កីឡា

លីគនារីប្រកួតថ្ងៃស្អែក៥គូលេងម៉ោងដំណាលគ្នាទាំងអស់

បានផុស

១ ខែ មុន

នៅ

ថ្ងៃសុក្រ ១៦ សីហា ២០២៤

ដោយ

លីគបាល់ទាត់កំពូលនារីកម្ពុជា នឹងចាប់ផ្តើមនៅថ្ងៃសៅរ៍ ទី១៧ ខែសីហា ឆ្នាំ២០២៤ បន្ទាប់ពីខកខានតាំងពីឆ្នាំ២០២២ ដោយមាន១០ក្រុមចូលរួមប្រកួតប្រជែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមដែលចូលរួមប្រកួតរដូវកាលនេះមានក្រុមនារីខេត្តកំពង់ធំ ក្រុមនារីព្រះខ័នរាជស្វាយរៀង ក្រុមនារីបឹងកេត ក្រុមនារីខេត្តកំពង់ឆ្នាំង ក្រុមនារីសៀមរាប ក្រុមនារីសលត៍ខេត្តបាល់ដំបង ក្រុមនារីភ្នំពេញក្រោន ក្រុមនារីណាហ្គាវើលដ៍ ក្រុមនារីមីស្ទើរលេង និងក្រុមនារីវិសាខា។

រូបមន្តនៃការប្រកួតគឺមាន២ដំណាក់កាល។ ដំណាលទី១ គឺជាការប្រកួតវិលជុំសន្សំពិន្ទុ២ជើង ក្នុងដី និងក្រៅដី។ ដំណាក់កាលទី២ ក្រុមដែលមានពិន្ទុឈរកំពូលទាំង៤ (Top 4) នឹងប្រកួតបន្តទៀត។ ក្នុងនោះក្រុមឈរលេខ៤ ត្រូវប្រកួតជាមួយក្រុមលេខ៣ ដើម្បីស្វែងរកក្រុមឈ្នះឡើងទៅប្រកួតជាមួយក្រុមចំណាត់ថ្នាក់លេខ២។ ក្រុមដែលទទួលបានជ័យជម្នះនឹងឡើងទៅប្រកួតជាមួយក្រុមចំណាត់ថ្នាក់លេខ១ក្នុងវគ្គផ្តាច់ព្រ័ត្រ ដូច្នេះមានន័យថា ក្រុមចំណាត់ថ្នាក់លេខ១ឈរចាំនៅវគ្គផ្តាច់ព្រ័ត្រ។

សម្រាប់សប្តាហ៍បើកឆាក ការប្រកួតធ្វើឡើង នៅថ្ងៃសៅរ៍ ទី១៧ ខែសីហា វេលាម៉ោង៣:៣០នាទីរសៀល ដែលប្រកួតនៅម៉ោងដំណាលគ្នាទាំង៥គូតែម្តង។

កម្មវិធីប្រកួតសប្តាហ៍ទី១

ក្រុមនារីមីស្ទើរលេង vs ក្រុមនារីវិសាខា នៅទីលានសាលាតម្រង់ទិសទិសព្រៃវែង
ក្រុមនារីព្រះខ័នរាជស្វាយរៀង vs ក្រុមនារីខេត្តកំពង់ធំ នៅកីឡដ្ឋានខេត្តស្វាយរៀង
ក្រុមនារីសលត៍ខេត្តបាត់ដំបង vs ក្រុមនារីសៀមរាប នៅអង្គការសលត៍បាត់ដំបង
ក្រុមនារីភ្នំពេញក្រោន vs ក្រុមនារីណាហ្គាវើលដ៍ នៅកីឡដ្ឋានស្មាត RSN ភ្នំពេញក្រោន
ក្រុមនារីបឹងកេត vs ក្រុមនារីខេត្តកំពង់ឆ្នាំង នៅទីលានហ្វឹកហាត់ ហាយធិក

សូមបញ្ជាក់ថា លីគបាល់ទាត់នារីកម្ពុជា កាលពីឆ្នាំ២០២១ ក្រុមនារីភ្នំពេញក្រោន ជាម្ចាស់ជើងឯក លេខ២បានទៅក្រុមណាហ្គាវើលដ៍កំពង់ស្ពឺ ហើយលេខ៣ក្រុមនារីសៀមរាប។ កីឡាការិនីរបស់ភ្នំពេញក្រោន បាន ជាវៃ ជាអ្នករកបានគ្រាប់បាល់ច្រើនជាងគេគឺ៣៥គ្រាប់ ខណៈកីឡាការិនី យ៉ុន យ៉ើន របស់ក្រុមនារីណាហ្គាវើលដ៍កំពង់ស្ពឺ បានក្លាយជាកីឡាការិនីឆ្នើមប្រចាំរដូវកាល៕