កីឡា

ហេតុផល៤ ក្រុមបាល់ទះកម្ពុជា អាចនឹងឈ្នះជើងឯក SEA V. League Challenge

បានផុស

៤ សប្តាហ៍ មុន

នៅ

ថ្ងៃអង្គារ ២៧ សីហា ២០២៤

ដោយ

ក្រុមបាល់ទះជម្រើសជាតិកម្ពុជារំពឹងធ្វើបានល្អក្នុងនាមជាម្ចាស់ផ្ទះរៀបចំការប្រកួតពានរង្វាន់អាស៊ានលំដាប់ទី២ SEA V. League Challenge ដើម្បីទទួលបានកៅអីឡើងទៅកាន់ពានរង្វាន់លំដាប់ទី១ SEA V. League នៅឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតបាល់ទះពានរង្វាន់សម្តេចធិបតី SEA V. League Challenge ចាប់ពីថ្ងៃទី២៨ ខែសីហា ដល់ថ្ងៃទី២ ខែកញ្ញា ឆ្នាំ២០២៤ នៅវិមានពហុកីឡដ្ឋានជាតិអូឡាំពិកដែលមានក្រុមបាល់ទះជម្រើសជាតិ៤គឺម្ចាស់ផ្ទះ កម្ពុជា ម៉ាឡេស៊ី សិង្ហបុរី និង ឡាវ។

ថ្នាក់ដឹកនាំសហព័ន្ធកីឡាបាល់ទះកម្ពុជាបានដាក់គោលដៅយកជើងឯកពានរង្វាន់នេះដើម្បីកម្លាំងចិត្តដ៏សំខាន់ក្នុងការត្រៀមខ្លួនសម្រាប់ព្រឹត្តិការណ៍កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។ ការរំពឹងទុកនេះស្របពេលក្រុមបាល់ទះជម្រើសជាតិកម្ពុជាមានហេតុផលសំខាន់៤យ៉ាងដែលអាចឈ្នះជើងឯក។

១. សមត្ថភាពកើនឡើងខ្ពស់

កីឡាបាល់ទះកម្ពុជារីកចម្រើនគួរឲ្យកត់សំគាល់ក្នុងរយៈពេលប្រមាណ៤ឆ្នាំចុងក្រោយ និងត្រូវបានប្រទេសនៅតំបន់អាស៊ានចាប់អារម្មណ៍។ ក្រោយការហ្វឹកហាត់ក្នុងវិបត្តិកូវីដ-១៩ចន្លោះឆ្នាំ២០១៩-២០២១ ក្រុមបាល់ទះកម្ពុជាបានធ្វើឲ្យមានការភ្ញាក់ផ្អើលដោយបានឈានដល់វគ្គពាក់កណ្តាលផ្តាច់ព្រ័ត្រ ក្នុងកីឡាស៊ីហ្គេម ឆ្នាំ២០២១ និងទទួលបានមេដាយសំរិទ្ធជាលើកដំបូងក្នុងប្រវត្តិសាស្ត្រ។

បន្ទាប់មក ស៊ីហ្គេម ឆ្នាំ២០២៣ ក្រុមបាល់ទះកម្ពុជាបានបង្កការភ្ញាក់ផ្អើលជាថ្មីដោយឈានដល់វគ្គផ្តាច់ព្រ័ត្រ និងទទួលបានមេដាយប្រាក់ជាលើកដំបូងក្នុងប្រវត្តិសាស្ត្រ។

ការទទួលបានមេដាយស៊ីហ្គេម២លើកចុងក្រោយមិនមែនជារឿងចៃដន្យ ប៉ុន្តែជាសមត្ថភាពពិតៗដែលកើតចេញពីការប្រឹងប្រែង។ ថ្នាក់ដឹកនាំសហព័ន្ធបានផ្លាស់ប្តូរ បង្កើនការហ្វឹកហាត់ បង្កើនចំណងមិត្តភាពអន្តរជាតិ និងការប្រកួតមិត្តភាពអន្តរជាតិជាបន្តបន្ទាប់បានធ្វើឲ្យក្រុមបាល់ទះជម្រើសជាតិកម្ពុជាលេចធ្លោខ្លាំងក្នុងពេលប៉ុន្មានចុងក្រោយ។

