អ្នកប្រដាល់វ័យក្មេងជប៉ុន Matsuda ផ្ដួលជើងខ្លាំងថៃក្លាយជាម្ចាស់ខ្សែក្រវាត់

ជារឿងគួរឲ្យភ្ញាក់ផ្អើលកីឡាករវ័យក្មេងជប៉ុន Ryuki Matsuda បានផ្ដួលកីឡាករ​ថៃ​ Khunsueklek Boomdeksian ​ដែល​ជាជើងខ្លាំង​មិនដែលចាញ់សោះ៤១លើកចុងក្រោយ ឲ្យសន្លប់នៅទឹកទី២។

កីឡាករវ័យ១៨ឆ្នាំ Ryuki Matsuda មិនធ្វើឲ្យអ្នកគាំទ្រក្នុងប្រទេស​ខ្លួន​ខកចិត្ដឡើយ។ រូបគេធ្វើបានល្អមែនទែនក្នុងព្រឹត្តិការណ៍ Rajadamnern World Series Japan ក្នុង​ទីក្រុង Chiba ​ដើម្បី​ក្លាយជាម្ចាស់ខ្សែក្រវាត់ Rajadamnern Bantamweight ​តាម​រយៈ​ការ​ផ្តួល​​កីឡាករ​ថៃក្នុង​ទឹក​ទី​២។

ការ​ប្រកួត​បាន​ចាប់​ផ្តើម​យ៉ាង​រលូន​​ក្នុង​ទឹក​ទី​១​ដោយកីឡាករទាំង២មិនសម្រុកគ្នាខ្លាំងទេ។ នៅ​ទឹក​ទី​២​ជា​វគ្គដែលកីឡាករជប៉ុន Matsuda រកចំណុចខ្សោយរបស់ដៃគូឃើញ។ រូបគេប្រើកណ្ដាប់ដៃ​ឆ្វេង​សំដៅទៅលើរាងកាយរបស់ Khunsueklek បន្ទាប់មក Matsuda បន្ដែមកណ្ដាប់ដៃ​ស្តាំ​លឿនៗ​ចំនួន​៣​​ដៃ​ទៀត​សំដៅ​​លើ​​ក្បាល​ធ្វើ​អ្នក​ប្រដាល់​ថៃ​ដួល​ហើយ​សន្លប់​តែ​ម្តង។

កីឡាករវ័យក្មេងជប៉ុន Ryuki Matsuda បានបង្កើតកំណត្រាយ៉ាងល្អ ក្រោយចាប់ផ្ដើមប្រឡូក​ក្នុងការប្រកួតឃីកបុងស៊ីងអាជីពចំនួន១៣លើក​ប៉ុណ្ណោះ​​ដោយ​​មិនទាន់​ស្គាល់​បរាជ័យ​ឡើយ​គឺ​​ឈ្នះ១២លើក (ផ្ដួលដៃគូឲ្យបោះបង់ការប្រកួត​៥​លើក) និងស្មើ១លើក។ បច្ចុប្បន្ន​រូប​គេ​កំពុងឈរនៅលេខរៀងទី៧ ក្នុងតារាងចំណាត់អ្នកប្រដាល់ឃីកបុកស៊ីងល្អបំផុតរបស់ពិភពលោក ក្នុងប្រភេទទម្ងន់៥៣គីឡូក្រាម៕

អត្ថបទ៖ ផា រតនា