កីឡា

ព្រះខ័នរាជស្វាយរៀងមានប្រេស៊ីល៣រូប ជប៉ុន២រូបត្រៀមរដូវកាលថ្មីដ៏សំខាន់

បានផុស

៧ ខែ មុន

នៅ

ថ្ងៃសុក្រ ១២ កក្កដា ២០២៤

ដោយ

ក្លិបបាល់ទាត់ព្រះខ័នរាជស្វាយរៀង បាននាំចូលសមាជិកថ្មីសញ្ជាតិប្រេស៊ីលម្នាក់ទៀតហើយដែលធ្វើឲ្យក្លិបនេះមានកីឡាករប្រេស៊ីល៣នាក់ និងជប៉ុន២នាក់ បូករួមទាំងកូតាកីឡាករអាស៊ានម្នាក់ទៀតដើម្បីត្រៀមរដូវកាលថ្មីដ៏សំខាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀងបានបន្តកុងត្រាកីឡាករប្រេស៊ីល Gabriel Silva បន្ទាប់ពីធ្វើបានល្អកាលពីរដូវកាលមុន។ ចំណែក ខ្សែប្រយុទ្ធសញ្ជាតិកាណាដា Marcu Haber បានចាកចេញទៅចូលរួមជាមួយក្លិបនៅលីគថៃ ដូច្នេះព្រះខ័នរាជស្វាយរៀងបាននាំចូលខ្សែប្រយុទ្ធថ្មី Pablo Augusto អាយុ២៨ឆ្នាំ កម្ពស់១.៨៤ម៉ែត្រ។

ស្របពេលកីឡាករសញ្ជាតិជប៉ុន Hikaru Mizuno ទទួលបានសញ្ជាតិខ្មែរដែលបានក្លាយជាកីឡាករកម្ពុជាបានធ្វើឲ្យព្រះខ័នរាជស្វាយរៀងនៅខ្វះសមាជិកបរទេសម្នាក់ទៀត។ ដូច្នេះព្រះខ័នរាជស្វាយរៀងបាននាំចូលខ្សែប្រយុទ្ធសញ្ជាតិប្រេស៊ីល Cristian Santos ដែលរដូវកាលមុនលេងឲ្យក្លិបណាហ្គាវើលដ៍។

ក្រៅពីកីឡាករប្រេស៊ីល៣រូបខាងលើ ព្រះខ័នរាជស្វាយរៀង មានកីឡាករជប៉ុន២រូបស្រាប់គឺខ្សែបម្រើ Ryo Fujii និងខ្សែការពារ Takashi Odawarra ព្រមទាំងសមាជិកកូតាកីឡាករអាស៊ាន កីឡាករ Bounphachan Bounkong សញ្ជាតិឡាវត្រូវក្លិបបន្តមួយរដូវកាលទៀត បន្ទាប់ពីធ្វើបានល្អកាលពីរដូវកាលមុន។

នៅថ្ងៃទី១៧ ខែកក្កដា ខាងមុខនេះ ព្រះខ័នរាជស្វាយរៀង ត្រូវប្រកួតជម្រុះជាមួយក្រុមជើងឯកឡាវ Young Elephants ជើងទី១ ក្នុងពានរង្វាន់ ASEAN Club Championship នៅទឹកដីឡាវ និងជើងទី២ នៅថ្ងៃទី២៤ ខែកក្កដា ឆ្នាំ២០២៤។

បន្ទាប់មក ខេមបូឌានព្រីមៀរលីគ រដូវកាល២០២៤-២៥ ចាប់ផ្តើមរដូវកាលថ្មី នាខែសីហា និងមានពានរង្វាន់ AFC Challenge League ព្រមទាំងពានរង្វាន់សម្តេចតេជោ ហ៊ុន សែន ថែមទៀតដែលជារដូវកាលដ៏មមាញឹកសម្រាប់ក្រុមជើងឯកលីគកម្ពុជា៕