លោក Didier តបថា «បើបារាំងលេងគួរឲ្យធុញ មិនចាំបាច់មើលទេ»

ក្រុមជម្រើសជាតិបារាំងក្នុងព្រឹត្តិការណ៍ Euro ឆ្នាំនេះ​បង្ហាញ​ទម្រង់​មិន​សូវ​គួរ​ឲ្យ​ចាប់​អារម្មណ៍​ទេ​​ដោយ​​ឆ្លង​កាត់​៥​ប្រកួត រកបាន​តែ​៣គ្រាប់​ប៉ុណ្ណោះ​ ក្នុងនោះ១គ្រាប់ស៊ុតដោយ Mbappe ហើយ២គ្រាប់ទៀតសុទ្ធតែជាគ្រាប់ចូលទីខ្លួនឯងរបស់គូប្រកួត។

លោក Didier Deschamps គ្រូបង្វឹកក្រុមជម្រើសជាតិបារាំងបានឆ្លើយតបទៅអ្នកដែលធុញទ្រាន់នឹងទម្រង់លេងរបស់ក្រុមបារាំងថា អ្នក​អាចមើលអ្វីផ្សេងជំនួសឲ្យការប្រកួតវគ្គពាក់កណ្តាលផ្តាច់ព្រ័ត្រ Euro ឆ្នាំ២០២៤ ទល់នឹង​ក្រុមអេស្ប៉ាញ។

នៅក្នុងសន្និសីទសារព័ត៌មានមុនការប្រកួតក លោក Deschamps បាននិយាយថា ៖«ប្រសិនបើអ្នកគិតថា អផ្សុក អ្នកអាចមើលការប្រកួតផ្សេងទៀត។ អ្នកមិនចាំបាច់មើលពួកយើងទេវាមិនអីទេ។ ប្រហែលវាមិនមែនជាការប្រកួតជក់ចិត្តដូចកាលពីអតីតកាលទេ ប៉ុន្តែយើងប្រឹងអស់ពីសមត្ថភាពដើម្បីធ្វើឲ្យអារម្មណ៍អ្នកគាំទ្រទាំងបុរស និងស្ត្រីរបស់បារាំងសប្បាយ​​ចិត្តជាមួយនឹងលទ្ធផលរបស់យើង»។

លោក Luis de la Fuente គ្រូ​បង្វឹក​ជម្រើស​ជាតិ​អេស្ប៉ាញ​បាននិយាយថា ៖«យើងទាំងអស់គ្នាព្យាយាមរៀបចំក្រុមតាមផែនការដែលយើងបានគិតទុក។ អេស្ប៉ាញជាក្រុម​ទទួលបានចាប់អារម្មណ៍ខ្លាំង ហើយខ្ញុំនឹងមិនបដិសេធចំពោះរឿងនេះ។ វាជាហ្សែនរបស់យើង ប៉ុន្តែនៅទីបញ្ចប់យើងត្រូវគិតអំពីជ័យជម្នះ។ នៅដំណាក់កាលនេះគឺគិតពីលទ្ធផលជាធំ ហើយ​ការងាររបស់អ្នកនឹងត្រូវបានគេវិនិច្ឆ័យនិងវាយតម្លៃនៅពេលបញ្ចប់»៕

ប្រែសម្រួល៖ ផា រតនា​