Sterling បន្ដគ្មានឈ្មោះលេងឲ្យ Chelsea វគ្គជម្រុះ UEFA Conference League

ក្រោមការដឹកនាំរបស់លោក Enzo Maresca គ្រូបង្វឹកថ្មីក្លិប Chelsea កីឡាករ Raheem Sterling មិនសូវទទួលបានឱកាស​​បង្ហាញខ្លួនលើទីលានទេ ស្របពេលកុងត្រារបស់គេជាមួយក្លិបនៅសល់ពេល៣ឆ្នាំទៀត។

កីឡាករ Sterling មិនត្រូវបាន​ដាក់​បញ្ចូលក្នុងក្រុម Chelsea ក្រោមការដឹកនាំរបស់ Maresca ទេក្នុងថ្ងៃប្រកួតបើកឆាក Premier League ទល់នឹងក្រុម Manchester City ហើយ​ការប្រកួតវគ្គជម្រុះពានរង្វាន់ UEFA Conference League រូប​គេ​បន្ដគ្មានឈ្មោះទៀត។

ក្លិប Chelsea នឹងត្រូវជួបជាមួយក្លិប Servette ជើងទី១ វគ្គជម្រុះពានរង្វាន់ UEFA Conference League នៅថ្ងៃព្រហស្បតិ៍ ប៉ុន្តែ Sterling មិន​មាន​ឈ្មោះ​ក្នុងបញ្ជី​ដែល​ត្រូវបានបញ្ជូនទៅសហព័ន្ធបាល់ទ្វីបអឺរ៉ុប (UEFA)​ឡើយ។ ទោះជាយ៉ាងណាក៏ដោយ កីឡាករ Ben Chilwell, Welsey Fofana និង Tosin Adarabioyo ក៏មិនមាននៅក្នុងបញ្ជីដែរ។

ក្លិបតោខៀវ Chelsea បាននាំចូលកីឡាករជាច្រើន ​ដែល​ឥឡូវនេះ​មានកីឡាករ​ជាង៣០នាក់​ក្នុងបញ្ជីឈ្មោះ។ ​ថ្មីៗនេះត្រូវ​បាន​គេ​ជឿ​ថា ពួកគេកំពុង​ឈាន​ដល់​ការ​នាំយកកីឡាករ Joao Felix ពី Atletico Madrid៕

ប្រែសម្រួល៖ ផា រតនា