កីឡា

ចិនសន្យាជួយកម្ពុជាឲ្យជោគជ័យកីឡាយុវជនអាស៊ី២០២៩ដូចស៊ីហ្គេម២០២៣

បានផុស

៥ ខែ មុន

នៅ

ថ្ងៃពុធ ២៨ សីហា ២០២៤

ដោយ

កិច្ចសហប្រតិបត្តិការលើគម្រោងជំនួយបច្ចេកទេសកីឡាកម្ពុជា-ចិនត្រូវបានបិទបញ្ចប់ដោយជោគជ័យនៅព្រឹកថ្ងៃទី២៨ ខែសីហា ឆ្នាំ២០២៤ នៅមជ្ឈមណ្ឌលជាតិហ្វឹកហ្វឺន និងកីឡា បន្ទាប់ពីដំណើរការគម្រោងដោយជោគជ័យសម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីបិទបញ្ចប់គម្រោង កីឡាកររត់ប្រណាំង ឈុន ប៊ុនថន ដែលបានទៅហ្វឹកហាត់នៅចិន និងក្លាយជាអត្តពលកម្មខ្មែរដំបូងគេបានឈ្នះមេដាយមាសកីឡាស៊ីហ្គេម លើប្រភេទកីឡារត់ប្រណាំងបានតំណាងឲ្យអត្តពលិកទាំងអស់ឡើងថ្លែងអំណរគុណដល់ប្រទេសចិនដែលបានផ្តល់ជំនួយគម្រោងហ្វឹកហាត់ដ៏ល្អនេះ។

លោកស្រី Zhong Jie អគ្គកុងសលស្ថានទូតចិនប្រចាំនៅកម្ពុជា មានប្រសាសន៍ថា រដ្ឋាភិបាលចិនមិនត្រឹមតែជួយកសាងពហុកីឡដ្ឋានជាតិមរតកតេជោសម្រាប់រៀបចំការប្រកួតកីឡាស៊ីហ្គេមប៉ុណ្ណោះទេ ប៉ុន្តែថែមទាំងអនុម័តជំនួយគម្រោងហ្វឹកហាត់ដល់អត្តពលិកកម្ពុជាទៀត។ តាមរយៈការហ្វឹកហាត់នៅប្រទេសចិន គ្រូបង្វឹកចិនមកបង្ហាត់នៅកម្ពុជា ក៏ដូចជាផ្តល់ជំនួយសម្ភារៈជាដើមបានផ្តល់ឲ្យកម្ពុជាទទួលបានជោគជ័យដ៏ត្រចះត្រចង់ និងបង្កើតបានជាប្រវត្តិសាស្ត្រដំបូងដែលទទួលបានមេដាយច្រើនបំផុតគឺមេដាយមាស៨១ ប្រាក់៧៤ និងសំរិទ្ធ១២៧។

លោកស្រីបន្ថែមថា ៖«ឆ្នាំ២០២៤គឺជាឆ្នាំផ្លាស់ប្តូរប្រជាជននៃប្រទេសទាំងពីរ ប្រទេសចិននឹងបន្តប្តេជ្ញាពង្រឹងកិច្ចសហប្រតិបត្តិការលើវិស័យកីឡាបន្តទៀត។ បន្តលើកកម្ពស់ការហ្វឹកហាត់ ការប្រកួត ជួយកម្ពុជាឲ្យសម្រេចបាននូវគោលដៅនៃប្រទេសមានសក្តានុពលផ្នែកកីឡានៅអាស៊ី»។

ជាមួយគ្នានេះ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថា គម្រោងជំនួយបច្ចេកទេសរបស់ចិនគឺជាជោគជ័យដ៏ធំធេងលើសពីកីឡា។ អត្តពលិក គ្រូបង្វឹក និងមន្ត្រីបានផ្លាស់ប្តូរវប្បធម៌ ប្រពៃណី និងមនោសញ្ចេតនាជ្រាលជ្រៅជាមួយគ្នា។

លោកមានប្រសាសន៍ថា ៖«ភាគីចិនបានបញ្ជាក់ប្រាប់ខ្ញុំហើយថា នឹងបន្តឲ្យមានគម្រោងជំនួយនេះបន្ថែមទៀតសម្រាប់ឆ្នាំ២០២៩។ ចាប់ពីឥឡូវនេះទៅ យើងកំពុងជំរុញក្នុងការធ្វើគម្រោងជាមួយគ្នាដើម្បីបញ្ជួនអត្តពលិកទៅហ្វឹកហាត់បន្តទៀត។ គម្រោងបានស្តែងចេញនូវលទ្ធផលដ៏ល្អ ហើយលទ្ធផលនោះគឺជោគជ័យនៃការធ្វើម្ចាស់ផ្ទះ ជោគជ័យនៃការទទួលបានមេដាយ។ អ្វីដែលយើងទទួលបានបន្ថែមទៀតគឺការសន្យាជួយដល់កម្ពុជាឲ្យទទួលបានជោគជ័យក្នុងការធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩»។

ប្រទេសចិនបានផ្តល់គម្រោងជំនួយបច្ចេកទេសហ្វឹកហាត់ដល់អត្តពលិកកម្ពុជារយៈពេល២ឆ្នាំមុនកីឡាស៊ីហ្គេម ឆ្នាំ២០២៣ ប៉ុន្តែដោយសារវិបត្តិជំងឺកូវីដ-១៩ បានផ្ទុះឡើង អត្តពលិកកម្ពុជាលើ១២ប្រភេទកីឡាបានទៅហ្វឹកហាត់ប្រមាណជាងកន្លះឆ្នាំប៉ុណ្ណោះមុនពេលកីឡាស៊ីហ្គេម។ បន្ទាប់ពីចប់កីឡាស៊ីហ្គេម អត្តពលិកកម្ពុជាបានបន្តទៅហ្វឹកហាត់កាលពីចុងឆ្នាំ២០២៣ទៀត។

ពេលនេះគម្រោងរយៈពេល២ឆ្នាំត្រូវបានបិទបញ្ចប់នៅព្រឹកថ្ងៃទី២៨ ខែសីហា ឆ្នាំ២០២៤ ដោយមានវត្តមានលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា និងលោកស្រី Zhong Jie អគ្គកុងសលស្ថានទូតនៃសាធារណរដ្ឋប្រជាមានិតចិនប្រចាំនៅកម្ពុជា ព្រមទាំងកីឡាករ កីឡាការិនី គ្រូបង្វឹក មន្ត្រីបច្ចេកទេស ដែលបានទៅហ្វឹកហាត់នៅប្រទេសចិន៕