កីឡា

សន្យាមាសសុទ្ធ២គីឡូ អ្នកឧកញ៉ា លាង ម៉េង សន្យាទៅជាមួយជម្រើសជាតិ ស៊ីហ្គេមនៅថៃ

បានផុស

១ ខែ មុន

នៅ

ថ្ងៃចន្ទ ១៩ សីហា ២០២៤

ដោយ

អ្នកឧកញ៉ា លាង ម៉េង បានសន្យាធ្វើដំណើរទៅជាមួយក្រុមបាល់ទះជម្រើសជាតិកម្ពុជាសម្រាប់ការចូលរួមប្រកួតក្នុងព្រឹត្តិការណ៍កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។

ការសន្យានេះបានធ្វើឡើងក្នុងពេលក្រុមហ៊ុន ប៊ែវើរីជីស របស់អ្នកឧកញ៉ា បានចុះហត្ថលេខាធិការឧបត្ថម្ភដល់សហព័ន្ធកីឡាបាល់ទះកម្ពុជាកាលពីថ្ងៃទី១៧ ខែសីហា ឆ្នាំ២០២៤ សម្រាប់រៀបចំព្រឹត្តិការណ៍ប្រកួតបាល់ទះចំនួន៣ផ្សេងគ្នាគឺពានរង្វាន់អន្តរជាតិសម្តេចធិបតី SEA V. League Challenge, ពានរង្វាន់សម្តេចក្រឡាហោម ស ខេង និងពានរង្វាន់ Special Volleyball Challenge 4×4 ទូទាំងប្រទេស ប្រចាំឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីនោះ អ្នកឧកញ៉ា លាង ម៉េង លើកឡើងថា ៖«ខ្ញុំសូមកោតសរសើរចំពោះការខិតខំប្រឹងប្រែងយ៉ាងសកម្មរបស់សហព័ន្ធដែលបានធ្វើឲ្យវិស័យកីឡាបាល់ទះកម្ពុជាទទួលបានការចាប់អារម្មណ៍ ស្ញប់ស្ញែង និងកោតសរសើរចំពោះការរីកចម្រើនទាំងក្នុងតំបន់ និងពិភពលោក។ បន្ទាប់ពីសម្រេចបានសមិទ្ធផលជាប្រវត្តិសាស្ត្រជាបន្តបន្ទាប់ ជាពិសេសការដណ្តើមបានមេដាយប្រាក់ស៊ីហ្គេម លើកទី៣២ និងជោគជ័យជាច្រើនទៀតជូនជាតិមាតុភូមិ»។

«កន្លែងនេះចង់បញ្ជាក់ទៅលោកបណ្ឌិតអគ្គលេខាធិការ និងប្អូនៗកីឡាករថា ខ្ញុំសន្យា ពេលចេញទៅប្រកួតកីឡាស៊ីហ្គេមនៅប្រទេសថៃ បងទៅជាមួយដែរ ប៉ុន្តែងធ្វើយ៉ាងម៉េចយកឲ្យបានមាសសុទ្ធ២គីឡូជាមួយគ្នា»។ អ្នកឧកញ៉ាបានសន្យា។

នេះជាការសន្យារួមដំណើរទៅជាមួយក្រុមបាល់ទះជម្រើសជាតិកម្ពុជាដើម្បីលើកទឹកចិត្តបន្ថែមទៀត បន្ទាប់ពីកាលពីចុងឆ្នាំ២០២៣ អ្នកឧកញ៉ាបានប្រកាសផ្តល់រង្វាន់មាសសុទ្ធចំនួន២គីឡូក្រាមដល់ក្រុមបាល់ទះជម្រើសជាតិកម្ពុជា ប្រសិនបើទទួលបានមេដាយមាសស៊ីហ្គេមនៅពេលបន្តបន្ទាប់។

អ្នកឧកញ៉ា លាង ម៉េង បានក្លាយជាម្ចាស់ឧបត្ថម្ភធំដល់សហព័ន្ធកីឡាបាល់ទះកម្ពុជាដោយឧបត្ថម្ភចំនួន៥០ម៉ឺនដុល្លារក្នុងរយៈពេល៥ឆ្នាំ។ ក្រៅពីឧបត្ថម្ភក្នុងរយៈពេល៥ឆ្នាំពេញ អ្នកកញ៉ាក៏បានឧបត្ថម្ភដល់កម្មវិធីប្រកួតនីមួយៗដាច់ដោយឡែកដែលត្រូវចំណាយថវិការាប់ម៉ឺនដុល្លារបន្ថែមទៀត។

ជាមួយគ្នានេះ លោក អាំង សិរីពិសិដ្ឋ អគ្គលេខាធិការ និងជាអនុប្រធានសហព័ន្ធកីឡាបាល់ទះកម្ពុជាបានទម្លាយឲ្យដឹងថា រហូតដល់ពេលនេះ អ្នកឧកញ៉ា លាង ម៉េង បានឧបត្ថម្ភថវិកាអស់ប្រមាណជាង១លានដុល្លារអាមេរិកហើយដល់សហព័ន្ធ។ ឥឡូវនេះសហព័ន្ធកីឡាបាល់ទះកម្ពុជាមានធនធានគ្រប់គ្រាន់ដើម្បីអភិវឌ្ឍវិស័យកីឡាបាល់ទះ។

លោកបានបញ្ជាក់ក្នុងបទសម្ភាសថា កាលពីមុន សហព័ន្ធកីឡាបាល់ទះកម្ពុជាមានតែបេះដូងដើម្បីធ្វើការងារដោយមិនមានថវិកាគ្រប់គ្រាន់ ប៉ុន្តែចាប់តាំងពីអ្នកឧកញ៉ា លាង ម៉េង សម្រេចឧបត្ថម្ភមកគឺសហព័ន្ធមានធនធានគ្រប់គ្រាន់គឺទាំងធនធានមនុស្ស បច្ចេកទេស និងថវិកាសម្រាប់ធ្វើការងាររបស់ខ្លួន។

កីឡាបាល់ទះកម្ពុជាមានការរីកចម្រើនគួរឲ្យកត់សំគាល់ក្នុងរយៈពេល៤ឆ្នាំចុងក្រោយ។ ការប្រឹងប្រែងហ្វឹកហាត់ក្នុងវិបត្តិកូវីដ-១៩ កាលឆ្នាំ២០២០ បានជំរុញឲ្យក្រុមបាល់ទះកម្ពុជាទទួលបានមេដាយសំរិទ្ធកីឡាស៊ីហ្គេម ជាលើកដំបូងក្នុងប្រវត្តិសាស្ត្រកាលពីឆ្នាំ២០២២ នៅប្រទេសវៀតណាម និងមួយឆ្នាំក្រោយមក បានឈ្នះមេដាយប្រាក់កីឡាស៊ីហ្គេម ឆ្នាំ២០២៣ នៅប្រទេសកម្ពុជា។

កាលពីប៉ុន្មានខែមុន សហព័ន្ធកីឡាបាល់ទះកម្ពុជាបានបញ្ជូនក្រុមយុវជនជម្រើសជាតិអាយុ២០ឆ្នាំទៅចូលរួមប្រកួតពានរង្វាន់កម្រិតអាស៊ីជាលើកដំបូង ហើយឥឡូវនេះទទួលធ្វើម្ចាស់ផ្ទះរៀបចំការប្រកួតពានរង្វាន់កម្រិតអាស៊ាន SEA V. League Challenge ឆ្នាំ២០២៤ ដែលមានម្ចាស់ផ្ទះ កម្ពុជា សិង្ហបុរី ម៉ាឡេស៊ី និងឡាវ ចូលរួមប្រកួត។ តាមការគ្រោងទុក ពានរង្វាន់សម្តេចធិបតី SEA V. League Challenge នឹងចាប់ប្រកួតពីថ្ងៃទី៣០ ខែសីហា ដល់ថ្ងៃទី២ ខែកញ្ញា។

ក្រៅពីពានរង្វាន់ខាងលើ សហព័ន្ធបានរៀបចំឲ្យមានលីគបាល់ទះកំពូលកម្ពុជា Techo League, ពានរង្វាន់សម្តេចក្រឡាហោម ស ខេង, ពានរង្វាន់អភិសន្តិបណ្ឌិត ស សុខា International Club Championship, ពានរង្វាន់សន្តិបណ្ឌិត នេត សាវឿន និងពានរង្វាន់ Special Volleyball Challenge ជាដើម៕

អត្ថបទ៖ វីរបុត្រ