២. កម្មវិធីប្រកួតក្នុងស្រុកច្រើន

ថ្នាក់ដឹកនាំសហព័ន្ធកីឡាបាល់ទះកម្ពុជាបានបង្កើតឲ្យមានលីគបាល់ទះកំពូលកម្ពុជាជាលើកដំបូងនៅឆ្នាំ២០២៤។ ជាមួយគ្នានេះ ពានរង្វាន់សម្តេចក្រឡាហោម ស ខេង ពានរង្វាន់អភិសន្តិបណ្ឌិត ស សុខា និងពានរង្វាន់មហាជន Special Volleyball Challenge Cup ដែលបានផ្តល់ឱកាសឲ្យកីឡាករបាល់ទះកម្ពុជាគ្រប់កម្រិតចូលរួមប្រកួតប្រជែង បង្ហាញសមត្ថភាព និងបង្កើនបទពិសោធកាន់តែល្អប្រសើរជាលំដាប់។

ការហ្វឹកហាត់បូករួមនឹងការអនុវត្តផ្ទាល់នៅក្នុងកម្មវិធីប្រកួតជាច្រើនបានជំរុញឲ្យកីឡាករ ក្លិប ឬក្រុមនីមួយៗមានការកើនឡើងនូវបទពិសោធ និងសមត្ថភាពខ្ពស់សម្រាប់ក្រុមជម្រើសជាតិដ៏រឹងមាំ។

៣. ថវិកាគ្រប់គ្រាន់សម្រាប់ការអភិវឌ្ឍ

អ្វីដែលកាន់តែពិសេសនោះ សហព័ន្ធកីឡាបាល់ទះកម្ពុជាមានធនធានហិរញ្ញវត្ថុគ្រប់គ្រាន់ក្នុងការអភិវឌ្ឍកីឡារបស់ខ្លួន។ លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជាបាននិយាយថា កាលពីមុន សហព័ន្ធកីឡាបាល់ទះកម្ពុជាមានតែកម្លាំងចិត្ត បច្ចេកទេស និងស្មារតីប៉ុណ្ណោះក្នុងការធ្វើការ ប៉ុន្តែមិនមានថវិកាទេ។ ឥឡូវនេះ សហព័ន្ធមានថវិកាគ្រប់គ្រាន់សម្រាប់អភិវឌ្ឍកីឡាបាល់ទះ។ ក្នុងការអភិវឌ្ឍទាំងនោះមានដូចជាការរៀបចំកម្មវិធីប្រកួត ការបណ្តុះបណ្តាលថ្នាលយុវជន ការបណ្តុះបណ្តាលមន្ត្រីអាជ្ញាកណ្តាល មន្ត្រីបច្ចេកទេស មន្ត្រីរៀបចំការប្រកួត និងសម្ភារៈជាដើម។

៤. កីឡាករចេញទៅលេងនៅក្រៅប្រទេស

ទន្ទឹមជាមួយគ្នានេះ កីឡាករបាល់ទះកម្ពុជាទទួលបានឱកាសចេញទៅប្រកបអាជីពបាល់ទះនៅក្រៅប្រទេសជាបន្តបន្ទាប់។ ជាក់ស្តែងកីឡាករ វឿន វាសនា ទៅលេងនៅលីគតៃវ៉ាន់។ កីឡាករ គួន ម៉ុម កីឡាករ សឿន ហេង និងកីឡាករមួយចំនួនទៀតបានទៅលេងនៅលីគវៀតណាម។

ការចេញទៅលេងនៅក្រៅប្រទេសបានធ្វើឲ្យកីឡាករកាន់តែយល់ច្បាស់ពីបាល់ទះ បង្កើនបទពិសោធ និងសមត្ថភាព ដែលធ្វើឲ្យពួកគេមានសមត្ថភាពកាន់តែខ្ពស់។

ក្រៅពីកត្តាសំខាន់៤ខាងលើ ក្រុមកម្ពុជាក៏មានកម្លាំងចិត្តដ៏ធំធេងថែមទៀតសម្រាប់ការប្រកួតក្នុងនាមជាម្ចាស់ផ្ទះដែលមានអ្នកគាំទ្រចូលទស្សនាផ្ទាល់ដើម្បីលើកទឹកចិត្តនៅវិមានពហុកីឡដ្ឋានជាតិអូឡាំពិក។

សូមបញ្ជាក់ថា ពានរង្វាន់ម្ចាស់ជើងឯក SEA V. League Challenge នឹងឡើងទៅប្រកួតពានរង្វាន់លំដាប់ទី១ SEA V. League នៅឆ្នាំ២០២៥ ជាមួយឥណ្ឌូណេស៊ី ថៃ និងហ្វីលីពីន ខណៈក្រុមបាល់ទះជម្រើសជាតិ វៀតណាម បានធ្លាក់មកលេង SEA V. League Challenge បន្ទាប់ពីធ្វើមិនបានល្អក្នុងការប្រកួត SEA V. League ដែលទើបចប់កាលពីថ្ងៃ២៥ ខែសីហា ឆ្នាំ២០២៥៕