កីឡា

តើជើងខ្លាំង Marlon មានប្រវត្តិយ៉ាងណា មកប្រកួតខ្សែក្រវាត់ WBC នៅកម្ពុជា?

បានផុស

៥ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

កីឡាករប្រដាល់សកលអាជីព Marlon Tapales នឹងមកប្រកួតដណ្តើមខ្សែក្រវាត់ពិភពលោក WBC (World Boxing Council) កម្រិតអាស៊ី ទម្ងន់៥៥គីឡូក្រាម នៅថ្ងៃសៅរ៍ ទី៧ ខែកញ្ញា ឆ្នាំ២០២៤ នៅវិមានពហុកីឡដ្ឋានជាតិអូឡាំពិក រាជធានីភ្នំពេញ ប្រទេសកម្ពុជា។

ដៃគូដណ្តើមខ្សែក្រវាត់របស់ Marlon Tapales មិនទាន់ត្រូវបានបង្ហាញជាផ្លូវការឡើយ ប៉ុន្តែមិនមែនជាកីឡាករកម្ពុជាឡើយ ពីព្រោះនេះជាការប្រកួតសកលអាជីពដណ្តើមខ្សែក្រវាត់កម្រិតពិភពលោកដែលកីឡាករសកលកម្ពុជាមិនទាន់មានសមត្ថភាពប្រកួតប្រជែងទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Marlon Tapales អាយុ៣២ឆ្នាំ កម្ពស់១.៦៥ម៉ែត្រ បានចាប់ផ្តើមប្រដាល់សកលអាជីពតាំងពីឆ្នាំ២០០៨ និងធ្លាប់បានឡើងសង្វៀន៤២ដងគឺឈ្នះ៣៨ដង និងចាញ់៤ដង ក្នុងនោះរូបគេធ្លាប់ផ្តួលដៃគូឲ្យសន្លប់២០ដង។

កីឡាករហ្វីលីពីនរូបនេះអាចត្រូវបានចាត់ទុកជាកំពូលកីឡាករអាស៊ី និងពិភពលោកមួយរូប បន្ទាប់ពីបានសាងកេរ្តិ៍ឈ្មោះល្បីល្បាញតាមការឈ្នះខ្សែក្រវាត់សកលពិភពលោកជាច្រើនដូចជា ខ្សែក្រវាត់ពិភពលោក WBA, ខ្សែក្រវាត់ពិភពលោក IBF, ខ្សែក្រវាត់ពិភពលោក WBO, ខ្សែក្រវាត់អាស៊ីប៉ាស៊ីហ្វិក WBO និងខ្សែក្រវាត់ពិភពលោក WBC-ABCO។

ខ្សែក្រវាត់អាស៊ីប៉ាស៊ីហ្វិក WBO

កីឡាករ Marlon Tapales បានឈ្នះខ្សែក្រវាត់អន្តរជាតិជាលើកដំបូងគឺកម្រិតអាស៊ីប៉ាស៊ីហ្វិក WBO នៅពេលរូបគេបានប្រកួតឈ្នះមិត្តរួមជាតិហ្វីលីពីន Fredirex Rodriguez ដោយពិន្ទុ ក្នុងការតស៊ូ១០ទឹកនៅហ្វីលីពីន ថ្ងៃទី១ ខែសីហា ឆ្នាំ២០១៣។ រូបគេបានឡើងប្រកួតការពារខ្សែក្រវាត់នេះជោគជ័យនៅថ្ងៃទី២៨ ខែមិថុនា ឆ្នាំ២០១៤ នៅពេលឈ្នះពិន្ទុកីឡាករតង់ហ្សានី Fadhili Majiha នៅប្រទេសហ្វីលីពីន។

ខ្សែក្រវាត់ពិភពលោក WBO

កីឡាករបានឈ្នះខ្សែក្រវាត់ WBO នៅថ្ងៃទី២៧ ខែកក្កដា ឆ្នាំ២០១៦ នៅពេលរូបគេបានផ្តួលកីឡាករថៃ Pungluang Sor Singyu ក្នុងទឹកទី១១ សម្រាប់ការប្រកួត១២ទឹក នៅប្រទេសថៃ។

