កីឡា

កីឡាករចូលសញ្ជាតិខ្មែរ៣រូបជាប់ជម្រើសជាតិកម្ពុជាក្រុមធំ

បានផុស

៦ ខែ មុន

នៅ

ថ្ងៃអង្គារ ២៧ សីហា ២០២៤

ដោយ

ក្រុមបាល់ទាត់ជម្រើសជាតិកម្ពុជាត្រូវបានចេញបញ្ជីឈ្មោះជាផ្លូវការហើយដើម្បីប្រកួតជាមួយ ស្រីលង្កា វគ្គជម្រុះ AFC Asian Cup ជើងទី១ នៅថ្ងៃទី៥ ខែកញ្ញា នៅប្រទេសស្រីលង្កា និងជើងទី២ ថ្ងៃទី១០ ខែកញ្ញា ឆ្នាំ២០២៤ នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមកីឡាករទាំង២៣នាក់មានកីឡាករមកពីក្លិបព្រះខ័នរាជស្វាយរៀង៩នាក់ វិសាខា៧នាក់ ភ្នំពេញក្រោន៤នាក់ បឹងកេត២នាក់ អាយអេសអាយដង្កោសែនជ័យ១នាក់ និងក្លិបនូវែលហ្សេឡង់ Melville United ១នាក់។

កីឡាករចូលសញ្ជាតិខ្មែរ៣រូបគឺខ្សែការពារ មីហ៊្សូណ ហ៊ីការ៉ុ របស់ព្រះខ័នរាជស្វាយរៀង ខ្សែការពារ កាន់ ម៉ូ របស់វិសាខា និងខ្សែបម្រើ យូឌៃ អូកាវ៉ា របស់ភ្នំពេញក្រោន។

កីឡាករ Mikaru Mizuno

កីឡាករជប៉ុន Mikaru Mizuno អាយុ៣៣ឆ្នាំ ទទួលបានសញ្ជាតិកម្ពុជា នៅឆ្នាំ២០២៤ បន្ទាប់ពីមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៥ ជាមួយក្លិបដំបូង ព្រះខ័នរាជស្វាយរៀង និងផ្លាស់ទៅ បឹងកេត មុនពេលត្រឡប់ទៅ ព្រះខ័នរាជស្វាយរៀង និងខ្ចីជើងទៅ គិរីវង់សុខសែនជ័យ។

កីឡាករ Khan Mohammed Faeez

កីឡាករអាហ្វ្រិកខាងត្បូង Khan Mohammed Faeez ឈ្មោះខ្មែរ កាន់ ម៉ូ អាយុ៣១ឆ្នាំ ទទួលបានសញ្ជាតិកម្ពុជានៅឆ្នាំ២០២៤ បន្ទាប់ពីមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៩ ជាមួយក្លិប ក្រសួងការពារជាតិ និងវិសាខា។ ខ្សែការពាររូបនេះជាប្រធានក្រុមវិសាខា និងបានរៀបការជាមួយភរិយាជាខ្មែរ។

កីឡាករ Yudai Ogawa

កីឡាករជប៉ុន Yudai Ogawa អាយុ២៧ឆ្នាំ ទទួលបានសញ្ជាតិកម្ពុជា ឆ្នាំ២០២៣ បន្ទាប់ពីបានមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៨ ជាមួយក្លិប ក្រសួងការពារជាតិ អង្គរថាយហ្គឺរ និងភ្នំពេញក្រោន។ ខ្សែបម្រើកណ្តាលដ៏ឆ្នើមរូបនេះត្រូវបានកោះហៅចូលជម្រើសជាតិកម្ពុជាច្រើនលើកហើយ។

ជាមួយគ្នានេះ យុវជនអាយុ១៧ឆ្នាំ លឹម លោកាថុង នៅប្រទេសនូវែលហ្សេឡង់ ត្រូវបានកោះហៅជម្រើសជាតិក្រុមធំ បន្ទាប់ពីបង្ហាញខ្លួនយ៉ាងល្អកាលពីប៉ុន្មានខែមុនក្នុងក្រុមយុវជនកម្ពុជាអាយុ១៩ឆ្នាំនៅប្រទេសឥណ្ឌូណេស៊ី។