កីឡា

លោក វណ្ណដា នឹងមកដល់កម្ពុជាព្រឹកស្អែកដោយមានថ្នាក់ដឹកនាំកីឡាទទួលស្វាគមន៍

បានផុស

១ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

តារាចម្រៀងរ៉េបលំដាប់ឈានមុខរបស់កម្ពុជា ម៉ាន់ វណ្ណដា នឹងត្រឡប់មកដល់ប្រទេសកំណើតវិញនាព្រឹកថ្ងៃទី១៤ ខែសីហា បន្ទាប់ពីលោកបានចូលរួមសម្តែងក្នុងពិធីបិទព្រឹត្តិការណ៍កីឡាអូឡាំពិក ឆ្នាំ២០២៤ នៅប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វណ្ណដា បានធ្វើឲ្យប្រជាជនកម្ពុជាមានការភ្ញាក់ផ្អើល និងមោទនភាពខ្លាំងមែនទែន នៅពេលលោកបានលេចមុខសម្តែងក្នុងពិធីបិទការប្រកួតកីឡាអូឡាំពិក ឆ្នាំ២០២៤ នៅប្រទេសបារាំងតាមរយៈបទចម្រៀងដ៏ល្បីរបស់លោកគឺ Time To Rise។

ការសម្តែងក្នុងពិធីបិទកីឡាអូឡាំពិក ឆ្នាំ២០២៤ មានតារាចម្រៀងល្បីៗលំដាប់ពិភពលោកជាច្រើនត្រូវបានជ្រើសរើសឲ្យចូលរួមសម្តែង ប៉ុន្តែបើនិយាយពីតំបន់អាស៊ីមានតែលោក វណ្ណដា តែម្នាក់គត់។ តាមលំដាប់នៃការសម្តែងនារាត្រីថ្ងៃអាទិត្យ ទី១១ ខែសីហា នៅពហុកីឡដ្ឋាន Stade de France ត្រូវបានគេឃើញបង្ហាញវត្តមានដំបូងដោយតារាចម្រៀងស្រីអាមេរិក Golden Voyager។ បន្ទាប់មកក្រុមតារាចម្រៀងបារាំងដ៏ល្បី Phoenix ដែលមានសមាជិកច្រើនចូលរួមសម្តែង ក្នុងនោះមានតារាចម្រៀងស្រីរបស់ប្រទេសបែលហ្ស៊ិក Angèle ផងដែរ មុនពេលបង្ហាញខ្លួនសម្តែងទោលរបស់លោក ម៉ាន់ វណ្ណដា ជាមួយបទចម្រៀងដ៏ល្បីរបស់ខ្លួន។

តាមការគ្រោងទុក លោក វណ្ណដា នឹងត្រឡប់មកដល់ប្រទេសកំណើតវេលាម៉ោងប្រហែលជា៨ព្រឹក ថ្ងៃពុធ ទី១៤ ខែសីហា ឆ្នាំ២០២៤ នៅអាកាសយានដ្ឋានអន្តរជាតិភ្នំពេញដែលនឹងមានថ្នាក់ដឹកនាំកីឡាទៅទទួលស្វាគមន៍យ៉ាងកក់ក្តៅមានដូចជាលោក ថោង ខុន ទេសរដ្ឋមន្ត្រីទទួលបន្ទុកចលនាអភិវឌ្ឍកីឡា និងជាប្រធានគណៈកម្មាធិការជាតិអូឡាំពិកកម្ពុជា និងលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា។