កីឡា

ការប្តឹងតវ៉ាក្នុងកីឡាប្រដាល់គុនខ្មែរត្រូវដាក់ប្រាក់៤០ម៉ឺនរៀល

បានផុស

៨ ខែ មុន

នៅ

ថ្ងៃសុក្រ ៩ សីហា ២០២៤

ដោយ

ការដាក់ពាក្យបណ្តឹងតវ៉ាក្នុងការប្រកួតប្រដាល់គុនខ្មែរ ភាគីតវ៉ាត្រូវដាក់ប្រាក់តម្កល់៤០ម៉ឺនរៀល។ ប្រសិនបើការប្តឹងទទួលបានជោគជ័យ សហព័ន្ធកីឡាប្រដាល់គុនខ្មែរនឹងផ្តល់ប្រាក់នោះទៅអ្នកតវ៉ាវិញ ប៉ុន្តែប្រសិនបើមិនទទួលបានជោគជ័យទេ សហព័ន្ធនឹងរក្សាទុកប្រាក់នោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានឲ្យដឹងថា នេះជាគោលការណ៍កំណត់ក្នុងលក្ខន្តិកៈរបស់សហព័ន្ធ អ្នកដាក់ពាក្យបណ្តឹងតវ៉ាក្នុងករណីមិនប្រក្រតីត្រូវដាក់ប្រាក់តម្កល់៤០ម៉ឺនរៀល។ អ្នកតវ៉ាត្រូវតែដាក់ពាក្យបណ្តឹង។ ប្រសិនបើអត់ដាក់ពាក្យបណ្តឹងទេគឺសហព័ន្ធពិបាកដោះស្រាយណាស់ ប៉ុន្តែត្រូវច្បាស់មុនពេលសម្រេចដាក់ពាក្យបណ្តឹង។

«កន្លងមកមានការចោទប្រកាន់ពីអ្នកគាំទ្រថា ហេតុអ្វីបានជា នីតិវិធីក្នុងការដាក់ពាក្យបណ្តឹងត្រូវបង់ប្រាក់? ពីព្រោះនេះជារឿងចាំបាច់។ បើមិនបង់ប្រាក់ទេ ខ្ញុំជឿថា អ្នកចាញ់ណាក៏មិនសុខចិត្តដែរ។ អីចឹងពួកគាត់នឹងតវ៉ាច្រើន។ ត្រូវដឹងថា នីតិវិធីក្នុងការតវ៉ាគឺត្រូវដាក់ប្រាក់តម្កល់ប្រាក់៤០ម៉ឺនរៀល។ ប្រសិនបើការតវ៉ាទៅឈ្នះ យើងនឹងប្រគល់ប្រាក់ជូនពួកគាត់វិញ តែបើការតវ៉ាមិនឈ្នះទេ គឺនឹងរក្សាទុកលុយនោះ»។ លោក ខូវ ឆាយ បានប្រាប់។

លោកបានពន្យល់ថា ការដោះស្រាយបណ្តឹងនីមួយៗ តាមនីតិវិធីគឺសហព័ន្ធត្រូវអញ្ជើញមន្ត្រីពាក់ព័ន្ធរៀបចំការប្រកួតដើម្បីចូលរួមប្រជុំ ពិនិត្យ ដោះស្រាយ។ ទី២ត្រូវកោះប្រជុំអនុគណៈកម្មការបច្ចេកទេសទាំងអស់ដើម្បីពិនិត្យឡើងវិញ។ ការប្រជុំ ការស្រាវជ្រាវ និងត្រួតពិនិត្យម្តងៗ ត្រូវប្រើមន្ត្រីច្រើននាក់ និងចំណាយពេលវេលាយូរ។

លោក ខូវ ឆាយ មានប្រសាសន៍ថា ៖«ការអញ្ជើញមន្ត្រីចូលរួមធ្វើកិច្ចការនេះ គ្រាន់តែយើងគិតថា ម្នាក់ត្រឹមតែ២០ដុល្លារ អីចឹងអស់ពីរបីរយដុល្លារបាត់ទៅហើយ។ ពេលយើងទទួលថវិកា១០០ដុល្លារពីពួកគាត់ អ្នកខ្លះប្រហែលគិតថា សហព័ន្ធចំណេញគឺអត់ទេ។ ដូច្នេះត្រូវឲ្យច្បាស់ មុនពេលប្តឹងតវ៉ា តែបើមិនច្បាស់ទេ សូមកុំប្តឹង ពីព្រោះបើគិតតែប្តឹង សហព័ន្ធមិនបាច់ធ្វើការអីទេ នៅចាំតែដោះស្រាយបណ្តឹង ហើយចំណាយថវិកាច្រើនណាស់ក្នុងការដោះស្រាយករណីមួយៗ»។

ជាការពិត កម្មវិធីប្រកួតមានច្រើនសង្វៀនប្រចាំសប្តាហ៍ ហើយមាន៣០ទៅ៤០គូក្នុងមួយសប្តាហ៍ ដូច្នេះករណីមិនប្រក្រតីអាចកើតមានដែលធ្វើឲ្យភាគីម្ខាងមិនពេញ។ ភាគីមិនពេញចិត្តអាចដាក់ពាក្យបណ្តឹងស្របតាមនីតិវិធីរបស់សហព័ន្ធ ប៉ុន្តែ កន្លងមកក៏មានអ្នកខ្លះមិនបានប្តឹងតវ៉ាទេ បើទោះបីជាពួកគាត់មិនពេញចិត្តនឹងលទ្ធផលនៃការប្រកួត ឬការសម្រេចរបស់អាជ្ញាកណ្តាលក៏ដោយ៕

អត្ថបទ៖ វីរបុត្រ