កីឡា

លោក អូន ព័ន្ធមុនីរ័ត្ន ប្រកាសបន្តគាំទ្រសហព័ន្ធកីឡាការ៉ាតេអាណត្តិថ្មី

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៩ សីហា ២០២៤

ដោយ

សហព័ន្ធកីឡាការ៉ាតេកម្ពុជាបានបញ្ចប់អាណត្តិទី៩ និងបានបន្តអាណត្តិថ្មីទី១០ ឆ្នាំ២០២៤-២០២៨ ដែលមានលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បន្តជាប្រធាន បន្ទាប់ពីអង្គមហាសន្និបាតបានបោះឆ្នោតគាំទ្រលោកដោយសំឡេង១០០លើ១០០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហាសន្និបាតបញ្ចប់អាណត្តិចាស់ និងបន្តអាណត្តិថ្មីបានធ្វើឡើងនៅថ្ងៃទី២៨-២៩ ខែសីហា ឆ្នាំ២០២៤ នៅទីស្នាក់ការនៃគណៈកម្មាធិការជាតិអូឡាំពិកកម្ពុជា។ តាមរបាយការណ៍របស់គណៈកម្មការប្រតិបត្តិសហព័ន្ធបានបង្ហាញថា អាណត្តិទី៩ ពីឆ្នាំ២០២០ ដល់២០២៤ សហព័ន្ធបានធ្វើសកម្មភាពជាច្រើនដូចជាការប្រកួតលក្ខណៈជាតិ៧ដង ការប្រកួតអន្តរជាតិ១៤ដង ការហ្វឹកហាត់នៅក្រៅប្រទេស ការបើកវគ្គបណ្តុះបណ្តាល ការប្រឡង់យកអាជ្ញាកណ្តាល-ចៅក្រម និងគ្រូបង្វឹកអន្តរជាតិជាដើម។

សមិទ្ធផលដែលទទួលបានក្នុងអាណត្តិចាស់៤ឆ្នាំកន្លងទៅគឺមេដាយមាស៤គ្រឿង ប្រាក់១១គ្រឿង និងសំរិទ្ធ៤០គ្រឿង សរុប៥៥គ្រឿង ដែលបានក្លាយជាកម្លាំងចិត្តដ៏សំខាន់សម្រាប់បន្តការងារអាណត្តិថ្មីក្រោមការដឹកនាំរបស់លោកឧបនាយករដ្ឋមន្ត្រី អូន ព័ន្ធមុនីរ័ត្ន។

លោកឧបនាយករដ្ឋមន្ត្រី អូន ព័ន្ធមុនីរ័ត្ន ប្រធានសហព័ន្ធកីឡាការ៉ាតេកម្ពុជាបានថ្លែងក្នុងពិធីបិទមហាសន្និបាតថា គណៈកម្មការប្រតិបត្តិរបស់ព័ន្ធត្រូវយកចិត្តទុកដាក់ក្នុងផ្សព្វផ្សាយឲ្យបានទូលំទូលាយអំពីកីឡាការ៉ាតេ។ ជាពិសេស អគ្គលេខាធិការត្រូវសហការជាមួយអគ្គលេខាធិការដ្ឋាននៃក្រសួងសេដ្ឋកិច្ច និងហិរញ្ញវត្ថុដើម្បីរៀបចំឲ្យមានចលនាឧបត្ថម្ភគាំទ្ររបស់ មន្ទីរសេដ្ឋកិច្ច និងហិរញ្ញវត្ថុរាជធានី-ខេត្ត ដើម្បីទ្រទ្រង់ក្លិបការ៉ាតេនៅតាមដែនសមត្ថកិច្ចរបស់ខ្លួន។

លោកមានប្រសាសន៍ថា ៖«យើងមានក្លិបនៅរាជធានីផង នៅតាមខេត្តផង។ នៅរាជធានីមានក្រសួងបានគាំទ្រក្លិបមួយចំនួនហើយ ហើយមានកីឡាករ កីឡាការិនីបានទទួលមេដាយច្រើនដែរក្នុងពេលកន្លងមក។ ទន្ទឹមនេះក៏មានក្លិបជាសមាជិកសហព័ន្ធនៅតាមបណ្តាខេត្ត អីចឹងក្រសួងបានគាំទ្រដល់សហព័ន្ធ ក្លិបនៅរាជធានី ហើយមន្ទីរសេដ្ឋកិច្ច និងហិរញ្ញវត្ថតាមខេត្តឧបត្ថម្ភគាំទ្រក្លិបតាមខេត្តរបស់ខ្លួន»។

ជាមួយគ្នានេះ លោកឧបនាយករដ្ឋមន្ត្រីបានស្នើឲ្យគណៈកម្មការប្រតិបត្តិយកចិត្តទុកដាក់ក្នុងការរៀបចំរចនាសម្ព័ន្ធគ្រប់គ្រងក្លិប និងអភិវឌ្ឍក្លិបឲ្យបានល្អ។ ការគាំទ្រមានការកើនឡើង ប៉ុន្តែក្លិបនីមួយៗត្រូវតែពង្រឹងការគ្រប់គ្រង សមត្ថភាព វិន័យ និងសាមគ្គីភាពផ្ទៃក្នុងដើម្បីឲ្យក្លាយជាមហាគ្រួសារតែមួយឲ្យស្របតាមគោលនយោបាយជាតិដែលផ្អែកតាមអនុសាសន៍របស់សម្តេចតេជោ ហ៊ុន សែន ថា «ប្រជាជនមួយរូប លេងកីឡាមួយប្រភេទ» ហើយក្រសួងស្ថាប័នមួយត្រូវឧបត្ថម្ភគាំទ្រដល់សហព័ន្ធកីឡាយ៉ាងតិចមួយ។

លោកមានប្រសាសន៍ថា ៖«ក្នុងស្មារតីនេះ ខ្ញុំសូមប្រកាសថា ក្រសួងសេដ្ឋកិច្ច និងហិរញ្ញវត្ថុនឹងបន្តគាំទ្រដល់សហព័ន្ធកីឡាការ៉ាតេកម្ពុជាតទៅមុខទៀត»។

នៅក្នុងមហាសន្និបាតបញ្ចប់អាណត្តិចាស់ បន្តអាណត្តិថ្មី លោកឧបនាយករដ្ឋមន្ត្រី អូន ព័ន្ធមុនីរ័ត្ន ក៏បានប្រគល់ប្រាក់រង្វាន់លើកទឹកចិត្តដល់ជ័យលាភីមេដាយកីឡាទ្វីបអាស៊ី (Asian Games) ឆ្នាំ២០២៣ នៅប្រទេសចិនដែលកីឡាការិនី ពុទ្ធា ស្រីណុច, អ៊ុន ស្រីដា និង ថាត ឆេងហុង ព្រមទាំងគ្រូបង្វឹក ដែលបានឈ្នះមេដាយសំរិទ្ធ១គ្រឿង។ ការប្រកួតកីឡាទ្វីបអាស៊ី ឆ្នាំ២០២២ ដែលលើកមកចុងឆ្នាំ២០២៣ កម្ពុជាទទួលបានមេដាយសំរិទ្ធតែ១គត់ដោយកីឡាការ៉ាតេ លើវិញ្ញាសានារីជាក្រុម Kata។