កីឡា

កីឡាករអាស៊ានធ្លាក់ទាំងអស់ វិញ្ញាសាហែលសេរី១០០ម៉ែត្រ

បានផុស

៣ ខែ មុន

នៅ

ថ្ងៃពុធ ៣១ កក្កដា ២០២៤

ដោយ

ការប្រកួតហែលទឹកលើវិញ្ញាសាហែលសេរីចម្ងាយ១០០ម៉ែត្រ កីឡាករពីតំបន់អាស៊ានទាំងអស់សុទ្ធតែមិនបានឡើងទៅវគ្គបន្ត ដោយបានធ្លាក់ត្រឹមវគ្គជម្រុះបឋមក្នុងព្រឹត្តិការណ៍កីឡាអូឡាំពិក ឆ្នាំ២០២៤ នៅប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់វិញ្ញាសាហែលសេរីចម្ងាយ១០០ម៉ែត្រនេះមានកីឡាករប្រទេសអាស៊ាន៤នាក់ប៉ុណ្ណោះដែលបានចូលរួមប្រកួតគឺកីឡាករសិង្ហបុរី ថៃ កម្ពុជា និងមីយ៉ាន់ម៉ា។

កីឡាករសិង្ហបុរី Jonathan Tan ធ្វើបានថិរវេលា ៤៩.៥១វិនាទី ដែលបានធ្វើឲ្យរូបគេស្ថិតនៅចំណាត់ថ្នាក់លេខ៣៨។ កីឡាករថៃ Dulyawat Kaewsriyong ធ្វើបានថិរវេលា ៥០.៦៤វិនាទី ដែលធ្វើឲ្យរូបគេស្ថិតនៅចំណាត់ថ្នាក់លេខ៤៩។ កីឡាករកម្ពុជា Antoine De Lapparent ធ្វើបានថិរវេលា ៥២.៩៥វិនាទី ដែលធ្វើឲ្យរូបគេស្ថិតនៅចំណាត់ថ្នាក់លេខ៦៧ និងកីឡាករមីយ៉ាន់ម៉ា Phone Pyae Han ធ្វើបានថិរវេលា ៥៥.៥៦វិនាទី ដែលធ្វើឲ្យរូបគេស្ថិតនៅចំណាត់ថ្នាក់លេខ៧៣ ក្នុងចំណោមកីឡាករទាំងអស់ចំនួន៧៩នាក់។

កីឡាករ១៦រូបបានឡើងទៅកាន់វគ្គពាក់កណ្តាលផ្តាច់ព្រ័ត្រ ហើយការប្រកួតវគ្គពាក់កណ្តាលផ្តាច់ព្រ័ត្រមានកីឡាករ៨រូបបានបន្តឡើងទៅកាន់វគ្គផ្តាច់ព្រ័ត្រគឺ ចិន១រូប អូស្ត្រាលី១រូប ហុងគ្រី១រូប បារាំង១រូប រ៉ូម៉ានី១រូប សហរដ្ឋអាមេរិក២នាក់ និងអាល្លឺម៉ង់១រូប ដើម្បីប្រជែងមេដាយ។

កាលវគ្គជម្រុះបឋមកីឡាករអាមេរិក Jack Alexy ធ្វើបានល្អជាងគេដោយប្រើថិរវេលា៤៧.៥៧វិនាទី ឈរលើកំពូលតារាង ប៉ុន្តែការប្រកួតវគ្គពាក់កណ្តាលផ្តាច់ព្រ័ត្ររូបគេធ្វើបានតែ៤៧.៦៨វិនាទីស្ថិតនៅចំណាត់ថ្នាក់លេខ៦។

ចំណែកកីឡាករដែលធ្វើបានល្អជាងគេនៅវគ្គពាក់កណ្តាលផ្តាច់ព្រ័ត្រគឺកីឡាករចិន Pan Zhanle ធ្វើបានល្អខ្លាំងមែនទែនដោយប្រើ ថិរវេលា ៤៧.២១វិនាទី ដើម្បីឈរចំណាត់ថ្នាក់លេខ១ ខណៈការប្រកួតវគ្គជម្រុះបឋម រូបគេបានស្ថិតនៅចំណាត់ថ្នាក់លេខរៀងទី១៦ជាមួយនឹង ថិរវេលា ៤៨.៤០វិនាទី៕