បាល់ទាត់អាមេរិក​ខាង​ត្បូង ស្តីបន្ទោស​អ្នកគ្រប់គ្រង​កីឡដ្ឋាន Hard Rock

សហព័ន្ធបាល់ទាត់អាមេរិកខាងត្បូង (CONMEBOL) បានស្តីបន្ទោសក្រុមមន្ត្រីនៅកីឡដ្ឋាន Hard Rock និងក្រុមអាជ្ញាធរមូលដ្ឋាន បន្ទាប់ពីអ្នកគាំទ្រជាច្រើនមិនមានសំបុត្របានសម្រុកចូលកីឡដ្នាន។

ក្រោយករណីនេះកើត​ឡើង សហព័ន្ធបាល់ទាត់អាមេរិកខាងត្បូង បាន​សោកស្ដាយ​យ៉ាងខ្លាំង ហើយបាន​បន្ទោស​ដល់គ្រប់ភាគីពាក់ព័ន្ធដែលរៀបចំសណ្ដាប់ធ្នាប់ក្នុងការប្រកួតវគ្គផ្ដាច់ព្រ័ត្រពានរង្វាន់ Copa America។ បន្ថែមពីនេះសហព័ន្ធបាល់ទាត់អាមេរិកខាងត្បូង ក៏បានផ្តល់អនុសាសន៍​ដល់ក្រុមអាជ្ញាធរនៅទីនោះផងដែរ។

សហព័ន្ធបាល់ទាត់អាមេរិកខាងត្បូង បាននិយាយនៅក្នុងសេចក្តីថ្លែងការណ៍ថា ៖«យើង​សោកស្ដាយ​ចំពោះ​ហិង្សា​ដែល​បង្ក​ឡើង ​ដោយ​បុគ្គលមួយចំនួនបានបង្កអសន្ដិសុខ​ ហើយធ្វើ​ឲ្យ​ការ​ប្រកួត​វគ្គ​ផ្ដាច់ព្រ័ត្រ ដែល​បាន​​ត្រៀម​ពិធី​​យ៉ាង​អស្ចារ្យ ប៉ុន្តែ​បែរជាដំណើរការមិនបានល្អ»។

យ៉ាងណាមិញ ក្រុមមន្ត្រីកីឡដ្ឋាន Hard Rock និងអាជ្ញាធរ​មិន​ទាន់​ឆ្លើយ​តប​នឹង​ការ​លើក​ឡើង​របស់សហព័ន្ធបាល់ទាត់អាមេរិកខាងត្បូងទេ។ រូបភាពមិនល្អជាច្រើនក្នុងការប្រកួត Copa America នៅសហរដ្ឋអាមេរិក បានក្លាយជាបន្ទុកដល់សហព័ន្ធបាល់ទាត់ពិភពលោក (FIFA) ដោយសារព្រឹត្តិការណ៍បាល់ទាត់ពិភពលោក World Cup ឆ្នាំ២០២៦ សហរដ្ឋអាមេរិកនឹងត្រូវធ្វើ​សហម្ចាស់ផ្ទះផងដែរ​។

អ្នក​នាំ​ពាក្យ​កីឡដ្ឋាន Hard Rock បាននិយាយថា ៖«យើងយល់ច្បាស់ពីអារម្មណ៍អ្នកគាំទ្រ។ ពួកគេពិតជាខកចិត្តនៅពេលមានសំបុត្រតែមិនអាចចូលកីឡដ្ឋានបាន។ យើងក៏បានធ្វើការក្នុងភាពជាដៃគូជាមួយ CONMEBOL ដើម្បីដោះស្រាយបញ្ហាទាំងនោះ។ ហើយភ្លាមនោះគ្មានអ្វីសំខាន់ជាងសុខភាព និងសុវត្ថិភាពរបស់អ្នកគាំទ្រ»៕

ប្រែសម្រួល៖ ផា រតនា