បេក្ខភាព៥រូបឈានមុខគេក្នុងការប្រជែងពាន Ballon d’Or

ក្រោយ​បញ្ចប់ព្រឹត្តិការណ៍ Euro 2024 និង Copa America 2024 ​កីឡាករ​៥​រូប​​មានភាគរយខ្ពស់ក្នុងការឈ្នះពានរង្វាន់ Ballon d’Or ឆ្នាំ២០២៤។

១. ខ្សែបម្រើ Rodri

ខ្សែបម្រើ Rodri ជាបេក្ខភាពឈានមុខគេក្នុងការឈ្នះពានរង្វាន់ Ballon d’Or ។ ក្នុងនាមជាខ្សែបម្រើការពារ រូប​គេ​ ធ្វើ​បានយ៉ាងល្អ​ក្នុង​ក្រុម​ជម្រើស​ជាតិ​ និង​ក្លិប។ ជាពិសេសការចែកបាល់ និងការកាត់ផ្ដាច់ចង្វាក់សម្រុករបស់គូប្រកួត។ ក្នុងរដូវកាលឆ្នាំ២០២៣-២៤ Rodri បានជួយក្រុម Manchester City ឈ្នះពានរង្វាន់ UEFA Super Cup, FIFA Club World Cup និង Premier League។ ក្នុងក្រុមជម្រើសជាតិ រូប​គេ​បាន​ជួយឲ្យក្រុមអេស្ប៉ាញឈ្នះពាន EURO ឆ្នាំ២០២៤ ​និង​បាន​ឈ្នះ​កីឡាករល្អប្រចាំព្រឹត្តិការណ៍អឺរ៉ូទៀតផង។

២. ខ្សែបម្រើ Jude Bellingham

ខ្សែបម្រើវ័យក្មេង Jude Bellingham ជាបេក្ខភាពម្នាក់មានភាគរយខ្ពស់ក្នុងការ​ប្រជែងដណ្ដើមពានរង្វាន់ Ballon d’Or ។ ក្រោយផ្លាស់ទៅក្លិប Real Madrid រូប​គេ​​ទទួល​បាន​ជោគជ័យខ្លាំងមែនទែន។ រូបគេ​បាន​ជួយក្លិបឈ្នះពានរង្វាន់ចំនួន៣ក្នុងនោះមានពានរង្វាន់ UEFA Champions league, La Liga និង Spanish Super Cup។ ខណៈការបង្ហាញខ្លួនក្នុងព្រឹត្តិការណ៍ EURO ជាមួយក្រុមអង់គ្លេស រូប​គេ​បាន​ខកចិត្ត ក្រោយឈ្នះត្រឹមជើងឯករង។

៣. ខ្សែបម្រើស្លាប Vinicius Junior

កីឡាករ Vinicius Junior ស្ថិតក្នុងបញ្ជីឈ្មោះជាបេក្ខភាពឈានមុខក្នុងការឈ្នះពាន Ballon d’Or ទោះបីរូបគេធ្វើមិនបានល្អ​ជាមួយ​ជម្រើសជាតិប្រេស៊ីល​នៅ​​ Copa America 2024។ ចំពោះសមិទ្ធផលនៅក្នុងក្លិបវិញ Vinicius បាន​ជួយ​ Real Madrid ឈ្នះពានរង្វាន់ចំនួន៣​គឺ​ UEFA Champions league, La Liga និង Spanish Super Cup។

៤. ខ្សែការពារ Dani Carvajal

ជារឿងលំបាកមួយក្នុងការឈ្នះពានរង្វាន់ Ballon d’Or ក្នុងនាមជាខ្សែការពារ។ កីឡាករអុីតាលី Fabio Cannavaro ជាខ្សែការពារចុងក្រោយឈ្នះពានរង្វាន់ Ballon d’Or កាលពីឆ្នាំ២០០៦។ សម្រាប់​ខ្សែការពារ Dani Carvajal ក្នុងឆ្នាំនេះរូបគេធ្វើបានល្អមែនទែនទាំងនៅ​ក្លិប និងក្រុមជម្រើសជាតិ។ ការបង្ហាញខ្លួនឲ្យ Real Madird កីឡាករ Carvajal ​បាន​ឈ្នះ​ពានរង្វាន់ចំនួន៣​គឺ​ UEFA Champions league, La Liga,
Spanish Super Cup ហើយ​នៅ​​ជម្រើសជាតិ រូបគេ​បាន​ជួយ​អេស្ប៉ាញឈ្នះពាន EURO ឆ្នាំ២០២៤។

៥. ខ្សែប្រយុទ្ធ Lionel Messi

បន្ទាប់ពីឈ្នះពានរង្វាន់ Copa America ជាមួយក្រុមជម្រើសជាតិអាហ្សង់ទីន Lionel Messi ក៏​មាន​ឈ្មោះ​ប្រជែងពានរង្វាន់ Ballon d’Or ដែរ។ ទោះ​បី​ជា​យ៉ាង​ណា រូបគេមិនមានភាគ​រយ​ខ្ពស់​ក្នុងការប្រជែងជាមួយកីឡាករ៤រូបខាងលើទេ។ ការផ្លាស់ទៅទឹកដីសហរដ្ឋអាមេរិក កីឡាករ Messi បានជួយឲ្យក្លិប Inter Miami ឈ្នះពានរង្វាន់ League Cup កាលពីរដូវកាលមុន៕

ប្រែសម្រួល៖ ផា រតនា