ខ្សែក្រវាត់ពិភពលោក WBA និង IBF

កីឡាករ Marlon Tapales បានឈ្នះខ្សែក្រវាត់ពិភពលោកទាំងពីរក្នុងថ្ងៃតែមួយគឺ WBA និង IBF Super-Bantamweight ថ្ងៃទី៨ ខែមេសា ឆ្នាំ២០២៣ នៅពេលរូបគេទទួលបានជ័យជម្នះដោយពិន្ទុលើកីឡាករអ៊ូបេគីស្ថាន Murodjon Akhmadaliey នៅសហរដ្ឋអាមេរិក ប៉ុន្តែរូបគេបានបាត់បង់ខ្សែក្រវាត់ទាំង២ខ្សែនេះនៅថ្ងៃទី២៦ ខែធ្នូ ឆ្នាំ២០២៣ នៅពេលដាក់ខ្សែក្រវាត់ម្នាក់២ខ្សែក្រវាត់ជាមួយកីឡាករជប៉ុន Naoya Inoue ដែលដាក់ខ្សែក្រវាត់ WBC និង WBO ដើម្បីដណ្តើមគ្នា ហើយកីឡាករហ្វីលីពីនបានចាញ់សន្លប់ក្នុងទឹកទី១០ នៅជប៉ុនដែលធ្វើឲ្យរូបគេបាត់បង់ខ្សែក្រវាត់។

ខ្សែក្រវាត់ពិភពលោក WBC-ABCO

នៅថ្ងៃទី១០ ខែឧសភា ឆ្នាំ២០២៤ កន្លងទៅប៉ុន្មានខែនេះ Marlon Tapales បានឈ្នះខ្សែក្រវាត់អន្តរទ្វីប WBC-ABCO ដែលនៅទំនេរ បន្ទាប់ពីបានផ្តួលកីឡាករថៃ Nattapong Jankaew ឲ្យសន្លប់ក្នុងទឹកទី១សម្រាប់ការប្រកួត១០ទឹកនៅប្រទេសហ្វីលីពីន។

សម្រាប់ការមកប្រកួតដណ្តើមខ្សែក្រវាត់ WBC កម្រិតអាស៊ី នៅកម្ពុជាមិនត្រូវបានគេទម្លាយឲ្យដឹងពីតម្លៃខ្លួនដែលកីឡាករហ្វីលីពីនរូបនេះទទួលបានឡើយ ប៉ុន្តែរូបគេធ្លាប់មានតម្លៃខ្ពស់រហូតដល់ជាង៣លានដុល្លារសម្រាប់ការប្រកួតកន្លងមក។

ទោះបីជាយ៉ាងណា ឧកញ៉ា ស្រី ចាន់ថន ដែលជាអ្នករៀបចំការប្រកួតដណ្តើមខ្សែក្រវាត់សកលនៅលើទឹកដីកម្ពុជាបាននិយាយថា មានការពិភាក្សាពិសេសជាមួយស្ថាប័នប្រដាល់សកលអន្តរជាតិ WBC និងសាមីខ្លួនកីឡាករទើប កីឡាករសម្រេចមកប្រកួតនៅកម្ពុជា។

គោលបំណងសំខាន់ដែលរៀបចំការប្រកួតនេះគឺដើម្បីផ្សព្វផ្សាយកីឡាគុនខ្មែរលើឆាកអន្តរជាតិ ខណៈការប្រកួតមាន៧គូក្នុងនោះមានការប្រកួតគុនខ្មែរ៦គូ និងប្រដាល់សកលតែ១គូប៉ុណ្ណោះ ហើយកីឡាករបរទេសនឹងធ្វើដំណើរទៅទស្សនកិច្ចនៅប្រាសាទអង្គរវត្ត ខេត្តសៀមរាប៕

អត្ថបទ៖ វីរបុត្រ