ខ្សែការពារវ័យ១៨ឆ្នាំ Yoro សម្រេច​ផ្លាស់ទៅ Man Utd

ក្លិបបិសាចក្រហម Manchester United បាន​យល់ព្រមលើកិច្ចព្រមព្រៀងជាមួយក្លិប Lille របស់ប្រទេសបារាំងក្នុងការនាំយកខ្សែការពារវ័យក្មេង Leny Yoro មកចូលរួមក្រុម។

ខ្សែការពារ Leny Yoro វ័យ១៨ឆ្នាំ កំពស់១.៩០ម៉ែត្រ ជាយុវជនរបស់ក្លិប Lille កំពុងតែខិតជិតក្នុងការផ្ទេរទៅកាន់ Manchester United បន្ទាប់ពីយល់ព្រមលើកិច្ចព្រមព្រៀងមានតម្លៃជាង៥០លានផោន។ បច្ចុប្បន្នរូបគេកំពុងស្នាក់នៅប្រទេសអង់គ្លេសរង់ចាំការធ្វើតេស្ដសុខភាព។

ការមករបស់លោក Ruud van Nistelrooy និង Rene Hake ក្នុងនាមជាជំនួយការរបស់លោក Erik ten Hag គេសង្កេតឃើញថា Man Utd នៅរដូវកាលថ្មីផ្ដោតសំខាន់ក្នុងការនាំយកកីឡាករក្មេងៗដើម្បី​ពង្រឹងក្រុម។ បន្ទាប់ពីនាំយកខ្សែប្រយុទ្ធ Joshua Zirkzee វ័យ២៣ឆ្នាំ មករួមក្រុម ឥឡូវនេះពួកគេនាំយកខ្សែការពារ Leny Yoro វ័យ​ក្មេង​ទៀត។

ក្លិប Manchester United បានបញ្ចប់ក្នុងចំណាត់ថ្នាក់លេខ៨ក្នុងក្របខ័ណ្ឌ Premier League កាលពីរដូវកាលមុន។ វាជាការបញ្ចប់ក្នុង​ចំណាត់​ថ្នាក់​ទាបបំផុតក្នុងលីគកំពូលអង់គ្លេស​គិតចាប់តាំងពីឆ្នាំ១៩៨៩-៩០។ ជាមួយគ្នានេះក្លិប​បានយល់ព្រមជាមួយ​ក្លិប Marseille ក្នុងការផ្ទេរខ្សែប្រយុទ្ធ Mason Greenwood ខណៈក្លិប Fulham កំពុងពិចារណាលើការដេញថ្លៃជាលើកទី២ ចំពោះខ្សែបម្រើ Scott McTominay៕

ប្រែសម្រួល៖ ផា រតនា