដ EURO រកស៊ុតគ្រាប់បាល់បញ្ចូល​ទី​ក្នុងវគ្គទាត់បាល់បេណាល់ទីកាត់សេចក្ដី ក្នុងវ័យ៣៩ឆ្នាំនិង១៤៧ថ្ងៃ។

ក្នុងវគ្គ៨ក្រុមចុងក្រោយ ព័រទុយហ្គាល់ត្រូវជួបជាមួយក្រុមជម្រើសជាតិបារាំង វេលាម៉ោង២រំលងអធ្រាត ថ្ងៃទី៦ ខែ​កក្ដដា។ នេះក៏ជាជំនួបសងសឹកគ្នាផងដែរ ខណៈ​ព្រឹត្តិការណ៍ EURO ឆ្នាំ២០១៦ ក្រុមទាំង២ ជួបគ្នានៅវគ្គផ្ដាច់ព្រ័ត្រ ពេលនោះ ព័រទុយហ្គាល់ យកឈ្នះ​ម្ចាស់​ផ្ទះ បារាំង ដោយ​លទ្ធផល ១-០ ​ដើម្បី​ក្លាយជាម្ចាស់ម្ចាស់ជើងឯក៕

អត្ថបទ៖ ផា រតនា